Hebreos 4

1Jaskara iken, jabé tantii kati noa Diossen yoini japariketian, koiranmeenon akanwe, mato jatíribibora jabé iamanake.

2Jabaon akáni keskáakinribira, nonribi ja jakon joi yoikanai ninkata iki, ikaxbi ja ninkákanatonra, jawe jato akinyamaa iki, ja joi ikonhayamakanai kopí.

3Ikaxbi ja ikonhaax, noa jaki koshiabora, jain tantiti netenko noa jikinoxikanai. Ja yoii iki iki Dios neskati:

“Eara sinatax ikonkon neskata iki:

matora jawetianbi jikitima iki, ja en mato jain tantimatinko”, iki.

Ikon riki, ja nato nete jonianontianbi, jawen tee moa Diossen senenhaa iká,

4jatian wetsankora ikai, ja kanchis nete yoii Wishá meran neskati:

“Ja kanchis nete itinra, jatíbi jawen teebo senenhayontaanan, Dios tantia iki”, iki.#Gn. 2.2

5Jatianra nato Wishá meran jakiribi yoiribiai:

“Matora jawetianbi jikitima iki, ja en mato tantimati mainko”, iki.

6Ikaxbira maxkáparike, ja jain tantitiain jatíribibo weíkanti. Jatian ja jatonpari ja jakon joi ninkatabora jikiamakana iki, jatonbinix yoitimatax.

7Jaskara kopíra, jakiribi noa Diossen westíora nete meniribia iki, ja riki “rama netebi”, jara moa basi winóni pekáopari, Davidkan yoia iki, ja Wishá meran non yoiwana keskáakin:

“Rama netebi mato Diossen yoiai ninkáxon, maton jointibo chorishayamakanwe”, akin.

8Jatian ja israelbo Josuékan jato tantimani iketianra, wetsa netebo moa Diossen, yoiamakeana iki,

9Jaskara ikenra ja Diossen jonibo, jakonax jain tantii bokantipari jareske,

10jaweratoboki ja Diossen noa tantimati ikainko jikiai, jabora jawen teeainoax moa tantiai, jawen teebo ayontaanan, Dios tantini keskatiribi.

11Ja jain noa Diossen tantimati ikainko jikinoxkaya, koshinon akanwe, jaskatax ja ikonhayamaibo ikáni keskatiribi, tsoabi ikantima kopí.

12Ja Diossen joi riki, jan jatia itan atipana koshia, ja riki, okenbekonbi kenshoya espada winoa kikinbires xatemis, jara jikiai, ja kaya meran itan shinan rebo ikain kamanbi, jainoax ja chichó joni meran iká jawékibo kamanbi. Jainxonra, ja non shinanbo itan non ati shinannaibo jishtiakai.

13Jatíbi ja Diossen joniani jawékibora, já bebon joné iti atipanyamake, jaweara jatíbi jishtibires iki. Jara anoxiki, jatíbi ja non akábo non yoipakekin.

Jesús iki Sacerdotebaon Koshi

14Ja Diossen Bake Jesús riki, non ani Sacerdotebaon Koshi, jara naikan kaa iki. Jaskara kopíra, ja ikonhaa ikax, jaki koshii noa jeneti yamake.

15Ja non Sacerdotebaon Koshinra, non atipanyamaa onanxon, noa akinti atipanke, ja noa ikai keskatiribi jápari tanakaatibo winota ixon, jaskarabo winotibira ja jawetianbi ochayamaa iki.

16Jaskara iken, noa jan noia Dioskaya rakétanma benanon akanwe, jaskáaxon ja noa iorai maxkatatianshaman, jawen jakon shinanman noa jan akinti kopí.

Currently Selected:

Hebreos 4: shp

Highlight

Copy

Compare