2 VEIGAUNA 1
1
Kerea na Vuku o Solomoni na Tui
(1Tui 3.1-15)
1A vakataudeitaki koya ena nona matanitu o Solomoni na luve i Tevita, ni sa tiko vata kei koya ko Jiova na nona Kalou, ka sa vakalevulevui koya vakalevu.
2A qai vosa o Solomoni vei ira kece na Isireli, vei ira na turaga vakailesilesi ni yayaudolu kei na yayadrau, kei ira talega na turaga ni lewa, kei ira na i liuliu ni veimatavuvale taucoko, kei ira era sa kena turaga. 3A lako o Solomoni vata kei ira na i soqosoqo taucoko, ki na tikina cecere mai Kipioni ni tiko kina na Vale ni Veitavaki, ni a cakava o Mosese na i talatala ni Kalou mai na vanua lala. 4#2Samu 6.1-17; 1Vei 13.5-14; 15.25—16.1Ia, a kauta cake ki Kiriaci Jiarimi na Kato ni Veiyalayalati o Tevita ki na tikina a vakarautaka o koya me tu kina, me vaka ni a birika o koya e dua na kena valelaca mai Jerusalemi. 5#Lako 38.1-7Ia a koto e kea ena mata ni vale i Jiova na i cabocabonisoro parasa ka a cakava o Bisaleli na luve i Uri tagane. A qarava na Kalou o Solomoni kei ira na lewe ni soqosoqo. 6A cabe cake o Solomoni ki na i cabocabonisoro parasa, ena mata i Jiova ka tu ena Vale ni Veitavaki, ka vakacabora kina e 1,000 na i soro kama.
7Ena bogi o ya, a rairai kina vei Solomoni na Kalou, ka kaya vua, “Mo kerea na ka me'u solia vei iko.” 8A sa kaya o Solomoni vua na Kalou, “O ni sa vakaraitaka na nomuni loloma levu ka tudei vei Tevita na tamaqu, ka o ni sa buli au me'u tui me kena i sosomi. 9#Vteki 13.16; 28.14Ia kemuni Jiova na Kalou, mo ni qai vakayacora na nomuni vosa ni yalayala vei Tevita na tamaqu, ni o ni a buli au me'u tui vei ira era sa lewe vuqa me vaka na kuvu ni soso kei vuravura. 10Mo ni solia mai vei au, na vuku kei na yalomatua me'u veilakoyaki ena kedra maliwa na nomuni tamata; o cei li ena lewai ira rawa na nomuni tamata; ni ra sa rui lewe vuqa sara?” 11A sa kaya vei Solomoni na Kalou, “Ena vuku ni kena sa tiko e lomamu na ka oqo, o a sega ni kerea na veika mo taukena, se na i yau, se na dokai, se me ra mate o ira era cati iko; o qai sega wale mada ga ni kerea mo bula balavu, ia o a qai kerea ga me nomu na vuku kei na yalomatua me rawa kina ni o lewai ira vakavinaka na noqu tamata, ka'u a buli iko kina mo nodra tui, 12au a solia kina vei iko na vuku kei na yalomatua. Au sa na solia talega vei iko na veika mo taukena, kei na i yau, kei na dokai, ka sa sega mada ni rawata taumada e dua na tui sa bula e liu, ena sega talega ni vakakina e dua ena gauna mai muri.”
Na Kaukauwa kei na Vutuniyau i Solomoni
(1Tui 10.26-29)
13Sa qai lesu tale mai o Solomoni mai na vanua cecere mai Kipioni ena mata ni Vale ni Veitavaki, ki Jerusalemi. A sa liutaki ira voli na Isireli mai kea. 14#1Tui 4.26A sa tauyavutaka o Solomoni e dua na nona mataivalu ka lewena e 1,400 na qiqinivalu kei na 12,000 na matasotia vodo ose. O ira oqo a vakatikori ira ena veikoro ni qiqinivalu, ka so era a tiko kei koya na tui mai Jerusalemi. 15Ena dela ni nona veiliutaki, sa ka levu sara na siliva kei na koula e Jerusalemi me vaka na veivatu, ka sa ka levu sara na sitari me vaka na vunilolo. 16#Vrua 17.16A dau volia tiko mai Ijipita#1.16 Se ena vanua o Musuri, e dua na yasa ni vanua mai Silisia; ena tikina e 17 talega. kei Kuei#1.16 Kuei se o Silisia: Oqo e rua na vanua makawa ni susu ose nei Solomoni ka rau toka ena tokalau-cevaceva ni matanitu o Taki ena siga edaidai. na ose eso o Solomoni, ka ra dau tauri qele ni ose mai Kuei na nona dauveivoli na tui ena i sau rawarawa. 17Era a volia e dua na qiqinivalu mai Ijipita, ka kena i sau e 600 na tiki ni siliva; ka kena i sau talega e dua na ose e 150 na tiki ni siliva; era a vakauta talega vakakina vei ira kece na nodra tui na Itaiti, vei ira talega na tui e Siria.
Currently Selected:
2 VEIGAUNA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.