Ezodu 24

'Re ihâimana u'âsi mono, Izaraéu nhihudu norĩ ma, te te iropisutuzé wasu'u

1Tawamhã Uburé Danhib'apito te Mozésihi ma tinha ãne:

— A hã, Arã, Nadabe, Abiu, duré 70 na Izaraéu nhihudu nhib'ihâ'a norĩ me hã, te za ẽtẽ na isai'uri za'ra wa'wa, ĩhâimanazéb u we ĩtẽme ai'aba'réi wa'aba da. Tawamhã zahadu romhâ na prãi ré te za aihi'rãtitõ ĩ'ãma aiwata za'ra wa'aba da hã asimroi wa'wa. 2Mozési, aiwétési te za 'râwimhã ĩtẽmemhã aiwi; asiré norĩ hã mare di za. Duré a'uwẽ norĩ te te asiré hã sai'uri za'ra õ di za, ẽtẽ na hã.

3Tawamhã Mozési ma tô mo, Uburé Danhib'apito mreme uburé isimiroti hã te te dama waihu'u da. Tahawa, Izaraéu nhihudu norĩ, ma tô simisutu uburé ãma sada'âbâ za'ra ãne:

— Uburé wa za 'manharĩ za'ra ni, Uburé Danhib'apito marĩ te te wama iwaihu'u za'ra zé hã.

4Tawamhã Mozési, Uburé Danhib'apito nhimiroti na ma tô uburé ãma rob'ui'éré. Tawamhã awẽ bâtâ na mararé ẽtẽ 'rãihâ zahâpâ ma tô danhimizama zatazéb da, sisiwipsi ẽne hã sa'ra. Te te sa'ra wamhã, ma tô duré 12 na ẽtẽ waré hã hâiwi te te anhoré, Izaraéu nhihudu norĩ hâiba za'rata mono bâ. 5Tawamhã Mozési, ni'wam norĩ ai'reputu ma, Uburé Danhib'apito ma danhoprubzéb da, danhimizama te te zata za'ra da, ma tô tãma 'ru za'ra. Powawẽ iba'õmo zama ma tô tãma 'ru za'ra, danhoprubzé ãma irowẽ za'ẽtẽ zé te te siwi simro da. 6Tawamhã Mozési, danhimizama wapru aiwa ãma isipo'o na ma tô piza'a 're nho'a 'reptõ wa tisẽ. Tawamhã ma tô i'apo'o amo hã ẽtẽ za'ra nhisiwimhã sa'wa. 7Taha pari, Uburé Danhib'apito tinhib'a'uwẽ norĩ me isisaze za'ra zém na ibaihâ nhisi ma tô ti'â, isimiroti na rob'ui'éré ré hã. Te te âri wamhã, mreme 'rãihâ sina te dama sõré. Tawamhã te ãne nharĩ za'ra ni:

— Uburé Danhib'apito mreme hã wa za wa te 're wapari pese za'ra za. Wa za uburé wa te 're 'manharĩ za'ra, te te wama i'ru za'ra zé hã.

8Tawamhã Mozési, danhimizama waprui ré piza'a 're nho'a ma tô ti'â. Ma tô duré danhisi te te a'a. Taha sina te dama tinha ãne:

— Ã hã danhimizama wapru, Uburé Danhib'apito me i'asisaze za'ra wa'aba nhitobzé, tinhimiroti te te aima hiri za'ra wa'aba wamhã.

9Tawamhã Mozési, Arã norĩ me, Nadabe, Abiu, duré 70 na Izaraéu nhihudu nhib'ihâ'a norĩ me ma tô ẽtẽ na sai'uri za'ra. 10Tawamhã ma tô Izaraéu nhihudu norĩ te, 'Re ihâimana u'âsi mono hã 'madâ'â za'ra. Ipara zahâpâmhã ẽtẽ waipo i'uzé safira na iwamri 'manharĩ na waptâzé hã, hâiwa uzé ne hã. 11Tawamhã 'Re ihâimana u'âsi mono hã, Izaraéu nhihudu nhib'ihâ'a norĩ hã te te uprosi õ di. Ta norĩ hã ma tô 'Re ihâimana u'âsi mono hã 'madâ'â za'ra. Taha pari simisutu ma tô duré siré tisa hã tihu. Ma tô duré siré tisa hã simihâri za'ra.

Mozési ẽtẽ nhisi ãma ihâimanazé wasu'u

12Tawamhã Uburé Danhib'apito Mozésihi ma, te tãma tinha ãne:

— Ĩhâimanazéb u, ma'ãpé ẽtẽ na we ĩtẽme sai'uri, ãme aihâimana da. Wa hã ĩnhimirotizém na te irob'ui'érézéb ré ẽtẽ baihâ po hã wa za aima tisõ, ãma dama 're iroti mono zéb da hã.

13Tawamhã Mozési, Zozué tipawapto'wai me ma tô oto sima rob'upsãtã pese zahuré. Tawamhã Mozési hâiba si ma tô ẽtẽ 'rãihâ iwazéb zahi na hã sai'u. 14Mozési ma tô aré dama i'rãnho'õmo norĩ ma hã tãma nharĩ za'ra ãne:

— Ãme asimipari sina aihâimana za'ra wa'aba, we apâ iwanebzéb u, wa norĩ hã. Arã norĩ, Hur me hã te za asiré wa'aba tihâimana zahuré. Tahawa ni'wa marĩ na romreme na da te tãma rowairébé da wamhã, te za õ norĩ ma hã ãwisi ni.

15Tawamhã Mozési, Sina'i na ẽtẽ nhisi na ma tô oto sai'u. Te te sai'uri wamhã, ma tô hâiwa'a ẽne hã suwa. 16Tawamhã Uburé Danhib'apito hâiba na rowa'a iwẽ uptabi hã ma tô ẽtẽ u hã si'ra. Tahawa, 6 bâtâ 're, ma tô hâiwa'a ẽne hã upsi. Duré 7 bâtâ ãma ma tô Uburé Danhib'apito hâiwa'a hawi Mozési hã 'mahâ. 17Izaraéu nhihudu norĩ ma hã, Uburé Danhib'apito hâiba na rowa'a hã uzâ iro'o pese ne, ma te tãma ãma sihâi'ré za'ra, ẽtẽ nhisiwimhã. 18Tawamhã Mozési ẽtẽ na te te sai'uri ré, ma tô oto hâiwa'a wa'wa u hã ãzé. Tahawa, ẽtẽ ãma 40 bâtâ na, duré 40 mara na ma tô tihâiba.

Currently Selected:

Ezodu 24: xavBP

Highlight

Copy

Compare