Mateo 4
4
Jesústa Satanás tentayta munashqan
Marcos 1.12-13; Lucas 4.1-13
1Saypitanami Jesústa Espíritu Santu sunyaq jirkaman pusharqan diablu tentananpaq.#Heb. 2.18; 4.15. 2Saycho chusku chunka (40) junaq y chusku chunka paqas ayunaskiptinmi Jesústa wanunayparaq mikanay sarikuykurqan. 3Saymi diablu chaykur nirqan: <<Diospa Surin kaykarqa mä kay rumikunata tantaman tikrasiy>>.
4Sayno niptinmi Jesús nirqan: <<Tayta Diospa palabrancho kaynömi qelqaraykan: <Manami tantata mikularsu runa kawan, sinöqa Tayta Dios lapan nishqankunata cäsukurpis kawanmi> >>.#Deut. 8.3.
5Saypitanami sagrädu Jerusalén markaman Jesústa diablu pusharqan. Saychönami templupa altunnin kaq puntanman ichiykasir 6nirqan: <<Diospa Surin karqa mä kaypita tiwyarpuy. Diospa palabrancho kaynömi qelqaraykan: <Angilninkunatami Tayta Dios kachamunqa rikayäshunaykipaq. Paykunami sariyäshunki chakilaykitapis rumikunacho mana takakunaykipaq> >>.#Sal. 91.11-12.
7Niptinmi Jesús nirqan: <<Saynöpis Tayta Diospa palabrancho kaynömi qelqaraykan: <Tayta Diosta ama tentankisu> nir>>.#Deut. 6.16.
8Saypitanami altunnin jirkaman diablu pushaykur maysay nacionkunata y riquëzankunata rikaskasir 9nirqan: <<Qonqurpaykur adoramaptikiqa lapan rikashqaykikunatami qoykushayki>>.
10Saymi Jesús nirqan: <<¡Witikuy, Satanás! Tayta Diospa palabrancho kaynömi qelqaraykan: <Tayta Dioslatami adorayanki. Pay japalantami sirviyanki> >>.#Deut. 6.13.
11Sayno niptinmi diablu aywakurqan. Saypitanami angilkuna chaykur Jesústa yanapäyarqan.
Galileacho wilakur Jesús qalaykushqan
Marcos 1.14-15; Lucas 4.14-15
12Carcilcho Juan wichqaraykashqanta mayarmi#Mat. 14.3; Mar. 6.17; Luc. 3.19-20. Galileaman Jesús kutirqan. 13Nazaret markacho tänanpa trukanqa Capernaúm markamannami taq aywarqan. Say marka karqan Galilea qocha kuchuncho, Zabulón y Neftalí trïbu runakuna täyashqan kaqchömi. 14Capernaúmcho Jesús tarmi profëta Isaías kayno wilakushqanta cumplirqan:
15<<Zabulón trïbu y Neftalí trïbu runakuna,
qamkuna täyashqaykipami lamar kuchunpa y Jordán mayu wak simpanpa näni päsaykan.
Mana Israel runakunapis qamkuna täyashqaykicho askaqmi täyan.
16Sakäpakushno kawarpis asikyayta rikaqnömi salvayäshuqnikita rikayanki.
Yanawyaykaqchöno kawayaptikipis salvayäshuqnikiqa aksinömi kanqa>>.#Isa. 9.1-2.
17Capernaúmcho tashpanmi wilakuyta qalaykur Jesús nirqan: <<¡Tayta Dios mandaykashqan chämushnami! ¡Jusalikuyta wanakur Tayta Dios munashqannöna kawayay!>>#Mat. 3.2.
Discïpulun kayänanpaq pescaqkunata Jesús qayashqan
Marcos 1.16-20; Lucas 5.1-11
18Galilea qocha kuchunpa aywaykashqanchömi Jesús rikarqan ishkay runakunata. Pescaq karmi redninta yakuman mashtaykäyarqan. Paykuna kayarqan Simón y wawqin Andrés. Simónpa jukaq jutinmi karqan Pedro. 19Paykunatami Jesús nirqan: <<Qatiräyämay. Noqami yachasiyäshayki runakunatana pescayänaykipaq>>.
20Sayno niptinmi redninkunata kachariykuyashpan Jesúswan aywayarqan.
21Saypita mas wakläpa aywaykäyashqanchönami rikarqan Santiagutawan wawqin Juanta. Paykunaqa taytan Zebedeuwanmi büquincho redninkunata shilpaykäyarqan. Paykunapis Jesús qayaptinmi 22taytanta y büquita kachaykur jukla aywayarqan.
Qeshyaqkunata Jesús aliyäsishqan
Lucas 6.17-19
23Intëru Galileapa Jesús purirmi Tayta Dios mandaykashqanpa ali wilakuyninta sinagögakunacho yachasirqan y tukuy niraq qeshyawan qeshyaqkunata aliyäsirqan.#Mat. 9.35; Mar. 1.39. 24Saytami Siria nación markakunachöpis musyayarqan. Saymi paykunapis Jesús kaqman apayarqan tukuy niraq qeshyawan qeshyaykaqkunata, supay nakasishqan runakunata, wanuy qeshyawan nakaqkunata y pulan cuerpun wanush runakunatapis. Say qeshyaqkunata lapantami Jesús aliyäsirqan.
25Askaqmi Jesústa qatiräyarqan. Say runakuna kayarqan Galileapita, Decápolispita, Jerusalénpita, Judeapita y Jordán mayu wak simpanpitapis.
Currently Selected:
Mateo 4: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.