Levítico 20

Mana cäsukuqkunata castigayänanpaq nishqan

1Mastapis Moisésta Tayta Dios nirqan: 2<<Israel runakunata niy: <Pipis Moloc diospaq surinta altarcho rupasiq kaqqa wanusishqami kanqa. Say runataqa samqaypa wanusiyanki Israel runa kaptinpis o qamkunacho taq jäpa runa kaptinpis. 3Surinta Molocpaq rupasirqa Sagrädu Toldutami impüruyäsin y kikïtapis manakaqmanmi churaykäman. Saymi say runapa contran rikakur ushakäsishaq. 4Mana cäsukayämashpayki say runata mana wanusiyaptikiqa 5kikïmi say runapa y ayllunkunapapis contran rikakushaq. Paykunata ushakäsishqänölami Molocta adoraq wakin runakunatapis ushakäsishaq.

6<< <Pipis brüjukunaman o rikakuqkunaman aywaqtaqa contran rikakur ushakäsishaqmi.

7<< <Noqami Tayta Diosniki kä. Saymi qamkunapis nishqäkunata cäsukur santu kayänayki. 8Leynïkunata lapanta cumpliyay. Noqa Tayta Diosmi qamkunata akrashkä santu kayänaykipaq.

9<< <Pitapis mamanta o taytanta mana respitaq kaqtaqa wanusiyanki.#Éxo. 21.17; Mat. 15.4; Mar. 7.10. Sayno wanusish kananpaqqa kikinmi jusayuq kanqa.

10<< <Pipis runa mayinpa warminwan kakuptinqa say runata y warmitapis wanusiyanki.#Éxo. 20.14; Lev. 18.20; Deut. 5.18; 22.22-24; Juan 8.5.

11<< <Pipis madrastanwan kakurqa papäninta manami respitansu. Say niraq runataqa madrastantinta wanusiyanki. Sayno wanusish kayänanpaq kikinkunami jusayuq kayanqa.#Lev. 18.8; Deut. 22.30; 27.20.

12<< <Pipis lumsuyninwan kakuptinqa lumsuynintinta wanusiyanki. Sayno rurashqan pasaypa jusami kaykan. Wanusish kayänanpaq kikinkunami jusayuq kayanqa.#Lev. 18.15.

13<< <Pipis olqupura warmiwanno kakuptinqa ishkanta wanusiyanki. Sayno rurashqan pasaypa jusami kaykan. Wanusish kayänanpaq kikinkunami jusayuq kayanqa.#Lev. 18.22.

14<< <Pipis mamay wawata manijarqa pasaypami jusalikuykan. Sayno jusalikuyashqanpita kimsanta kawaykaqta rupasiyanki. Sayno rupasiyaptikimi mansapakur mamay wawata manana pipis manijanqanasu.#Lev. 18.17; Deut. 27.23.

15<< <Pï runapis uywawan kakuptinqa uywatapis runatapis wanusiyanki.

16<< <Pï warmipis uywawan kakuptinqa uywatapis warmitapis wanusiyanki. Sayno wanusish kayänanpaq kikinkunami jusayuq kayanqa.#Éxo. 22.19; Lev. 18.23; Deut. 27.21.

17<< <Pipis mamalapita o taytalapita paninwan kakurqa mana respitar pasaypa penqakuypaqmi jusalikun. Say runata panintinta runakunapa nawpancho wanusiyanki. Sayno wanusish kayänanpaqqa kikinkunami jusayuq kayanqa.#Lev. 18.9; Deut. 27.22.

18<< <Pipis killa qeshyanwan kaykaq warmiwan kakuqtaqa warmitapis olqutapis Israel runakunapita qarquyanki. Sayno qarquyanki yawarnin aywaykaq warmiwan kakushqanpita y warmipis yawarnin aywaykaptin chaskipashqanpita.#Lev. 18.19.

19<< <Manami pipis mamanpa nananwan o papäninpa paninwan kakunmansu. Legïtimu ayllunwan kakurqa ishkanmi jusayuq kayanqa.

20<< <Pipis tiyunpa warminwan kakurqa tiyunta manami respitansu. Sayno rurarqa olqupis warmipis jusayuq kar wamraynaqlami wanuyanqa.#Lev. 18.12-14.

21<< <Pipis wawqinpa warminta suwaq kaqqa wawqinta manami respitansu. Sayno rurar pasaypa jusalikushqanpita wamraynaqlami kayanqa.#Lev. 18.16.

22<< <Leynïkunata y mandamientükunata lapanta cumpliyanki. Cumpliyaptikiqa entreganäpaq kaq nacionpita manami pipis qarquyäshunkisu. 23Say nacioncho taq runakuna jusalikuyaptinpis qamkuna ama jusalikuyankisu. Rabyanäsimar jusalikuyashqanpitami paykunata ushakäsishaq. 24Qamkunata promitiykä say runakuna täyashqan markakuna herenciaykikuna kananpaqmi. Say markakunacho lichipis abëjapa mishkinpis yakunöraqmi aska kaykan.

<< <Noqa Tayta Diosniki karmi aska nación kaykaptinpis qamkunalata akrashkä munashqäno kawayänaykipaq. 25Sayno akraykaptïqa impüru kaq uywakunata, impüru kaq pishqukunata, pachalanpa y lätaypa puriqkunatapis ama mikuyankisu. Tantiyakuyay mayqan uywakunawan mayqan pishqukuna püru kayashqanta y impüru kayashqantapis.#Lev. 11.2-47; Deut. 14.4-20. Impüru kaqkunata mikurqa impürumi rikakuyanki. 26Noqa Tayta Diosniki santumi kaykä. Santu kaykaptïqa qamkunapis santu kayay. Aska nación kaptinpis makïcho kawayänaykipaq qamkunatami akrashkä.

27<< <Almawan parlaptin o brüju kaptinqa olqu kaptinpis warmi kaptinpis samqaypa wanusiyanki. Sayno wanusish kayänanpaq kikinkunami jusayuq kayanqa> >>.

Currently Selected:

Levítico 20: qvhB

Highlight

Copy

Compare