MARIKA 1
1
Na Vunau nei Joni na Dauveipapitaisotaki
(Maciu 3.1-12; Luke 3.1-18; Joni 1.19-28)
1Na i vakatekivu ni Tukutuku Vinaka kei Jisu Karisito, na Luve ni Kalou 2me vaka sa volai tu ena i vola i Aisea na parofita,#Mala 3.1
“Raica, au sa tala na noqu i talai me liu e matamu,
Ena caramaka o koya na nomu sala.
3Sa kacikaci voli e loma ni vanua lala e dua na domo,
‘Ni caramaka na sala ni Turaga,
Cakava me dodonu na nona gaunisala!’ ”#Aisea 40.3 (LXX)
4A sa basika mai kina o Joni na dauveipapitaisotaki ena vanua lala, ka vunautaka voli me ra papitaiso o ira sa veivutuni me bokoci kina na i valavala ca. 5Era sa qai lako kece vua na vanua o Jutia kei ira mai Jerusalemi; ia ni ra sa vakatusa na nodra i valavala ca sa papitaisotaki ira o koya ena uciwai na Joritani.
6A vakaisulu tu o Joni ena i sulu vuti ni kameli, ka vau na tolona ena i vau kuli-ni-manumanu; a kena kakana na vodre kei na oni ni veikau.#2Tui 1.8 7A vunau voli o koya, ka kaya, “Ena muri au mai e dua ka sa cecere cake sara vei au, ka'u sa rui tawayaga me'u rawa ni bau sereka na wa ni nona i vava. 8Au sa papitaisotaki kemuni ena wai, ia ena papitaisotaki kemuni o koya ena Yalo Tabu.”
Na Papitaisotaki kei na Veretaki i Jisu
(Maciu 3.13—4.11; Luke 3.21-22; 4.1-13)
9Ni sa oti e dua na gauna lekaleka ga, a sa lako mai ko Jisu mai Nasareci ena yasana o Kalili, ka sa papitaisotaki koya o Joni ena uciwai na Joritani. 10Ia ni sa lamata cake tiko mai wai ko Jisu, a sa raica ni sa tadola na lomalagi ka sa lako sobu mai vua na Yalo Tabu me vaka na ruve. 11A sa rogo mai lomalagi e dua na domo, ka vaka, “Sa i iko na Luvequ lomani e duabau ga. Au sa marautaki iko vakalevu.”#Vteki 22.2; Same 2.7; Aisea 42.1; Maciu 3.17; 12.18; Mari 9.7; Luke 3.22
12Sa qai kauti koya sara na Yalo Tabu ki na vanua lala. 13A sa tiko o koya ena vanua lala me 40 na siga, ka sa veretaki koya o Setani. Era a tiko vata kaya talega na manumanu kila, ia era a lako mai na agilosi ka vukei koya.
Na i Tekivu ni Cakacaka i Jisu mai Kalili
(Maciu 4.12-17; Luke 4.14-15)
14Ia ni sa biu oti ki vale ni veivesu o Joni, sa qai lako ko Jisu ki Kalili, ka vunautaka na i Tukutuku Vinaka mai vua na Kalou, 15ka kaya, “Sa qai yaco mai na kena gauna, ka sa voleka na matanitu ni Kalou. Ni veivutuni ka vakabauta na i Tukutuku Vinaka!”#Maciu 3.2
Sa Kaciva e Va na Gonedau ko Jisu
(Maciu 4.18-22; Luke 5.1-11)
16Ia ni sa lako tiko ena baravi mai Kalili ko Jisu sa raici Saimoni sara kei Adriu na tacina ni rau viritaka tiko na lawa ki wai, ka ni rau sa gonedau. 17Sa qai kaya vei rau ko Jisu, “Drau muri au mai, ka'u na vakavulici kemudrau mo drau gonedau ni tamata.” 18E rau sa mani biuta sara na nodrau lawa ka muri koya.
19Ni sa lako vakalailai ki liu o koya, sa raici Jemesa sara na luve i Sepeti, kei Joni na tacina, ni rau sa vakarautaka tiko na nodratou lawa ena nodratou waqa. 20Sa kacivi rau o koya, ka rau sa biuti Sepeti sara na tamadrau kei iratou na tamata cakacaka ka muri koya.
E Dua na Tamata Curumi Yalo Velavela
(Luke 4.31-37)
21E ratou sa qai lako ki Kapenaumi; ia ena Siga ni Vakacecegu sa curu o koya ki na valenilotu ka veivakatavulici kina. 22Era a kurabuitaka na nona i vakavuvuli o ira na vakarorogo, ni sa vakatavulici ira me vaka e dua ka tu vua na lewa, ka sega ni vakataki ira na daunilawa.#Maciu 7.28,29
23Sa qai curu yani kina vakasauri e dua na tamata ka curumi koya tiko e dua na yalo velavala; 24ka kaya vua, “I Jisu na kai Nasareci, a cava o ni via cakava vei keimami? O ni sa mai vakawabokotaki keimami li? Au sa kilai kemuni. Sa i kemuni na Le Dua Yalosavasava ni Kalou!”
25Sa qai vakarota na yalo ko Jisu, ka kaya, “Mo galu! Lako tani mai vua!”
26A sa kureitaki koya vakaukauwa sara na tamata o ya na yalo velavela, a sa qoqolou ena domo levu, ka sa qai biuti koya. 27Era sa kurabui kecega, ka veitarotarogi vakai ira, ka kaya, “Na cava beka oqo? Ai vakavuvuli vou cava beka oqo? Ni o ira sara mada ga na yalo velavela era talairawarawa ki na nona i vakaro!”
28A sa tete sara vakatotolo na i rogorogo kei Jisu ki na veiyasana kecega ka vakavolivoliti Kalili.
Sa Vakabulai Ira na Lewe Vuqa ko Jisu
(Maciu 8.14-17; Luke 4.38-41)
29E ratou sa qai biuta sara na valenilotu ka la'ki curu ki na nodratou vale o Saimoni kei Adriu, ka rau a sala vata kei iratou o Jemesa kei Joni. 30E a davo tiko na tina i wati Saimoni ni tauvi katakata. E ratou sa mani tukuni koya sara vua. 31Sa qai lako sara ko Jisu ka taura na ligana, ka vakaduria cake. A takali vakasauri na katakata; ka sa mai qaravi iratou sara yani o koya.
32Ena yakavi o ya, ni sa la'ki dromu na siga, era sa qai kauta yani vei Jisu na tamata o ira kece na tauvimate kei ira era curumi tevoro. 33Era sa soqoni vata yani na lewe ni koro taucoko ena mata ni katuba. 34A sa veivakabulai ko Jisu vei ira na lewe vuqa ka tauvi ira tu e levu na veimataqali mate, ka vakasavi ira tani e vuqa na tevoro. A sa sega ni vakatara me ra tukuna e dua na ka o ira na tevoro, baleta ni ra kila se o cei o koya.
Sa Vunau ko Jisu mai Kalili
(Luke 4.42-44)
35Ia ena mataka caca ni siga ka tarava a cavutu ko Jisu ka lako ki na dua na vanua lala, ka la'ki masu kina. 36E ratou a qai muri koya o Saimoni kei iratou ka tiko vata kaya. 37Ia ni ratou sa kunei koya e ratou sa kaya vua, “Era sa vakasaqarai kemuni tiko na tamata kecega.”
38Ia sa kaya vei iratou o koya, “Tou lako yani ki na veikoro voleka tale eso, me'u vunau talega kina; ni sai koya oqo na ka au a lako mai kina.”
39A vakalakova o koya na vanua taucoko o Kalili ka vunau ena nodra veivalenilotu ka vakasavi ira na tevoro.#Maciu 4.23; 9.35
Sa Vakasavasavataka e Dua na Vukavuka ko Jisu
(Maciu 8.1-4; Luke 5.12-16)
40A lako vei Jisu e dua na vukavuka, ka tekiduru ka vakamamasu, ka kaya vua, “Kevaka sa lomamuni, sa rawa mo ni vakasavasavataki au.”
41Sa tuburi koya na yalololoma, ka dodoka na ligana ka tara na vukavuka ka kaya vua, “Au sa vinakata; mo savasava mai!” 42A sa takali vakasauri vua na vukavuka, ka sa bula sara o koya. 43Sa qai vakaroti koya vakaukauwa, ka vakatala, 44ka kaya vua, “Qarauna mo kakua ni tukuna e dua na ka vua e dua tale na tamata, ia mo lako ga ka vakaraitaki iko vua na bete, ka vakacabora na i soro sa vakarota o Mosese, me i vakadinadina vei ira na tamata kecega ni o sa vakabulai.”#Vsoro 14.1-32
45Ia ni sa lako na tamata o ya, sa qai la'ki talanoataka sara ka vakateteya na kena i tukutuku, ka sa sega kina ni rawa vei Jisu me curuma ena dua na koro ena matadra na lewe levu. Ia sa la'ki tu voli ga o koya ena vanua vakatikitiki tani eso, ka ra sa lako yani kina vua na tamata mai na veiyasana kecega.
Currently Selected:
MARIKA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.