Levítico 18

Ayllunwan mana kakuyänanpaq nishqan

1Mastapis Moisésta Tayta Dios nirqan: 2<<Israel runakunata kayno niy: <Noqami qamkunapa Tayta Diosniki kaykä. 3Egiptucho tar rikayashqayki costumbrikunata ama rurayankisu. Pushaykashqä Canaánman charpis saycho taq runakunapa costumbrinkunata ama rurayankisu. Paykuna kawayashqannöqa ama kawayankisu. 4Noqa nishqäkunata cäsukuyay. Leynïkunata cumpliyay. Nishqannöla kawayay. Noqami Tayta Diosniki kaykä. 5Leynïkunatapis nishqäkunatapis cumpliyay. Leynïkunata cumpliq kaq runaqa lapantami cumplinman.#Neh. 9.29; Eze. 18.9; 20.11-13; Rom. 10.5; Gál. 3.12. Noqami Tayta Dios kaykä.

6<< <Mayqaykipis aylluykiwan ama kakunkisu. Noqami Tayta Dios kaykä.

7<< <Mamaykiwan ama kakunkisu. Mamaykiwan kakurqa taytaykita manami respitaykankisu. Saytaqa manachi ruraykunkimansu.

8<< <Madrastaykiwan ama kakunkisu. Sayta rurarqa taytaykita manami respitaykankisu.#Lev. 20.11; Deut. 22.30; 27.20.

9<< <Panikiwan kakunkisu. Taytalaykipita o mamalaykipita paniki karpis ni juklächo yurish karpis yawarnikimi kaykan.#Lev. 20.17; Deut. 27.22.

10<< <Wilkaykiwanpis ama kakunkisu. Olqu surikipita karpis o warmi surikipita karpis wilkaykiqa yawarnikimi kaykan.

11<< <Papänikipa surïpakuyninwanpis ama kakunkisu. Paniki karmi yawarniki kaykan.

12<< <Papänikipa paninwanpis ama kakunkisu. Payqa tiyayki kar yawarnikimi kaykan.

13<< <Mamaykipa nananwanpis ama kakunkisu. Payqa tiyayki kar yawarnikimi kaykan.

14<< <Papänikipa wawqinpa warminwanpis ama kakunkisu. Payqa tiyaykimi kaykan.#Lev. 20.19-20.

15<< <Surikipa warminwanpis ama kakunkisu. Payqa lumsuynikimi kaykan.#Lev. 20.12.

16<< <Wawqikipa warminwanpis ama kakunkisu. Payqa cuñädaykimi kaykan.#Lev. 20.21.

17<< <Mamantinta entenädaykita manijankisu. Entenädaykipa wawanwanpis y entenäduykipa surinwanpis ama kakunkisu. Paykunaqa warmikipa yawarninmi kaykan. Sayqa pasaypa penqakuypaqmi kaykan.#Lev. 20.14; Deut. 27.23.

18<< <Warmikipa nananwan ama kakunkisu. Warmiki kawaykaptin nanantinta sararaptikiqa kikinpurami chikinakuyanqa.

19<< <Killa qeshyanwan kaykaq warmiwan ama kakunkisu.#Lev. 20.18.

20<< <Jukpa warminwan ama kakunkisu. Sayno kakurqa seqaypa jusayuqmi rikakunki.#Lev. 20.10.

21<< <Moloc diospaq surikitapis ama rupasinkisu. Sayno rurarqa manami respitaykämankisu.#Lev. 20.1-5. Noqami Tayta Dios kaykä.

22<< <Olqupura ama kakunkisu. Sayqa penqakuypaq jusami kaykan.#Lev. 20.13.

23<< <Ima uywawanpis ama kakunkisu. Warmipis uywakunawan ama kakunqasu. Sayqa pasaypa penqaypaq jusami kaykan.#Éxo. 22.19; Lev. 20.15-16; Deut. 27.21.

24<< <Mayqaykipis saykunata rurarqa impürumi rikakuyanki. Yaykuyänaykipaq kaq markakunacho taq runakunatapis sayno impüru kayashqanpitami nawpaykikunapita qarqushaq. 25Sayno jusalikur impüru kayaptinmi nacionninpis impüru kaykan. Saymi say runakunata castigar markankunapita qarqurishaq. 26Nishqäkunata y leynïkunata cumpliyashpayki say runakuna penqaypaq jusalikuyashqannöqa ama jusalikuyankisu. Saynöla qamkunacho taq jäpa runakunapis cumpliyäsun.

27<< <Canaánman manaraq chäyaptikimi saycho taq runakuna penqaypaq jusalikuykäyan. Saymi nacionninpis impüru kaykan. 28Qamkunapis nacionnikita impüruyäsiptikiqa say runakunata qarqushqänömi qamkunatapis qarquyäshayki. 29Pipis say penqakuypaq jusakunata jusalikuq kaqqa Israel runakunapita qarqushqami kanqa. 30Sayno kaptinqa nishqäkunata cäsukuyay. Täyänaykipaq kaq nacionman chäyashpayki saycho taq runakuna jusalikuyashqankunata ama rurayankisu. Sayno rurarqa impürumi rikakuyanki. Noqami Tayta Diosniki kaykä> >>.

Currently Selected:

Levítico 18: qvhB

Highlight

Copy

Compare