1. NA MASU I ASARIA KEI NA NODRATOU SERE NA TOLU NA CAURAVOU ???? 1
1
Masu i Asaria
1 #
Tani 3.23
Eratou sa qai veilakoyaki e loma ni bukawaqa, ratou lagasere vua na Kalou, ratou vakacerecerea na Turaga. 2Sa qai tu o Asaria, qai kaya dalaga e loma ni bukawaqa:
3“Moni lagilagi saka na Kalou ni neimami qase, e ganita moni vakacaucautaki;
sa vakalagilagi tawamudu na yacamuni,
4nioni sa dau lewa dodonu e na veika kece oni cakava vei keimami,
e mana kece na nomuni cakacaka, dodonu na nomuni ivakarau,
dina na nomuni vakatulewa.
5Oni sa vakatulewa vakadodonu e na veika kece oni vakayacora vei keimami,
vei Jerusalemi tale ga, na nodra koro tabu na neimami qase.
Na nomuni vakatulewa dina dodonu sa yaco kina na leqa qo e na vuku ni neimami ivalavalaca.
6Keimami sa vakanadakui kemuni e na valavalaca kei na basu lawa,
keimami sa cala e na veika kece, beca na nomuni lewa;
7keimami sega ni rokova se muria na ivakaro,
oni a tauca me yaga vei keimami.
8Na ka kece gona oni sa vakayacora vei keimami,
na ka kece oni sa cakava vei keimami,
oni sa cakava e na vakatulewa dodonu.
9Oni sa soli keimami vei ira na meca era tamata kila, tamata sevaki voravora,
vua tale ga na tui dau lewa cala, ca duadua e vuravura taucoko.
10Keimami sa qamu gusu kina;
o keimami na nomuni italai dau qaravi kemuni, sa neimami na madua kei na rogorogo ca.
11E na vuku ni yacamuni, ni kua ni biuti keimami vakadua,
ni kua ni vakaseva na nomuni vosa ni yalayala,
12ni kua ni bureitaka nomuni loloma,
e na vuku i Eparahama na nomuni tamata lomani,
kei Aisake na nomuni italai,
kei Isireli na nomuni tamata yalododonu,
13oni a yalataka vei iratou ni na levu na nodratou kawa
me vaka na kalokalo ni lomalagi kei na nuku ni matasawa.
14Keimami sa matanitu lewe lailai duadua saka,
keimami sa vakalolovirataki tu qo e vuravura taucoko e na vuku ni neimami valavalaca.
15E na gauna qo sa sega na tui, se parofita, se iliuliu,
sa sega na isorokama se isoro se isolisoli se mira
se icabocabonisoro moni bau lomani keimami kina.
16Ia e na neimami yaloveivutuni kei na yalovakarokoroko me keimami ciqomi,
me vaka na isorokama ni tama ni sipi kei na bulumakau se sagavulu na udolu na lami uro;
17me vaka qori na neimami isoro e matamuni nikua.
Me keimami muri kemuni vakatabakidua,
nira na sega ni madua na vakanuinui vei kemuni.
18Qo keimami sa muri kemuni, dokai kemuni,
qara na matamuni e na yalo i keimami taucoko.
19Ni kua ni vakamaduataki keimami,
ni lewai keimami ga e na yalovosota kei na nomuni loloma vuabale.
20Ni sereki keimami saka me ikuri ni nomuni cakacaka qoroi,
moni vakalagilagia kina na yacamuni.
Mera veiwalitaki kece na vakararawataki ira na nomuni italai,
21mera vakamaduataki, me kau tani na nodra lewa,
mera vakamalumalumutaki.
22Mera kila nioni Turaga, na Kalou duabau,
oni lagilagi e vuravura taucoko.”
23O ira na italai ni tui era a cokataki iratou, era bukana tiko ga na ivavi e na waiwai, kuluta, kuli ni kau kei na sagosago. 24Sa tubu kina na yameyame me vasagavulukaciwa na kiupiti e dela ni ivavi, 25sa caudre mai tuba mani vakamai ira na kai Kalidia e yasa ni ivavi. 26#Tb 5.4Ia sa siro mai na yagilosi ni Turaga i loma ni ivavi me tomani Asaria kei rau nona ilala, qai vagolea i tuba na yameyame ni buka, 27qai vakaliwava e loma na cagi viko suasua wakakalu, e mani sega kina ni tarai iratou rawa na yameyame, ratou sega ni bau rarawa se leqa.
Nodratou sere na tolu na cauravou
28Eratou sa qai tabalaka e na domodua na vakacaucautaka, vakalagilagia, vakacerecerea na Kalou e loma ni ivavi, ratou kaya:
29“Moni lagilagi saka na nodra Kalou na neimami qase,
moni vakacaucautaki, moni vakacerecerei tawamudu;
30Me lagilagi na yacamuni tabu cecere,
me vakacaucautaki, me vakacerecerei tawamudu;
31Moni lagilagi e na valenisoro ni nomuni goloria tabu,
moni vakabekabei, moni vakalagilagi tawamudu.
32Moni lagilagi o kemuni oni dabe e deladra na jerupi oni rai sobu i bulu,
moni vakacaucautaki, moni vakacerecerei tawamudu.
33Moni lagilagi o kemuni oni dabe e na idabedabe ni nomuni matanitu,
moni vakabekabei, moni vakacerecerei tawamudu.
34Moni lagilagi e na doka i lomalagi, moni seretaki,
moni vakalagilagi tawamudu.
35“Ra ibulibuli kece ni Turaga, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
36Ra lomalagi, vakacaucautaka na Turaga,
vakalagilagi koya e na sere, vakacerecerei koya tawamudu.
37Ra yagilosi ni Turaga, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
38Ra wai taucoko e doka i lomalagi, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
39Ra kaukaua kece, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
40Ra matanisiga kei Ra vula, drau vakacaucautaka na Turaga,
drau vakalagilagi koya e na sere, drau vakacerecerei koya tawamudu.
41Ra kalokalo ni lomalagi, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
42Ra uca kei Ra tegu kece, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
43Ra cagi kece, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
44Ra bukawaqa kei Ra katakata, drau vakacaucautaka na Turaga,
drau vakalagilagi koya e na sere, drau vakacerecerei koya tawamudu.
45Ra batabata kei Ra todra ni siga, drau vakacaucautaka na Turaga,
drau vakalagilagi koya e na sere, drau vakacerecerei koya tawamudu.
46Ra tegu vuka kei Ra uca cevata, drau vakacaucautaka na Turaga,
drau vakalagilagi koya e na sere, drau vakacerecerei koya tawamudu.
47Ra bogi kei Ra siga, drau vakacaucautaka na Turaga,
drau vakalagilagi koya e na sere, drau vakacerecerei koya tawamudu.
48Ra rarama kei Ra buto, drau vakacaucautaka na Turaga,
drau vakalagilagi koya e na sere, drau vakacerecerei koya tawamudu.
49Ra waicevata kei Ra liliwa, drau vakacaucautaka na Turaga,
drau vakalagilagi koya e na sere, drau vakacerecerei koya tawamudu.
50Ra tegu cevata kei Ra uca cevata, drau vakacaucautaka na Turaga;
drau vakalagilagi koya e na sere, drau vakacerecerei koya tawamudu.
51Ra liva kei Ra o, drau vakacaucautaka na Turaga;
drau vakalagilagi koya e na sere, drau vakacerecerei koya tawamudu.
52“Me vakacaucautaka na Turaga na vuravura,
vakalagilagi koya e na sere, vakacerecerei koya tawamudu.
53Ra ulunivanua kei Ra delana, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
54Ra veikau kece e dela i vuravura, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
55Ra mataniwai, ni vakacaucautaka na Turaga;
ni vakalagilagi koya e na sere, ni vakacerecerei koya tawamudu.
56Ra wasawasa kei Ra uciwai, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
57Ra tovuto kei Ra ika kece ni wasawasa, ni vakacaucautaka na Turaga,
ni vakalagilagi koya e na sere, ni vakacerecerei koya me tawamudu.
58Ra manumanuvuka, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
59Ra manumanu kila kei Ra manumanu manoa, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
60“I kemuni na kawatamata, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
61I Isireli, vakacaucautaka na Turaga,
vakalagilagi koya e na sere, vakacerecerei koya tawamudu.
62Ra bete ni Turaga, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
63Ra italai ni Turaga, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
64Ra lomadra kei Ra yalodra na yalododonu, ni vakacaucautaka na Turaga,
ni vakalagilagi koya e na sere, ni vakacerecerei koya tawamudu.
65I kemuni na yalosavasava kei na yalomalua, ni vakacaucautaka na Turaga;
ni vakalagilagi koya e na sere, ni vakacerecerei koya tawamudu.
66I Anania, Asaria kei Misaele, tou vakacaucautaka na Turaga,
tou vakalagilagi koya e na sere, tou vakacerecerei koya tawamudu,
ni sa vakabulai kedatou mai Etesi,
maroroi kedatou mai na liga ni mate
sereki kedatou mai na loma ni ivavi katakata,
qai taqomaki kedatou mai na loma ni bukawaqa.
67Tou vakavinavinaka vua na Turaga, ni vinaka o koya,
e tawamudu na nona loloma.
68Ni vakalagilagi koya o kemuni kece na qarava na Turaga, nodra Kalou na kalou,
ni vakalagilagi koya e na sere,
ni vakavinavinaka vua, ni tawamudu na nona loloma.”
Currently Selected:
1. NA MASU I ASARIA KEI NA NODRATOU SERE NA TOLU NA CAURAVOU ???? 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.