Romanos 10

1Wawqi panikuna, Tayta Diostami lapan shonqüwan ruwakü Israel mayïkuna salvakuyänanpaq. 2Paykuna Tayta Diosta wiyakuyta munarpis manami tantiyayansu 3imano perdonamashqansitapis. Saymi yarpäyan Diospa leyninkunata cumplirraq perdonash kayänanpaq kashqanta. Perdonash kayta munarpis manami Jesucristuta chaskikuyansu. 4Jesucristo shamushna kaptin manami Diospa leyninkunata cumplirsu perdonash kaykansi, saypa trukanqa Jesucristuman yärakurmi. Payman yärakuq kaqtaqa lapantami Tayta Dios perdonan.

5Leykunata cumplirraq Tayta Dios munashqanno kawayta munaqkunapaqqa Moisés kaynömi qelqarqan: <<Leynïkunata cumpliq kaq runaqa lapantami cumplinman>>.#Lev. 18.5.

6Jesucristuman yärakurraq perdonash kashqansita tantiyarmi kayno ninsi: <<Shonqunsicho ama yarpäshunsu:#Deut. 9.4. <¿Piraq jana pasaman wisanman?> nir>>.

(Say nishqannölami pipis jana pasamanraqsu aywanman Jesucristuta kay pasaman pushamunanpaq.)

7<<Saynöpis ama yarpäshunsu <¿piraq pasa rurinman yaykuykunman?> nir>>.

(Say nishqannölami pipis wilakuyninta musyayta munar pasa rurinmanraqsu yaykunman Jesucristuta kawarisimunanpaq.)

8Saypa trukanqa kaynömi ninsi: <<Tayta Diospa wilakuynin shimikikunacho y shonquykikunachömi kaykan>>.#Deut. 30.12-14.

Saymi wilakuyninta wilakur kayno ninsi: 9Jesucristo ämuyki kashqanta nirqa y wanushqanpita Tayta Dios kawarisimushqanta lapan shonquykikunawan criyirqa salvashqami kayanki. 10Lapan shonquykiwan criyiyaptikiqa Tayta Dios perdonayäshunkimi. <<Señor Jesucristuqa ämümi kaykan>> niyaptikiqa Tayta Dios salvayäshunkimi. 11Tayta Diospa palabranpis kaynömi nikan: <<Pipis payman yärakuq kaqqa manami manakaqlapaqsu yärakunqa>>.#Isa. 28.16.

12Saymi Israel runatapis mana Israel runatapis yärakuptinqa Tayta Dios perdonan. Lapansipapis japalan Diosninsi karmi manakuq kaqtaqa pïmaytapis salvan. 13Tayta Diosmi palabrancho nikan: <<Noqata manakamaq kaqtaqa pïmaytapis salvashaqmi>>.#Joel 2.32.

14¿Imanöparaq salvananpaq manakuyanqa Jesucristo salvamaqninsi kashqanta manaraq criyirqa? ¿Imanöparaq criyiyanqa wilakuyninta manaraq wiyarqa? ¿Imanöparaq wiyayanqa pipis mana wilapaptinqa? 15¿Imanöparaq wilapanqa wilakunanpaq pipis mana kachaptinqa? Tayta Diospa palabranchöpis kaynömi qelqaraykan: <<Ali wilakuyta apamuqkuna seqaypa kushikuypaqmi kaykäyan>>.#Isa. 52.7.

16Isanqa wilakuyaptinpis manami lapan runakunasu Jesucristupa ali wilakuyninta cäsukuyan. Isaías qelqashqanchöpis kaynömi nikan: <<Tayta Dios, wilakuyashqäta ¿piraq chaskikush?>>#Isa. 53.1.

17Imano kaptinpis Jesucristupa ali wilakuyninta#10.17 Wakin griego copiakunachöqa Diospa ali wilakuyninta niyanmi. wiyarraqmi payman pipis yärakun.

18Sayno kaptinpis ¿manasuraq wilakuyninta Israel runakuna wiyayash? Paykuna maynami wiyayash. Tayta Diospa palabranchöpis kaynömi qelqaraykan:

<<Wilakuyninqa maysaychömi musyakaykan.

Palabrankunaqa pasa kuchunyaqmi chaykan>>.#Sal. 19.4.

19Say wilashqankunata musyaykarpis ¿manasuraq Israel runakuna tantiyayash? Paykunaqa tantiyayarqanmi#10.19 Israel runakuna tantiyayarqan mana Israel runakunatapis Tayta Dios salvananpaq kashqanta.. Moiséspis kaynömi qelqarqan: <<Jäpa marka runakunatana yanaparmi qamkunata rabyanäsishayki. Mana tantiyakuq runakunata chaskikurmi qamkunata lakikasishayki>>.#Deut. 32.21.

20Saynölami Isaíaspis kayno qelqarqan: <<Mana ashimaqkunatami parlapashkä. Mana ruwakamaq runakunatami yanapashkä>>.#Isa. 65.1.

21Israel runakunapaqmi isanqa kayno qelqarqan: <<Mana cäsukamaq runakunaman qoyay qoyaymi rikräta makyarashkä>>.#Isa. 65.2.

Currently Selected:

Romanos 10: qvhB

Highlight

Copy

Compare