Josua 1
1
Vakaroti Josua o Jiova
1Ni sa mate na tamata ni Kalou o Mosese, sa qai vosa o Jiova vei Josua na luve i Nuni, na i vukevuke i Mosese, ka tukuna, 2“Sa mate o Mosese na noqu tamata. Mo tu vakarau, o iko kei ira kece na Isireli mo ni takosova na Uciwai na Joritani ka lako ki na vanua au na solia vei ira. 3Me vaka na ka au a tukuna vei Mosese, au na solia vei kemuni na vanua kece ena butuka na qeteqete ni yavamuni.#Vrua 11.24-25 4Na i yalayala ni nomuni vanua e tekivu mai na vanua lala ena ceva ki na veiulunivanua o Lepanoni ena vualiku. Mai na uciwai levu na Uferetisi ena tokalau, ka takosova na nodra vanua na Itaiti me yaco ki na Wasa Meditereni ena yasana ki na ra. 5I Josua, ena sega ni rawa vua e dua me vakadrukai iko ena veisiga kecega o bula kina. Au na tiko ga kei iko me vaka au a dau tiko kei Mosese ka'u na sega ni laivi iko.#Vrua 31.6,8; Ipe 13.5 6Mo kaukauwa ka qaqa, ka la'ki taukena na vanua au a yalataka me'u solia vei ira na nodra qase.#Vrua 31.6,7,23 7Mo kaukauwa ka yaloqaqa. Qarauna mo talairawarawa ki na noqu Lawa kece sara sa vakarota vei iko na noqu tamata o Mosese. Kakua ni vakawaletaka e dua na tikina, o na qai tamata yaco ena vanua ga o lako kina. 8Mo nanuma mo dau wilika na i vola ni Lawa ena veigauna kecega ni sokalou. Mo wilika ka vakananuma ena veisiga kei na veibogi kece, ka cakava na veika kece sara sa volai kina, o na qai kalougata ka tamata rawa ka. 9Mo nanuma na noqu i vakaro, ‘Mo kaukauwa ka qaqa!’ Mo kakua ni rere se yalolailai, ni na tiko vata kei iko o Jiova na nomu Kalou ena vanua kecega o na lako kina.”
Vakaroti Ira na Tamata o Josua
10Sa qai vakaroti ira na nodra i vakalesilesi na tamata o Josua, 11me ra lako yani ki loma ni keba ka tukuna vei ira na tamata, “Mo ni vakarautaka na kemuni kakana ni o ni sa na kosova na uciwai na Joritani ni oti e tolu na siga me la'ki taukeni na vanua sa solia vei kemuni o Jiova na nomuni Kalou.”
12A qai tukuna o Josua vei ira na mataqali i Rupeni, kei na mataqali i Kata kei na veimama ni mataqali i Manasa,#Tiko 32.28-32; Vrua 3.18-20; Josua 22.1-6 13“Mo ni nanuma na vosa ka vakaroti kemuni kina na tamata ni Kalou o Mosese: ‘O Jiova na nomuni Kalou sa solia vei kemuni na vakacegu kei na vanua oqo, mo ni vakaitikotiko kina.’ 14Me ra tiko ga ena tokalau ni Joritani, ena vanua ka sa solia vei kemuni o Mosese o ira na watimuni, na luvemuni, kei ira na nomuni manumanu. Ia o ira na nomuni sotia me ra vakaiyaragi ni vala, ka liutaki ira yani na vo ni veimataqali ni Isireli. Ia mo ni vukei ira na wekamuni 15me yacova sara ni ra sa taukena na vanua ena tai kadua ni Joritani, na vanua sa solia o Jiova na nomuni Kalou. Ni sa solia vei ira kecega na veimataqali i Isireli o Jiova me ra tiko vinaka ka vakacegu mai na i valu, mo ni qai lesu tale mai ki na tai oqo ni Joritani na vanua ka solia vei kemuni o Mosese na tamata ni Kalou.”
16Era sa qai tukuna vei Josua, “Keimami na vakayacora na veika kece o ni sa vakaroti keimami kina, ka lako talega ki na veivanua o ni na talai keimami kina. 17Keimami na vakarorogo ki na nomu lewa, me vaka keimami sa dau vakarorogo vei Mosese. ‘Me tiko ga vei kemuni Josua o Jiova na nomu Kalou, me vaka sa dau tiko kei Mosese! 18Na tamata e taroga na nomu veiliutaki, se talaidredre ki na nomu i vakaro ena vakamatei. Mo kaukauwa ka tu dei!”
Currently Selected:
Josua 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.