Sofonías 3
3
Jerusalén runakunata castigananpaq nishqan
1¡Mana wiyakuq Jerusalén runakuna, lakipaypaqmi ushakäyanki!
Qamkunaqa fiyupa jusasapami kaykäyanki.
Pïmaytapis nakasiyänaykipaq mamalan wachashqami kaykäyanki.
2Qamkunaqa pï wilapäyäshuptikipis manami chaskikuyankisu.
Corrigiyäshuptikipis manami cäsukuyankisu.
Tayta Diosmanpis manami yärakuyankisu.
Payta manami manakuylapis manakuyankisu.
3Mikanaypita qaparaykaq leonkunanömi autoridänikikunapis kaykäyan.
Tulutapis mana kachariq malaqash atuqkunanömi jueznikikunapis kaykäyan.
4Profëtaykikunapis mana respitakuq y engañakuqmi kaykäyan.
Cüraykikunapis sagrädu templutami impüruyäsiyan.#3.4 Templuta impüruyäsin Tayta Dios prohibishqanta saycho rurarmi. Saypita masta musyanaykipaq liyinki Lev. 20.3; 21.12; Núm. 19.13, 20.
Tayta Diospa leyninkunatapis manami cumpliyansu.
5Sayno kayaptinpis Tayta Diosqa imaypis Jerusalénchömi kaykan.
Payqa manami imatapis lutankunataqa ruransu.
Cada tutami tantiyasimansi alilata ruraq kashqanta.
Sayno kaptinpis jusalikuq runakunaqa lutanta rurar manami penqakuyansu.
6Tayta Diosmi nin:
<<Aska nacionkunatami ushakäsishkä.
Törrinkunatapis juchusirmi ushakäsishkä.
Pipis mana puriptinmi cällinkunapis sunyaraykan.
Markankunapis lapanmi ushakash.
Saychöqa manami pipis tannasu.
7Saymi kayno yarparqä:
<Say nacionkunata ushakäsishqäta rikakurmi Jerusaléncho taq runakuna mansapakamar lutan ruraykunata kachariyanqa.
Cäsukayämaptinqa paykunata manami ushakäsishaqsu>.
Sayno yarpaptïpis paykunaqa jusalikuyman churakashqami kaykäyan>>.
8Saymi Tayta Dios nin:
<<¡Shuyaykuyay hïju!
Juzganä junaq imay karpis chämunqami.
Fiyupa rabyanäsiyämashqanpitami lapan nacionkunata shuntaykur castigashaq.
Nina imaykatapis liptaypa rupar ushaqnömi kay pasacho taqkunata lapanta ushakäsishaq>>.
Runakunata salvananpaq Tayta Dios promitishqan
9<<Nirkurnami maysaycho taq runakunata tantiyasishaq jutïta joqarir alabayämänanpaq.
Saynöpami shumaq wilanakur juk shonqula sirviyämanqa.
10Mas karucho taq runakunapis yanapänäpaqmi manakayämanqa.
Say runakunaqa Etiopía nacioncho kaykaq mayukunapita mas karuchömi taykäyan.
Saypita pasami ofrendankunata noqapaq apayämunqa.
11Say wisanmi jusalikur kushikuqkunata qamkunapita qarqushaq.
Sagrädu lömächo manami ali chölu tukuyanqanasu.
Mana jusalikuypa kawarmi uysuykachaykäyanqanasu.
12<<Qamkuna täyashqaykichöqa ali shonqu y pobri runakunalami täyanqa.
Paykunaqa noqalamannami yärakayämanqa.
13Israelcho kawaykar quëdaq runakunaqa mananami lutanta rurayanqanasu.
Paykunaqa mananami lulakuyanqanasu ni pitapis engañayanqanasu.#Apoc. 14.5.
Tranquïlu mikukuq uyshakunanömi kayanqa.
Manami pipis paykunata mansakasinqanasu>>.#Sal. 23.2-4; Eze. 34.14-16.
14¡Sión runakuna, cantayay!
¡Israel runakuna, kushikur qayaräyay!
¡Jerusalén runakuna, lapan shonquykikunawan kushikuyay!
15 Tayta Dios mananami castigayäshunkinasu.
Chikishuqnikikunatapis qarqunqami.
Tayta Diosmi mandaqniki rey kaykan.#Zac. 9.9.
Qamkunawan kaykaptinqa manami imapitapis mansariyankinasu.
16Say wisanmi Jerusalén runakunata niyanqa:
<<Sión runakuna, mansariyänaykipa trukanqa ¡valorta sariyay!>>
17Qamkunawanmi Tayta Dios kaykan.
Munayyuq karmi salvayäshunki.
Kuyayäshushpaykimi mushuq kawayta qoyäshunki.
Qamkunapaq seqaypa kushikurmi 18fiestata ruraqno cantanqa.
Tayta Diosmi nin:
<<Manana nakayänaykipaqmi yanapäyäshayki.
Manami penqaypaqnasu kayanki.
19Say wisanqa nakasishuqnikikunata kikïmi ushakäsishaq.
Nirkurmi oqrakash uyshata shuntaqno maysaypitapis shuntayämushayki.
Pakikush uyshata jampiqnömi jampiyäshayki.#Miq. 4.6-7.
Manami pipis jamuraykäyäshunkipaqnasu.
Saypa trukanqa yanapäyäshayki maysaychöpis respitash y alabash kayänaykipaqmi.
20Say wisanqa maysaypitami shuntayämushayki.
Jäpa nacionkunaman apayäshuqnikikunapa rikay nawin kutisimuptïmi pïmaypis kushikur respitayäshunkipaq.#Gén. 12.2-3; Zac. 10.8-12.
Noqa Tayta Diosmi sayno nï>>.
Currently Selected:
Sofonías 3: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
