Marcos 12

Chakra arriendaq runakunaman tinkusiypa Jesús yachasishqan

Mateo 21.33-46; Lucas 20.9-19

1Saypitanami tinkusiypa yachasir Jesús nirqan: <<Juk runashi chakranman üvata plantaykasir#Isa. 5.1-2. intëru kuchunpa perqasinaq. Üvata jaruyänanpaqshi pözuta rurasinaq. Chakranta täpananpaqshi törritapis sharkasinaq. Lapanta ruraskasirnashi chakranta arriendakuykur juklä markapa aywakunaq.

2<<Cosëcha qalaykuptinnashi juk ashmayninta kachanaq üva chakra arriendunpita cobrakamunanpaq. 3Say ashmay chaptinshi fiyupa maqarkur jinaylata qarquskiyänaq. 4Sayshi chakrayuq runa juk ashmayninta yapay kachanaq. Saytapis ashlirshi [samqar] umantapis rachiyänaq. 5Saypita juk ashmayninta kachaptinpis wanusiyänaqshi. Saynölashi askaqta kachaptinpis wakinta maqayänaq y wakintana wanusiyänaq.

6<<Ashmayninkuna manana kaptinnashi kuyay surintana kachanaq. Say surinta kacharshi ninaq: <Surïtaqa respitayanqami>. 7Sayshi surin aywaykaqta rikayashpan chakra arriendaqkuna wilanakur niyänaq: <Taqaymi kay chakrawan quëdananpaq kaykan. Noqansina chakranwan quëdakunansipaq wanuskasishun>. 8Chaykuptinnashi wilanakuyashqannöla wanuskasir üva chakrapita jukläman jitariyänaq>>.

9Sayno wilaparkurmi Jesús nirqan: <<Say üva chakrayuq ¡imataraq ruranqa say runakunata! ¿Manasuraq lapanta wanusir ushanqa? Nirkurqa chakrantapis juktanami arriendakuykunqa. 10¿Manaku liyiyashkanki Tayta Diospa palabran kayno nishqanta?

<< <Wayi sharkasiqkuna <<kay rumi manami alisu>> nir jitariyashqanmi wayi esquïnan cimientuchöna churaraykan.

11Sayno kananpaq Tayta Diosmi kamakäsish.

Saypitami seqaypa kushikunsi> >>.#12.11 Say rumimanmi Jesucristo tinkusikurqan. Sayno nirmi tantiyasirqan chikiyaptinpis lapanpitapis mas munayyuq kananpaq Tayta Dios churashqanta.#Sal. 118.22-23.

12Jesús sayno niptinmi tantiyayarqan paykunapa contran parlaykashqanta.#12.12 Say tinkusikuy kaynömi kaykan: Chakrayuqqa Tayta Diosmi. Chakrayuq kachashqan ashmayninkunanami Tayta Diospa profëtankuna. Chakrayuqpa surinnami Jesucristo. Chakra arriendaq fiyu runakunanami Jesucristupa contrankuna. Saymi prësu sarisiyta munarpis runakunata mansapäyashpan aywakuyarqan.

Impuestuta pägayänanpaq kashqanta tapuyashqan

Mateo 22.15-22; Lucas 20.20-26

13Saypitanami fariseukunata y Herodespa favornin sharkuq runakunata Jesús kaqman kachayarqan lutanta parlasiyänanpaq. 14Chaykurnami niyarqan: <<Rabí, noqakuna musyayämi rasun kaqlata yachasishqaykita. Manami runakuna alabashunaykita munarsu yachasinki, saypa trukanqa Tayta Dios munashqannölami. Romacho mandaq Césarpaq ¿impuestuta pägashwanku o manaku?>>#12.14 Israel runakuna yarpäyarqan Romapaq impuestuta pägar Tayta Diospa contran kaykäyashqantami. Saymi: <<Impuestuta pägashun>> Jesús niptinqa Diospa contran parlashqanta niyanman karqan. <<Ama pägashunsu>> niptinqa Roma autoridäkuna rabyanäyanman karqan.

15Lutanta parlasinanpaq tapuyashqanta tantiyarmi Jesús nirqan: <<¿Imanirtaq lutanta parlasimayta munayanki? Mä qellayta rikasiyämay>>.

16Sayno niptinmi qellayta aptaparkuyarqan. Sayta rikaykurmi Jesús tapurqan: <<Kay qellaycho ¿pipa reträtuntaq kaykan? Saynöpis ¿pipa jutintaq qelqaraykan?>>

Sayno tapuptinmi niyarqan: <<Mandaq Césarpami>>.

17Saymi Jesús nirqan: <<Césarpa kaqta Césarta qoykuyay. Tayta Diospa kaqtaqa Tayta Diosta qoykuyay>>.#12.17 Tayta Diospa kaqqa vïdansimi kaykan.

Sayno niptinmi say runakuna ima niytapis kamäpakuyarqansu.

Wanushkuna kawariyämunanpaq kashqanta tapukuyashqan

Mateo 22.23-33; Lucas 20.27-40

18Saypitanami saduceukunapis Jesústa tapuq aywayarqan. Paykuna manami criyiyansu wanuqkuna kawariyämunanpaq kashqanta.#Hech. 23.8. Saymi Jesústa tapur niyarqan: 19<<Rabí, Moisés qelqashqancho nikan: <Warmiyuq runa suriynaq wanuptin wawqinmi cuñädan viüdawan tanqa. Saynöpami wamrankuna kaptin say wanuq wawqinpa surinkunano kayanqa>.#Deut. 25.5. 20Kanan niyäshayki. Juk kutishi qanchis wawqikuna kayänaq. Qechpa kaqshi warmita ashir manaraq surin kaptin wanunaq. 21Sayshi shulka kaq wawqinna say viüdawan tänaq. Paypis surin manaraq kaptinshi wanunaq. Saypita mas shulkan kaqnashi say viüdawan tänaq. Paypis surin manaraq kaptinshi wanunaq. 22Saynölashi lapan wawqinkuna say viüdawan täyänaq. Surin manaraq kaptinshi lapanpis wanuyänaq. Saypitanashi say viüdapis wanukunaq. 23Wanushkuna kawariyämunan junaqqa ¿mayqanpa warminraq kanqa, qanchis wawqiwan tash kaykaptinqa?>>

24Sayno niyaptinmi Jesús nirqan: <<Qamkuna lutantami yarpäyanki. Manami Tayta Diospa palabrantapis ni Tayta Dios munayyuq kashqantapis tantiyayankisu. 25Kawarimurqa mananami pipis majasakanqanasu, saypa trukanqa jana pasacho angilkunanölanami kayanqa. 26Wanushkuna kawariyämunanpaq kashqanta ¿manaku Moisés qelqashqanta liyiyashkanki? Rupaykaq shirakapitami Moisésta Tayta Dios nirqan: <Abrahampa, Isaacpa y Jacobpa Diosninmi kaykä>.#Éxo. 3.6. 27Tayta Diosqa manami wanushkunapa Diosninsu, saypa trukanqa kawaykaqkunapa Diosninmi. Sayta mana tantiyarmi qamkuna lutanta yarpaykäyanki>>.

Mas cäsukunansipaq kaq mandamientu

Mateo 22.34-40; Lucas 10.25-28

28Jesús ali contestashqanta wiyarmi ley yachasiq runapis tapur nirqan: <<¿Mayqan mandamientutataq mas cäsukushwan?>>

29Sayno tapuptinmi Jesús nirqan: <<Mas cäsukunansipaq kaq mandamientuqa kaynömi qelqaraykan: <Israel runakuna, shumaq wiyakuyay. Tayta Diosninsiqa juklaylami. 30Tayta Diosta kuyayanki lapan shonquykikunawan, lapan voluntänikikunawan, lapan yarpaynikikunawan y lapan kalpaykikunawan>. [Kayqa mas cäsukunansipaq kaq mandamientumi kaykan.]#Deut. 6.4-5. 31Saynölami jukaq mandamientupis nikan: <Kikiki kuyakushqaykino runa mayikita kuyanki>.#Lev. 19.18. Say ishkan mandamientukunata mas cumplinansitami Tayta Dios munan>>.

32Saymi ley yachasiq runa nirqan: <<Rabí, rasun kaqtami nishkanki. Rasunpaypapis juklaylami Tayta Diosqa. Paypita mas juk diosqa manami kansu.#Deut. 4.35. 33Say ishkay mandamientukunata cumplishqansiqa lapan sacrificiupitapis mas alimi kaykan>>.#Ose. 6.6.

34Shumaq tantiyakuykur niptinmi Jesús nirqan: <<Qamqa Tayta Dios mandaykashqanman yaykunaykipaqnami kaykanki>>.

Ali contestaptinmi pipis tapupayta almitirqannasu.

Davidpitapis Cristo mas mandaq kashqan

Mateo 22.41-46; Lucas 20.41-44

35Templu patiucho yachaykäsishqanchömi runakunata Jesús nirqan: <<¿Imanirtaq ley yachasiqkuna niyan Davidpa Surin Cristo kashqanta? 36Espíritu Santu tantiyasiptinmi kikin Davidpis kaynömi nirqan: <Mandamaqnïtami Tayta Dios nirqan: Aluq kaq nawpäman jamakamuy lapan chikishuqnikikunata munaynikiman churashqäyaq>.#Sal. 110.1.

37<<Sayno nikaptinqa ¿imanöpataq Cristuqa Davidpa Surin kanman kikin Davidpis mandaqnin kashqanta nikaptinqa?>>#12.37 Cristuqa manami David ayllu kashqantasu ñëgarqan, sinöqa Davidpita mas munayyuq kashqantami nirqan.

Jesús sayno yachasiptinmi runakuna kushikuyarqan.

Ley yachasiqkuna y fariseukuna lutan ruraq kayashqanta Jesús nishqan

Mateo 23.1-12; Lucas 20.45-47

38Saypitanami Jesús nirqan: <<Cuidä ley yachasiqkunanötaq kayankiman. Paykunaqa runa tukuyashpanmi chaki puntanyaq sotänan jatish puriyan. Pläzakunachöpis runakuna winchikur ali rikayänantami munayan. 39Sinagögakunachöpis punta puntamanraqmi jamakuyan. Mikuyänanpaq qayasiyaptinpis mësamanraqmi jamakuyan. 40Viüdakunapa pobrëzalantapis qechuyan. Nirkurmi santu tukuyashpan may höra Tayta Diosta manakuyan. Sayno kayashqanpitami Tayta Dios mana kuyapaypa mas fiyupa castiganqa>>.

Muchuq viüda ofrendashqan

Lucas 21.1-4

41Saypitanami templucho ofrenda winakuyänan babul nawpancho Jesús jamarashpan rikaraykarqan runakuna ofrendata winaqta. Saynöpis rikarqan rïcu runakuna saysika qellayta winaykäyaqta. 42Juk muchuq viüdapis sayman chaykushpanmi ishkay centävulata winarqan. 43Sayta rikaykurmi discïpulunkunata qayaskir Jesús nirqan: <<Rasunpami nï: Kay muchuq viüdami lapanpitapis mas askata winash. 44Wakinkunaqa pusuq qellaylantami winayash. Kay viüdami isanqa saylana rantipakunanpaq kaykaptinpis lapanta winash>>.

Currently Selected:

Marcos 12: qvhB

Highlight

Copy

Compare