Lucas 4

Jesústa Satanás tentayta munashqan

Mateo 4.1-11; Marcos 1.12-13

1Bautizakuskir Espíritu Santupa munaynincho Jesús kaykaptinmi Jordán mayupita sunyaq jirkaman Espíritu Santu pusharqan. 2Saycho chusku chunka (40) junaq kaykaptinmi diablu tentarqan. Say junaqkuna imatapis mana mikush karmi Jesús pasaypa mikanarqan.

3Saymi diablu nirqan: <<Diospa Surin kaykarqa mä kay rumita tantaman tikrasiy>>.

4Sayno niptinmi Jesús nirqan: <<Tayta Diospa palabrancho kaynömi qelqaraykan: <Manami tantata mikularsu runa kawan, [sinöqa Tayta Dios nishqankunata cäsukurpis kawanmi]> >>.#Deut. 8.3.

5Saypitanami altunnin jirkaman diablu pushaykur maysay nacionkunata rasla rikaskasir 6nirqan: <<Lapan rikashqayki nacionkunata y saycho riquëzakunatami qoykushayki. Saykuna noqapa kaptinmi munashqä kaqta pitapis qoykushaq. 7Qonqurpaykur adoramaptikiqa lapan rikashqaykikunatami qoykushayki>>.

8Saymi Jesús nirqan: <<[¡Witikuy, Satanás!] Tayta Diospa palabrancho kaynömi qelqaraykan: <Tayta Dioslatami adorayanki. Pay japalantami sirviyanki> >>.#Deut. 6.13.

9Saypitanami Jerusalénman Jesústa diablu pusharqan. Saychönami templupa altunnin kaq puntanman ichiykasir nirqan: <<Diospa Surin karqa mä kaypita tiwyarpuy. 10Diospa palabrancho kaynömi qelqaraykan: <Angilninkunatami Tayta Dios kachamunqa rikayäshunaykipaq. 11Paykunami sariyäshunki chakilaykitapis rumikunacho mana takakunaykipaq> >>.#Sal. 91.11-12.

12Niptinmi Jesús nirqan: <<Saynöpis Tayta Diospa palabrancho kaynömi nin: <Tayta Diosta ama tentankisu> >>.#Deut. 6.16.

13Jesústa tentayta mana kamäpakurmi diablu aywakurqan yapaychöna kutimuyta yarpar.

Galileacho Jesús wilakur qalaykushqan

Mateo 4.12-17; Marcos 1.14-15

14Saypitanami Espíritu Santupa munayninwan Galileaman Jesús kutirqan. Say markakunachömi Jesús ali yachasiq kashqanta runakuna parlayaq. 15Sinagögakunacho yachasiptinmi payta alabar niyarqan: <<¡Payqa alimi yachasin!>>

Nazaret markacho Jesús wilakushqan

Mateo 13.53-58; Marcos 6.1-6

16Saypitanami markan Nazaretman Jesús kutiykur costumbrin kashqanno jamay junaqcho sinagögaman aywarqan. Saychömi Tayta Diospa palabranta liyimunanpaq runakunapa puntanman ichirqan. 17Profëta Isaías qelqashqan rölluta makyaptinmi liyiyta munashqanta ashiskir kayno liyimurqan:

18<<Tayta Diosmi Espïritunta noqaman kachamush.

Paymi akramash pobrikunata ali wilakuyninta wilanäpaq.

Saynöpis kachamash [lakish kawaqkunata shakyäsinäpaq,]

juklä nacionman prësu aywaqkuna librina kayashqanta wilanäpaq,

qaprakunapa nawinta aliyäsinäpaq,

chikiqninkunapa makincho nakaykaq runakunata jorqunäpaq

19y Tayta Dios salvananpaq kaq tiempu chämushqanta wilakunäpaq>>.#Isa. 61.1-2.

20Sayno liyirkurnami rölluta wankurkur kutiykasirqan sinagögacho yanapaq runata. Jamaskiptinnami saycho kaykaq runakuna payta rikaraykäyarqan. 21Saymi Jesús nirqan: <<Liyipämushqächo nishqannömi kanan cumplishna kaykan>>.

22Sayno niptinmi runakuna kushikuyashpan niyarqan: <<¡Payqa shumaqmi parlan! ¿Manaku Josépa surilan kaykan?>>

23Saymi Jesús nirqan: << <Jampikuq karqa kikikiraq jampikuy> niyashqannömi qamkunaqa munaykäyanki Capernaúmcho milagruta rurashqäno kay markansichöpis milagruta ruranäta>>.

24Nirkurmi nirqan: <<Rasunpami nï: Manami mayqan profëtatapis markanchöqa chaskikuyansu. 25Rasunpami nï: Profëta Elías kawanan wisan kimsa wata soqta killantin mana tamyaptin maysay Israel markakunacho fiyupa muchuy karqan. Say wisan Israel nacioncho aska viüdakuna kayarqan. 26Sayno kaykaptinpis manami Tayta Dios Israelcho mayqan viüdata yanapänanpaqpis Elíasta kacharqansu. Saypa trukanqa Sidóncho kaq Sarepta markacho taq viüdalata yanapänanpaqmi kacharqan.

27<<Profëta Eliseo kawanan wisanpis Israelcho leprawan askaqmi qeshyaykäyarqan. Sayno kaykaptinpis manami mayqantapis Eliseo aliyäsirqansu. Saypa trukanqa Siria nacionpita kaq Naamánlatami aliyäsirqan>>.

28Jesús sayno niptinmi sinagögacho kaykaq runakuna fiyupa rabyakuyarqan. 29Saymi Jesústa markapita jorqur marka kuchun tunaman apayarqan saypita tanqariyänanpaq. 30Sayno apaykäyaptinmi chawpinkunapita yarquskir Jesús aywakurqan.

Supay löcuyäsishqan runata Jesús kachakäsishqan

Marcos 1.21-28

31Saypitanami Galileacho Capernaúm markaman Jesús aywarqan. Saychömi cada jamay junaq runakunata yachasirqan. 32Shumaq yachasishqanta wiyayashpanmi admirakur niyarqan: <<¡Payqa munayyuq karmi shumaq yachasimansi!>>

33Say sinagögachömi kaykarqan supay löcuyäsishqan runa. Paymi qayarar nirqan: 34<<¡Nazaretpita kaq Jesús, [kaypita aywakuy]! ¿Imatataq noqakunawan munanki? ¿Ushakäsiyämänaykipaqku shamushkanki? ¡Noqa musyämi Tayta Dios kachamushqan santu runa kashqaykita!>>

35Sayno qayaraptinmi supayta olqutupar Jesús nirqan: <<¡Upälala kay runapita yarquy!>>

Sayno niptinmi lapan runakunapa nawpancho say runata saqtariykur aywakurqan. Isanqa saqtarpis manami däñarqansu. 36Sayta rikaykurmi admirakuyashpan jukninpis jukninpis niyarqan: <<¡Imatanataq rikansi! ¡Munayninwan niptin supaykunapis cäsukurmi aywakuyan!>>

37Supayta qarqushqanta musyarmi intëru Galileacho Jesús munayyuq kashqanta parlayaq.

Pedrupa suedranta Jesús aliyäsishqan

Mateo 8.14-15; Marcos 1.29-31

38 Sinagögapita yarquskirmi Simónpa wayinman Jesús aywarqan. Chänanpaq Simónpa suedran fiebriwan ansa jitaraptinmi Jesústa ruwakuyarqan aliyäsinanpaq. 39Saymi qeshyaqman witiykur say fiebrita olqutupaptin jinan höra aliyaskirqan. Aliyarkurnami mikuyta paykunata qararqan.

Askaq qeshyaykaqkunata Jesús aliyäsishqan

Mateo 8.16-17; Marcos 1.32-34

40Inti jeqaykaptinnami tukuy niraq qeshyawan qeshyaykaqkunata Jesúsman apayämurqan. Yataykularmi paykunata aliyäsirqan. 41Wakin qeshyaqkunapitanami supaykunapis yarquyashpan qaparaypa niyarqan: <<¡Diospa Surinmi qam kanki!>>

Tayta Dios kachamushqan Cristo kashqanta supaykuna niyaptinmi Jesús olqutuparqan mana parlakuyänanpaq.

Jesús wilakur purishqan

Marcos 1.35-39

42Pasa wararkuptinnami sunyaqman Jesús aywakurqan. Saymi runakuna ashiyashpan pay kaykashqan kaqman chaykur manakuyarqan paykunapita mana aywakunanpaq. 43Saymi Jesús nirqan: <<Tayta Dios mandaykashqanpa ali wilakuyninta wakin markakunachöpis wilakunämi kaykan. Saypaqmi Tayta Dios kachamash>>.

44Nirkurnami Israelcho maysay markakunapa purir#4.44 Wakin kaq griego copiakunachöqa Galileapa purir niyanmi. sinagögakunacho Tayta Diospa wilakuyninta Jesús wilakurqan.

Currently Selected:

Lucas 4: qvhB

Highlight

Copy

Compare