Juan 14
14
Jesús näni kashqan
1<<Ama lakikuyaysu. Tayta Diosmanpis y noqamanpis yärakayämuy. 2Taytäpa wayinchöqa askami cuartukuna kaykan. Sayno mana kaptinqa manami <qamkunapaq cuartu kamarikuq aywashaq> nïmansu karqan. 3Kamariskamurnami qamkunata pushanäpaq kutimushaq. Saynöpami noqa kashqä kaqcho qamkunapis kayanki. 4Musyayankimi mayqan nänipa sayman chäyänaykipaq kashqantapis>>.
5Sayno niptinmi Tomás nirqan: <<Taytay, mayman aywanaykipaq kashqantapis mana musyaykarqa ¿imanöpataq nänitapis reqiyäshaq?>>
6Saymi Jesús nirqan: <<Noqami näni kaykä, rasun kaqmi kaykä y runakunata kawayta qoqmi kaykä. Noqata mana chaskikamarqa Taytä kaqman manami pipis chanqasu.#Mat. 11.27; Juan 1.18; 6.46; Hech. 4.12. 7Noqata reqimarqa Taytätapis reqiyankimi. Saymi kananpitaqa rikashna kar reqiyankina>>.
8Felipinami nirqan: <<Tayta Diosta reqiykasilämay, Taytay. Reqisimaptikiqa mananami tapushaykinasu>>.
9Saymi Jesús nirqan: <<Felipe, nawpapitana qamkunawan kaykaptï ¿manaku reqimankiraq? Noqata reqimaq kaqqa Taytätapis reqinmi. Reqiykämarqa ¿imanirtaq: <Taytaykita reqisimay> nimanki? 10¿Manaku criyinki Taytäwan juklayla kaykashqäta y Taytäpis noqawan juklayla kaykashqanta? Saymi qamkunata nishqäkuna kikïpa cuentaläpitasu kaykan, sinöqa noqacho kaykaq Taytäpitami. Paymi munashqanta noqawan ruran. 11Taytäwan juklayla kaykashqäta y paypis noqawan juklayla kaykashqanta nikaptïqa criyiyämankiman. Nishqäkunata mana criyiyämashpaykipis milagru rurashqäkunata rikaykarqa criyiyämay.
12<<Rasunpami nï: Taytä kaqman aywakuptï noqaman yärakamaqkuna noqa rurashqänömi rurayanqa. Mas espantaypaq kaqkunatapis rurayanqami. 13Noqapa jutïcho imatapis Taytäta manakuyaptikiqa rurashaqmi. Surin karmi sayno rurashaq Taytä alabash kananpaq. 14Jutïcho imatapis manakuyaptiki manakayämashqaykita rurashaqmi.#Mat. 7.7-11; Luc. 11.9-13; Juan 15.7, 16; 16.23-24; 1Juan 3.21-22; 5.14-15.
Espíritu Santuta kachamunanpaq Jesús nishqan
15<<Noqata kuyamarqa lapan mandamientükunata cäsukuyay.#Deut. 6.4-9; 11.1. 16Tayta Diosta ruwakuptïmi juk Yanapäkuqta kachamunqa. Paymi imayyaqpis qamkunawan kaykanqa. 17Payqa rasun kaqta tantiyasikuq Espíritu Santumi kaykan. Tayta Diosta mana cäsukuqkunaqa Espíritu Santutapis manami chaskikuyanqasu. Sayno chaskikuyanqasu payta mana ashir y payta mana reqirmi. Qamkunami isanqa reqiyanki qamkunawan kaykaptin y qamkunacho kananpaq kaptin.
18<<Qamkunata manami waksata kachaykuyäshaykisu, sinöqa kutimushaqmi. 19Manapis aykälatanami runakuna rikayämanqanasu. Qamkunami isanqa rikayämankipaq. Noqa kawashqäpitami qamkunapis kawayanki. 20Say junaqmi tantiyayanki Taytächo noqa kaykashqäta, noqacho qamkuna kaykäyashqaykita y qamkunacho noqa kaykashqätapis. 21Mandamientükunata cumpliq kaqmi rasunpaypaqa kuyaman. Kuyamaq kaqtaqa Taytäpis kuyanmi. Noqapis kuyarmi paywan kaykäshaq>>.
22Mana Iscariote kaq Judasnami tapur nirqan: <<Taytay, noqakunawan kaykarqa ¿imanirtaq wakin runakunawanpis kankisu?>>
23Saymi Jesús nirqan: <<Pipis kuyamarqa nishqäkunata cäsukunmi. Kuyamaq kaqtaqa Taytäpis kuyanmi. Saymi Taytäwan shamur imayyaqpis paywan kaykäshaq. 24Mana kuyamaq kaqqa nishqäkunata manami cäsukunsu. Noqa nishqäkuna manami kikïpa yarpaynïpitasu kaykan, sinöqa kachamaqnï Taytäpitami.
25<<Lapan kaykunata nikä qamkunawan kaykashqäyaqmi. 26Aywakuptïnami noqapa trukä Yanapäkuq Espíritu Santuta qamkunaman Taytä kachamunqa. Paymi lapanta yachasiyäshunki y lapan yachasishqäkunata yarpäsiyäshunki.
27<<Jawka kawaytami qamkunata kachapaykü. Ali kawaynïtami qamkunata qoykü. Noqa yanapashqäno manami pipis yanapäyäshunkisu. Ama lakikuyaysu ni mansakäyaysu. 28Qamkunata nishkänami aywakurpis kutimunäpaq kashqanta. Taytä kaqman aywakuptï ama lakikuyankisu. Payqa noqapita mas munayyuqmi kaykan. Rasunpaypa kuyayämarqa lakikuyänaykipa trukan kushikuyankimanmi. 29Qamkunata sayno wilapaykä manaraq aywakurmi. Aywakuptïnami musyayanki nishqäkuna rasunpaypa kashqanta.
30<<Kay pasapa mandaqnin shamuykannami.#14.30 Kay pasapa mandaqninpaq parlarqa Satanáspaqmi Jesús parlarqan. Saymi qamkunawan aläpaqa parlashaqnasu. Wanusimänanpaqqa manami paypa munaynin kansu. 31Sayno kaptinpis Taytä nimashqanta rurarmi wanusimänanpaq kachapäshaq. Saynöpami runakuna musyayanqa Taytäta kuyashqäta. ¡Sharkuyay, kaypita jukla aywakushun!>>
Currently Selected:
Juan 14: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.