Mateo 10

Apostolninkunata Jesús akrashqan

Marcos 3.13-19; Lucas 6.12-16

1Saypitanami chunka ishkay discïpulunkunata qayaykur munayninta Jesús qorqan runakunapita supaykunata qarquyänanpaq y tukuy qeshyakunawan qeshyaykaqkunata y imayka nanaywan kaqkunatapis aliyäsiyänanpaq.

2Say chunka ishkay apostolkunami kayarqan Simón (paypa jukaq jutinmi karqan Pedro), Simónpa wawqin Andrés, Zebedeupa surinkuna Santiaguwan Juan, 3Felipe, Bartolomé, Tomás, Romapaq impuestuta cobraq Mateo, Alfeupa surin Santiago, Tadeo, 4Zelote niyashqan Simón y Jesústa rantikuq Judas Iscariote.

Apostolninkunata wilakuyänanpaq Jesús kachashqan

Marcos 6.7-13; Lucas 9.1-6

5Say chunka ishkay apostolninkuna wilakuq aywayänanpaq kacharmi Jesús nirqan: <<Ama aywayankisu mana Israel runakunapa markankunamanqa, ni Samariacho kaykaq markakunamanpis ama yaykuyankisu. 6Saypa trukanqa Israel runakunalaman aywayanki. Paykunami oqrakash uyshano kaykäyan. 7Paykunata niyanki: <¡Tayta Dios mandaykashqan chämushnami!> 8Qeshyaqkunata aliyäsiyanki. Wanushkunatapis kawarisiyanki. Leprawan qeshyaykaqkunata aliyäsiyanki. Supaykunatapis runakunapita qarquyanki. Munaynïta dembaldila chaskiyashqaykino pitapis dembaldila aliyäsiyanki.

9<<Qellaytapis, qoritapis ni cobritapis gastuykikunapaq ama apayankisu. 10Saynöpis ama apayankisu mirkapaykikunata, trukanaykikunata ni tukruykikunatapis. Jatiräyashqayki lanqilaykikunawan aywayanki. Arupakuq runa päguta chaskinanpaq derëchun kashqannömi qamkunapapis qarayäshunaykipaq derëchuykikuna kaykan.#1Cor. 9.14; 1Tim. 5.18.

11<<May markaman charpis mayqan ali runa kashqantapis tapukuyanki. Say runapa wayilancho juk markaman päsayashqaykiyaq posädakuyanki. 12Wayinman char <ali kaway qamkunacho kaykuläsun> niyanki. 13Ali chaskiyäshuptikiqa niyashqaykinömi ali kaway kanqa. Mana chaskiyäshuptikimi isanqa ali kaway kanqasu. 14Wilakuyashqaykita say wayicho o say markacho mana chaskiyäshuptikiqa chakikikunacho kaykaq polvuta tapshiriykur aywakuyanki.#Hech. 13.51. 15Rasunpami nï: Sodoma y Gomorra runakunata castigashqanpitapis#Gén. 19.24-28; Mat. 11.24. peormi juiciu final junaqcho say runakunata Tayta Dios castiganqa.#Luc. 10.4-12.

Discïpulunkuna chikish kayänanpaq Jesús nishqan

Marcos 13.9-13; Lucas 21.12-17

16<<Löbukunaman uyshakunata qaykuqnömi#Luc. 10.3. qamkunata kachaykä. Culebrano alcäbula puriyanki y manshu palumano humildi kayanki. 17Runakunapita alcäbu kakuyanki. Chikiyäshushpaykimi prësu sarirkur autoridäkunaman apayäshunki. Sinagögakunachöpis astayäshunkimi. 18Noqaman yärakayämashqaykipitami gobernadorkunamanpis y reykunamanpis prësu apayäshunki. Saynöpami wilakuynïta paykunata y wakin mana Israel runakunatapis wilapäyanki. 19Autoridäkunaman apayäshuptikipis ama lakikuyankisu: <¿Imataraq nishaq? ¿Imanöraq parlashaq?> niyashpayki. Tayta Diosmi tantiyasiyäshunki imata niyänaykipaqpis. 20Manami kikikikuna yarpäyashqaykitasu parlayanki, sinöqa Taytaykipa Espïritun tantiyasiyäshushqaykitami.#Mar. 13.9-11; Luc. 12.11-12; 21.12-15.

21<<Noqaman yärakayämashqanpitami wawqintapis, surintapis y taytantapis wanusiyänanpaq autoridäkunaman apayanqa.#Mar. 13.12; Luc. 21.16. 22Noqaman yärakayämashqaykipitami pïmaypis chikiyäshunki.#Mat. 24.9; Mar. 13.13; Luc. 21.17. Sayno chikiyäshuptikipis wanuyashqaykiyaq yärakayämashpaykiqa salvashqami kayanki.#Mat. 24.13. 23Juk markacho chikiyäshuptiki juk markaman qeshpikuyanki. Rasunpami nï: Israelcho lapan markakunapa purir manaraq ushayaptikimi Runapa Surin kutimunqa.

24<<Mayqan yachakuqpis manami yachasiqninpita mastaqa yachansu.#Luc. 6.40. Saynölami ashmaypis patronninpita mas munayyuqsu kaykan.#Juan 13.16; 15.20. 25Yachakuqkunapis yachasiqninno karmi kushikuyan y ashmaykunapis patronninno karmi kushikuyan. Noqatapis Beelzebú#10.25 Beelzebúqa Satanáspa jukaq jutinmi kaykan. nikäyämarqa#Mat. 9.34; 12.24; Mar. 3.22; Luc. 11.15. qamkunatapis wamräkuna kayaptiki peorraqmi ashliyäshunki.

Mana mansariyänanpaq Jesús nishqan

Lucas 12.2-7

26<<Runakuna chikiyäshuptikipis ama mansariyankisu. Paykuna pakaylapa jusalikuyashqanpis juiciu finalchöqa musyakanqami.#Mar. 4.22. 27Sayno kaykaptinqa pakaylapa nishqäkunata pïmaypis wiyayänanpaq wilakuyay. Rinrilaykicho nishqäkunatapis wayi jananman wisarkur qayakuypa wilakuyay. 28Ama mansariyankisu pipis wanusiyäshunaykipaq jurapäyäshuptiki. Wanusiyäshushpaykipis almaykitaqa manami wanusinqasu. Saypa trukanqa Tayta Dioslata mansapakuyay. Paymi isanqa munayyuq kaykan pitapis almantinta infiernucho ushakäsinanpaq.

29<<¿Manaku ishkay pishqukunata juk centimulacho rantikuyan? Sayno kaptinpis manami ni juklaylapis wanunsu Taytayki mana munaptinqa. 30Aqsaykikunapis paypaqqa yupashlami kaykan. 31Qamkunaqa saysika pishqukunapitapis masmi väliyanki. Sayno kaykaptinqa ama mansariyaysu>>.

Favornin parlaqkunapita Jesús nishqan

Lucas 12.8-9

32<<Pipis runakunapa nawpancho favornï parlaptinqa noqapis jana pasacho kaykaq Taytäpa nawpancho paykunapa favorninmi parlashaq. 33Pipis runakunapa nawpancho ñëgamaptinqa noqapis jana pasacho kaykaq Taytäpa nawpancho ñëgashaqmi.#2Tim. 2.12.

Jesúsman yärakuqkuna chikish kayänanpaq nishqan

Lucas 12.51-53; 14.26-27

34<<Ama yarpäyaysu shamushqäpita kay pasacho runakuna jawkala kawayänanpaq kashqanta. Saypa trukanqa kikinpurami chikinakuyanqa. 35Saymi taytanwan surin chikinakuyanqa, mamanwan wawan chikinakuyanqa y suedranwan lumsuynin chikinakuyanqa. 36Chikiqninkunaqa kikinpa wayinchömi kayanqa.#Miq. 7.6.

37<<Pipis discïpulü kayta munarqa papäninta y mamanta kuyashqanpitapis noqata mas kuyamäsun. Sayno mana kuyamarqa manami discïpulü kayanmansu. Saynöpis wamrankunata kuyashqanpitapis noqata mas kuyamäsun. Sayno mana kuyamarqa manami discïpulü kayanmansu. 38Cruzninta apaqno mana qatirämarqa#10.38 Cruzninta apaqno mana qatirämar nirqa ima nakaycho karpis Jesucristuta qatiränanpaq kashqantami nikan. manami discïpulü kayanmansu.#Mat. 16.24; Mar. 8.34; Luc. 9.23; Juan 12.24. 39Vïdanta salvayta munaqkunaqa vïdanta oqrayanqami. Vïdanta noqa rayku oqraqkunami isanqa vïdanta salvayanqa.#10.39 Sayno nirqa Jesucristo kaynömi nirqan: <<Kikin munashqanno luta kawakuqkunaqa manami salvakuyanqasu. Noqa munashqäno kawaqkunami isanqa salvakuyanqa>>.#Mat. 16.25; Mar. 8.35; Luc. 9.24; 17.33; Juan 12.25.

Premiuta chaskinansipaq Jesús nishqan

Marcos 9.41

40<<Qamkunata chaskikushuqnikikunaqa noqatami chaskikayäman.#Luc. 10.16; Juan 13.20. Noqata chaskikamaqkunaqa kachamaqnïtapis chaskikuykäyanmi.#Mar. 9.37; Luc. 9.48. 41Profëtakunata chaskikuq kaqqa profëtanömi premiuta chaskinqa. Saynöpis jusaynaq runata chaskikuq kaqqa say runanömi premiuta chaskinqa. 42Mayqan discïpulüta juk pucillu yakulatapis makyaq kaqtaqa Tayta Diosmi premiuta qonqa>>.

Currently Selected:

Mateo 10: qvhB

Highlight

Copy

Compare