Lucas 2

Jesús yurishqan

Mateo 1.18-25

1Say wisanmi Augusto César wilakasirqan mandashqan nacionkunacho lapan runakuna censakuyänanpaq. 2Say punta kaq censakuy karqan Cirenio jutiyuq runa Siria provinciacho gobernador kaykaptinmi. 3Saymi lapan runakuna unay ayllunkunapa markankunaman censakuq aywayarqan.

4Unay ayllun rey David Beléncho yurish kaptinmi Josépis Galileacho kaykaq Nazaretpita Judeacho kaykaq Belénman censakuq aywarqan. 5Warmin kananpaq parlakushna karmi Maríatapis pusharqan. Say junaqkuna qeshyaq juntanami María kaykarqan. 6Beléncho kaykäyaptinnami killan tinkuskiptin nanay sarirqan. 7Saychönami qechpa wawanta qeshyakurqan. Qorpakuna punukuyänancho posäda mana kaptinmi incharkur uywakuna mikukunalaman punuykasirqan.#2.7 Say wisan wayikuna ishkay cuartuyuqlami kayarqan. Juk cuartu karqan qorpakuna posädakuyänanpaq y juk cuartunami karqan wayiyuqkuna ayllunkunawan punuyänanpaq. Say wayiyuqpa cuartun kuchunchömi uywakuna mikukuyänanpis karqan. Saymanmi nïñu Jesústa punuykasirqan.

Uysha täpaqkunata angilkuna yuripäyashqan

8Say sakaymi Belén marka washa läduncho uyshayuqkuna uyshankunata täpaykäyarqan. 9Sayman ángel yuriparkuptinmi Tayta Diospa chipipiynin asikyapaykurqan. Sayta rikaykurmi uysha täpaqkuna fiyupa mansakäyarqan. 10Saymi ángel nirqan: <<Ama mansariyaysu. Ali wilakuytami apamushkä. Kay wilakuyta musyarmi lapan runakuna kushikuyanqa. 11Kananmi rey Davidpa markancho juk salvador yurish. ¡Payqa Señorninsi Cristumi! 12Say ititami tariyanki uywakuna mikukuyänalancho inchash punuraykaqta. Saycho tarirmi wilashqä rasunpaypa kashqanta musyayanki>>.

13Ángel sayno nikaptinmi saysika angilkuna elaqpita yuriskir Tayta Diosta alabar niyarqan:

14<<¡Jana pasacho kaqkuna Tayta Diosta alabaykuyäläsun!

¡Kay pasachöpis Tayta Dios kuyashqan kaqkunapaq ali kaway kaykuläsun!>>

15Angilkuna jana pasaman kutiskiyaptinmi uysha täpaqkuna jukninpis jukninpis ninakuyarqan: <<Tayta Dios wilasimashqansita rikaq Belénman jukla aywashun>>.

16Sayno nir warakayla aywayashpanmi iti wamra uywakuna mikukunalancho punuraykaqta tariyarqan. Josépis, Maríapis saychömi kaykäyarqan. 17Tariykurmi wilayarqan itipaq ángel wilashqanta. 18Saymi lapan wiyaqkuna kushikuyarqan. 19Maríanami shonqulancho lapanta yarparaykarqan. 20Ángel wilashqannöla lapantapis tariykurmi uysha täpaqkuna rikayashqanpita y wiyayashqanpita Tayta Diosta alabaraykar kutikuyarqan.

Jesústa templuman apayashqan

21Saypita puwaq junaqyuq kaykaptinmi itipa penqaynincho señalasiyarqan. María manaraq qeshyaq kaptin ángel nishqannölami jutinta churayarqan Jesús kananpaq.

22 Moisés qelqashqan leykunacho nishqannölami María qeshyakushqanpita purificakunan junaq chämuptin#Lev. 12.2-8. Joséwan María Jerusalén templuman itita apayarqan Tayta Diospa munayninman churayänanpaq. 23Sayno apayänanpaqmi Diospa leynincho nikan: <<Qechpa olqu suriki Tayta Diospami kanqa>>.#Éxo. 13.2, 12-13; Núm. 3.11-13, 45-47; 18.15-16.

24Saynöpis Diospa leynincho nikan: <<Ishkay kulkushkunata o ishkay pushapa palumakunata apamunqa>>.#Lev. 12.8. Say nishqantapis cumpliyänanpaqmi templuman aywayarqan.

25Say wisanmi Jerusaléncho Simeón jutiyuq runa tarqan. Paymi alilata rurashpan Tayta Diosman yärakur kawarqan. Saynöpis Israel runakuna nakaykäyashqanpita Cristo jorqunanpaq kashqantami shuyakuykarqan. Espíritu Santupa munayninchömi pay kawaq. 26Paytami Espíritu Santu musyasirqan Tayta Dios kachamushqan Cristuta rikaykurraq wanunanpaq kashqanta. 27Sayno tantiyasiptinmi templuman Simeón aywarqan. Saymannami Maríawan José Tayta Diospa leynincho nishqanta cumpliyänanpaq Jesústa chäsiyarqan. 28Saychömi itita marqarkur Tayta Diosta alabar Simeón nirqan:

29<<Tayta Dios, nimashqaykita cumplishkankinami.

Kananqa kushishnami wanukushaqpis.

30Kachamushqayki salvadorta rikashkänami.

31Payta kachamushkanki maysaycho taq runakunata salvanaykipaqmi.

32Mana Israel runakunapaqpis aksimi kanqa.

Pay kayninpami kuyashqayki Israel runakunapis reqish kayanqa>>.

33Simeón nishqankunata wiyarmi Joséwan María kushikuyarqan. 34Nirkurmi Tayta Diosta Simeón manakurqan bendicionninta paykunaman churamunanpaq. Jesúspa maman Maríatami nirqan: <<Kay itita Tayta Dios churamush wakin Israel mayinsikunata salvananpaq y wakintana juzgananpaq. Paytaqa aska runakunami chikiyanqa. 35Saynöpami runakuna alita o mana alita yarpäyashqanpis musyakanqa. Sayno päsaptinmi shonquyki espädawan tuksishnöraq nananqa>>.

36Templu patiuchömi Tayta Diospa profëtan Ana jutiyuq chakwanpis kaykarqan. Paypa taytanmi Aser trïbupita Fanuel karqan. Payqa qanchis watalami runanwan tarqan. 37Saypita puwaq chunka chusku (84) watanami viüdala täkurqan. Templu patiupita mana yarquypami paqasta junaqtapis ayunashpan Tayta Diosta manakuq. 38Simeón manakuyta ushaskiptinmi Anapis Jesús kaqman chaykur Tayta Diosta agradëcikurqan. Nirkurmi Tayta Dios kachamushqan Cristuta shuyaraykaq runakunata nirqan: <<Kay itimi shuyaraykashqansi salvakuq kaykan>>.

39Tayta Diospa leynincho nishqanno cumplirkurnami Joséwan María Galileacho kaykaq Nazaret markanman kutikuyarqan. 40Tayta Dios yanapaptinmi winaylanta shumaq yarpayyuq y kalpayuq Jesús rikakurqan.

Templucho Jesústa tariyashqan

41Cada watami Jesúspa taytanwan maman Pascua fiestapaq Jerusalénman aywayaq. 42Chunka ishkay watayuqna kaykaptinmi Israel runakunapa costumbrin kashqanno Pascua fiestaman Jesústapis pushayarqan. 43Fiesta ushaynami Joséwan María markanpana kutikuyarqan. Jerusaléncho Jesús quëdakushqantaqa manami cuentata qokuyarqansu. 44Saymi wakin runakunawan Jesús aywaykashqanta yarpäyashpan juk junaq qoyati aywaykashqanchöraq Jesústa watukayarqan. Saymi ayllunkunacho y reqinakuyashqanchöpis ashiyarqan. 45Mana tariykurmi Jerusalénman ashiq kutiyarqan.

46Kimsa junaqtaraqmi templucho kaykaqta Jesústa tariyarqan. Saychömi ley yachasiqkunawan tapunakur jamaraykänaq. 47Ali yachaq kaptin y tapuyashqanta contestaptinmi wiyaqkuna espantash rikakuyarqan. 48Saycho tariykurmi taytanwan maman fiyupa espantash rikakuyarqan. Mamanmi nirqan: <<¿Imanirtaq kaycho quëdakuykurqayki, hïju? Fiyupa lakishqami ashir puriyashkä>>.

49Sayno niptinmi Jesús nirqan: <<¿Imanirtaq ashiyämashkanki? ¿Manaku musyayanki Taytäpa wayincho kanäpaq kashqanta?>>

50Sayno niptin paykuna manami tantiyayarqansu imanir sayno nikashqantapis.

51Saypitanami paykunawan Nazaretman Jesús kutikur mandunta rurar tarqan. Mamanqa lapan ima päsashqankunatapis shonqulanchömi yarpararqan. 52Winaylantami Jesús mas yachaq rikakurqan. Saymi Tayta Diospis y runakunapis kuyayarqan.

Currently Selected:

Lucas 2: qvhB

Highlight

Copy

Compare