Maciu 1
FNVDC12

Maciu 1

1
Na i Vola ni Kawa i Jisu Karisito
(Luke 3.23-38)
1Na i vola ni kawa i Jisu Karisito, na luve i Tevita, na luve i Epara-ama.
2E tama i Aisake o Epara-ama, ka tama i Jekope o Aisake, ka tama i Juta kei iratou na tuakana kei iratou na tacina o Jekope, 3e tama i Veresi kei Sera o Juta, ka tinadrau o Tema, ka tama i Eseroma o Veresi, ka tama i Erami o Eseroma, 4ka tama i Amenatave o Erami, ka tama i Nasoni o Amenatave, ka tama i Salimoni o Nasoni, 5ka tama i Poasa o Salimoni, ka tinana o Reapi, ka tama i Opeti o Poasa, ka tinana o Ruci, ka tama i Jese o Opeti, 6ka tama i Tevita na tui o Jese.
E tama i Solomoni o Tevita na tui, ka tinana na wati Uraia, 7ka tama i Reopoama o Solomoni, ka tama i Apaijia o Reopoama, ka tama i Asa o Apaijia, 8ka tama i Josefata o Asa, ka tama i Jorame o Josefata, ka tama i Usaia o Jorame, 9ka tama i Jocami o Usaia, ka tama i Aasi o Jocami, ka tama i Esekaia o Aasi, 10ka tama i Manasa o Esekaia, ka tama i Emoni o Manasa, ka tama i Josaia o Emoni, 11ka tama i Jekonaia kei iratou na tuakana kei iratou na tacina o Josaia, donuya na gauna ni nodra kau yani ki Papiloni.#2Tui 24.14,15; 2Vei 36.10; Jere 27.20
12Ia ni ra sa kau ki Papiloni sa qai sucu o Salacieli na luve i Jekonaia, ka tama i Serupepeli o Salacieli, 13ka tama i Apiuta o Serupepeli, ka tama i Elaiakimi o Apiuta, ka tama i Asori o Elaiakimi, 14ka tama i Setoki o Asori, ka tama i Akeimi o Setoki, ka tama i Iliuta o Akeimi, 15ka tama i Iliasa o Iliuta, ka tama i Matani o Iliasa, ka tama i Jekope o Matani, 16ka sai Jekope na tama i Iosefo na wati Maria, ka a sucu mai vua o Jisu, o koya ka vakatokai na Mesaia.
17O koya oqo, sa tinikava taucoko kina na i tabatamata mai vei Epara-ama kivei Tevita, ka tinikava na i tabatamata mai vei Tevita ki na gauna ni tiko vakabobula mai Papiloni, ka tinikava na i tabatamata ni oti na gauna o ya ki na sucu ni Mesaia.
Na Sucu i Jisu Karisito
(Luke 2.1-7)
18Sa vakaoqo na sucu i Jisu Karisito. A sa musuki o Maria na tinana vei Iosefo, ia ni se bera ni rau vakawati, a sa votu na nona bukete mai vua na Yalo Tabu.#Luke 1.27 19Ia o Iosefo, ena nona yalododonu, a sa sega ni vinakata me vakamadualaki Maria, ka sa mani lomana kina me sa tamusuka lo ga na nodrau veimusumusuki. 20Ia ni sa vakananuma tiko o koya na ka oqo, sa qai rairai vua ena tadra e dua na agilosi ni Turaga, ka kaya, “I Iosefo na luve i Tevita, kakua ni rere ni tauri Maria me watimu, ni sa mai vua na Yalo Tabu na gone sa kunekunetaka. 21Ena vakasucuma o koya e dua na gonetagane, ka mo vakayacani koya o Jisu, ni sai koya ena vakabulai ira na nona tamata mai na nodra i valavala ca.”#Luke 1.31
22A sa yaco na ka kecega oqo me vakayacori kina na vosa ni Turaga, ka a tukuna na parofita:
23“Raica, ena bukete e dua na goneyalewa ka na vakasucuma e dua na gonetagane,
Ka na vakayacani o Imanueli,”
a kena i balebale, “Na Kalou sa tiko vata kei keda.”#Aisea 7.14 (LXX)
24Ni sa yadra mai na moce o Iosefo, sa vakayacora sara na ka sa vakarota vua na agilosi ni Turaga; ka sa tauri Maria me watina. 25Ia e rau sa sega ni veiyacovi, ka yacova ni sa vakasucuma oti o Maria na luvena tagane. A sa vakayacana na gone o Iosefo me o Jisu.#Luke 2.21

Fijian New Version including Deuterocanonical Books © Bible Society of the South Pacific, 2012.


Learn More About Vakavakadewa Vou kei na iVola tale eso

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.