Joeli 1
1
1Oqo na vosa i Jiova vei Joeli na luve i Pecueli.
Era Tagicaka na Tamata na Vakacacani ni Teitei
2Dou rogoca oqo, oi kemudou na qase,
Ka vakatudaliga na lewenivanua kecega!
A sa yaco beka e dua na ka vakaoqo
Ena nomudou gauna?
Se na nodra gauna na nomudou qase?
3Dou tukuna vei ira na luvemudou;
Ka me ra tukuna o ira na luvemudou
Vei ira na luvedra;
Kei na luvedra me ra qai tukuna
Ki na i tabatamata e tarava yani.
4A ka sa vakavoca na vodre dauquru,
Sa kania na vodre dina,
A ka sa vakavoca na vodre dina,
Sa kania na vodre dramidrami.
A ka sa vakavoca na vodre dramidrami,
Sa kania na kena yavato.
5Dou yadra ka tagi, na daumateni;
Dou qoqolou, na daugunu waini;
Na qerepi me qaqi baleta na waini vou
Sa vakacacani.
6 #
Vtaki 9.8
Sa lako mai e dua na matanitu
Ka sa kaba na noqu vanua;
Sa kaukauwa ka sega ni wiliki rawa;
Sa gagata sara na batidra
Me vaka na bati ni laione.
7A sa vakarusa na noqu veivaini,
Ka sa kania na noqu vunilolo.
A sa vocia tani na kulidra
Ka kolotaka sobu ki ra.
Sa vuki me vulavula na tabadra.
8Mo tagi me vaka e dua na goneyalewa
Sa sulumaka na taga ena vakalolokutaki
Vua na tagane sa dodonu me rau vakamau.
9Sa muduki mai na vale i Jiova
Na i madrali laukana kei na i madrali liviraki;
Era sa tagi na bete,
Na i talatala i Jiova.
10Sa dravuisiga na veivanua,
Sa tagi ni vakaloloku na qele
Baleta ni sa vakacacani na sila.
Sa mamaca vakadua na waini,
Ka sa malai na vuniolive.
11Dou yalorarawa, na dauteitei;
Dou tagi na dausasamaki ni veivaini
Baleta ni sa vakarusai na witi kei na barile
Io, sa vakarusai na vuata kece ni vanua.
12Sa malai na vunivaini,
Ka raqosa na vunilolo.
Na pomekaraneti, niusawa kei na apolo —
Io, na kau kecega ni vanua sa malai;
Sa yali vakakina na reki vei ira na tamata.
13Dou vakaisulu taga na bete ka tagi
Oi kemudou na bete dauvakacaboisoro!
Dou curu ki loma ni Valenisoro
Ka vakaloloku ena bogi taucoko!
Sa sega sara na sila se na waini
Me i madrali vua na nomudou Kalou.
14Dou vakatabuya e dua na siga
Me ia kina na lolo;
Dou vakasoqoni ira vata mai
Na lewenivanua e Juta
Ki na vale i Jiova na nomudou Kalou
Ka tagi ki vua.
15 #
Aisea 13.6
Oilei na siga o ya!
Ni sa voleka mai na siga ni Turaga,
Na siga ni veivakarusai ni Kalou kaukauwa.
16Sa sega li ni muduki vei keda
Mai na vale ni noda Kalou
Na keda kakana
Kei na marau vata na reki?
17Sa vuca na sorenikau
E loma ni qana;
Sa sega na sila me maroroi
Ka sa rusa na kena lololo.
18Sa tagi ena vutugu na manumanu!
Era kidroa na qele ni bulumakau
Ni sa sega na vanua veico;
Era sa vakaloloma talega
O ira na qele ni sipi.
19Au sa tagi vei kemuni na Kalou
Ni sa kania na bukawaqa
Na veico kei na veikau,
Ka sa vakama na yameyame
Na veivunikau kecega ni vanua.
20Era sa tagi talega yani kemuni
Na manumanu kila
Baleta ni sa maca na veiwaidrodro;
Ka sa vakarusa na veico kei na veikau
Na yameyame ni buka.
Currently Selected:
Joeli 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.