2 Tui 1
1
O Ilaijia kei Tui Esaia
1Ni sa mate oti o Eapi na tui Isireli, era a qai vuki tani na kai Moapi ka bese ni qaravi ira na Isireli.
2A sa lutu o Esaia na tui Isireli mai na varada ni nona delavuvu ni vale vakatui ka mavoa sara vakaca. A sa mani tala yani kina eso na tamata me ra la'ki vakataroga mada na kalou ni koro levu o Ekironi mai Filisitia, o Pealisipupi na yacana, ka me kilai rawa mada kina se na bula tale mai na nona mavoa bibi oqo se segai. 3Ia, na agilosi i Jiova sa vakaroti Ilaijia na parofita mai Tisipa me la'ki sotavi iratou na i talaki nei tui Esaia ka me tarogi iratou, “A cava na vuna dou sa via la'ki vakatarogi Pealisipupi kina, o koya na kalou ni Ekironi? E vuna beka li oqo ni dou sa nanuma ni sa sega tale na kalou e Isireli? 4Dou la'ki tukuna vua na tui ni sa kaya vakaoqo o Jiova, ‘O na sega tale ni qai bula mai na nomu mavoa bibi; ia o na mate vakaidina ga!’ ” A sa vakayacora vakakina o Ilaijia.
5E ratou sa qai lesu tale vua na tui na i talaki, ka sa tarogi iratou o koya, “A cava dou sa lesu tale mai kina?”
6E ratou sa kaya vua, “Sa lako cake mai e dua na tamata me tavaki keitou, ka sa kaya me keitou mai vakadewataka ni sa vosa vakaoqo o Jiova vei kemuni na tui, ‘Sa sega li na Kalou e Isireli? A cava na vuna o sa talatala kina me la'ki tarogi o Pealisipupi na kalou ni Ekironi? Ena ka oqo, o na sega ni bula cake tale kina mai na nomu mavoa bibi; ia o na mate vakaidina ga!’ ”
7A sa taroga na tui vei iratou, “A tamata vakacava e mai tavaki kemudou, ka kaya kina na vosa oqo?”
8E ratou sa sauma vua, “E vakaisulu o koya ena i sulu vutika ni manumanu, ka vau e tolona na beleti kuli-ni-manumanu.”#Maciu 3.4; Mari 1.6
A sa kaya na tui, “Oqori o Ilaijia na kai Tisipa!”
9A sa qai tala na tui e dua na nona kavetani vata kei ira na nona matasotia era lewe limasagavulu. E a sotavi Ilaijia o koya ni dabe toka ena dua na delana, ka kaya vua, “O iko na tamata ni Kalou, sa kaya na tui mo lako sobu mai.”
10A qai sauma o Ilaijia vua na kavetani ni lewe limasagavulu, ka kaya, “Kevaka ka'u sa tamata ni Kalou, me lako sobu mai lomalagi na bukawaqa me kani iko kei ira na nomu tamata e lewe limasagavulu!” A vakasauri ni sa lako sobu mai lomalagi na bukawaqa, ka vakamatei koya na kavetani kei na nona tamata e lewe limasagavulu.#Luke 9.54
11A sa tala tale na tui vei Ilaijia e dua na kavetani vata kei ira e lewe limasagavulu na nona tamata. A lako cake o koya ka kaya vua, “O iko na tamata ni Kalou, sa vakarota na tui mo lako sobu mai vakatotolo!”
12A qai vosa o Ilaijia, ka kaya vei ira, “Kevaka ka'u sa tamata ni Kalou, me lako sobu mai lomalagi na bukawaqa, ka kani iko kei ira na nomu tamata e lewe limasagavulu!” A sa qai lako sobu mai na bukawaqa ni Kalou mai lomalagi, ka vakamatei koya na kavetani kei na nona tamata era lewe limasagavulu.
13A qai tala tale na tui e dua na kavetani vata kei ira e lewe limasagavulu na nona tamata. A lako cake na i katolu ni kavetani ni lewe limasagavulu, ka la'ki tekiduru ena mata i Ilaijia, ka vakamamasu vua, ka kaya, “Oi kemuni na tamata ni Kalou, au masuti kemuni mo ni yalololoma vei au kei ira na noqu tamata era lewe limasagavulu oqo! 14Raica, sa lako sobu mai lomalagi na bukawaqa, ka kani rau na kavetani ni lewe limasagavulu e rau a liu mai kei ira na nodrau tamata; ia oqo, au sa kerea vakabibi mo ni yalololoma vei au!”
15A vosa vei Ilaijia na agilosi i Jiova, ka kaya, “Mo drau lako sobu kaya vua na tui, ka kakua ni rerevaki koya.” A sa lako sobu vata kaya na kavetani vua na tui o Ilaijia. 16A sa tukuna vua na tui, “Sai koya oqo na vosa i Jiova: ‘Ena vuku ni nomu a talai iratou na talaki me tarogi Pealisipupi na kalou ni Ekironi, e kena i balebale li oqori ni sa sega na Kalou e Isireli me la'ki tarogi kina na nona vosa? O koya oqo, o na sega kina ni na bula tale mai na i mocemoce o davo koto kina oqori, ia o na mate dina ga.’ ”
17A sa mate o Esaia me vaka na vosa i Jiova ka a cavuta o Ilaijia. A sa tui o Jorami na tacina baleta ni sa sega na luve i Esaia tagane. E a veisosomitaki o Jorami me tui ena i karua ni yabaki i Jiorami na luve i Josefati, na tui Juta.
18Me baleta na vo ni veika kece sara sa vakayacora o Esaia na tui, era sega li ni volai oqo ena i Vola na Kedra i Volatukutuku na Tui kei Isireli?
Currently Selected:
2 Tui 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.