Levítico 10
10
Nadabwan Abiú wanuyashqan
1Aarónpa surinkuna Nadabwan Abiúmi inciensu qoshnisikuyänankunaman shanshatawan inciensuta winaykur Tayta Diospa nawpancho#Lev. 6.14. qoshnisiyarqan. Isanqa manami pay munashqannösu qoshnisiyarqan. 2Saymi Tayta Diospa nawpanpita nina shamur paykunata rupar wanusirqan. 3Saypitanami Aarónta Moisés nirqan: <<Tantiyakuy Tayta Dios kayno nishqanta:
<< <Nawpäman yaykamuqkuna santu kashqäta tantiyakuyäsun.
Israel runakunatami musyasishaq munayyuq kashqäta> >>.
Sayno niptinmi Aarón imatapis parlakurqansu.
4Saypitanami Aarónpa tiyun Uzielpa surin Misaelta y Elzafánta qayaykasir Moisés nirqan: <<Tinkuna Toldu kaqcho aylluykikuna wanush jitaraykaqta jorqur campamentupita jukläman apayay>>.
5Moisés sayno niptinmi sotänanpita wintuypa campamentupita jukläman apayarqan.
6Nirkurnami Moisésqa Aaróntawan Aarónpa surinkuna Eleazarta y Itamarta nirqan: <<Qamkunapis mana wanuyänaykipaq wanupakuyashqaykipita tinsha uma ama puriyaysu ni mödanaykikunatapis ama rachiyaysu. Lütuyaptikiqa Tayta Dios rabyashpan lapan runakunatami castiganqa. Paykunata Tayta Dios sayno wanusishqanpita Israel aylluykikunalami lütuyanqa. 7Qamkunataqa Tayta Diosta sirviyänaykipaqmi sagrädu aceitita winapashkä. Payta sirviyänaykipaq kaykarqa Tinkuna Toldu patiupita ama witikuyaysu. Saypita witikurqa wanuyankipaqmi>>.
Sayno niptinmi Moisés nishqannöla paykuna rurayarqan.
8Saypitanami Aarónta Tayta Dios nirqan: 9<<Kikikipis ni surikikunapis Tinkuna Tolduman yaykuyänaykipaq kaykarqa vïnuta ni ima shinkäsikuqtapis ama upyayankisu. Shinkash yaykurqa wanuyankipaqmi. Say nishqäkunaqa imayyaqpis leymi qamkunapaq y qamkunapita miraqkunapaqpis kanqa. 10Cüra kaykarqa tantiyakunki imapis sagrädu kashqanta y mana sagrädu kashqanta. Saynöpis tantiyakunki imapis püru kashqanta y impüru kashqanta. 11Nirkur Israel runakunata shumaq yachasinki Moisésta nishqä leynïkunata>>.
Mikuyänanpaq kaqta Eleazar y Itamar mana mikuyashqan
12Saypitanami Aarónta y surinkuna Eleazarta y Itamarta Moisés nirqan: <<Tayta Diospaq saki mikuy ofrendata rupasiyänaykipaq apayämushqan pusuq kaqtaqa sagrädu kaptin levadüraynaqta altarpa nawpancho mikuyanki. 13Tayta Diospaq apayämushqan ofrendakunapita qampaqwan surikikunapaq destinash kaptin say sagrädu lugarlacho mikuyanki.#Lev. 6.14-18. Sayno kananpaqmi Tayta Dios nimash.
14<<Israel runakuna jawka kawakuy sacrificiupaq pishtayashqan uywapa qasqunpis#10.14 Wakin runakunaqa pëchunpis niyan. chankanpis mikuyänaykipaqmi kanqa. Saynöla surikikuna warmipis olqupis mikuyanqa. Saykunaqa derëchuykimi kaykan. Say qasquta Tayta Diospa nawpancho wakman kayman kuyusish kaptin y say chankan paypaq rakish kaptinmi püru sitiucho mikuyanki. 15Manaraq mikurmi say aluq kaq chankanta Tayta Diospaq rakinki y qasquntana paypa nawpancho ishkan makikiwan joqarkur wakman kayman kuyusinki. Saynöpis pishtashqayki uywapa wirantapis rupasinki. Tayta Dios nishqannömi qamkunapa y qamkunapita miraq cürakunapa derëchun imayyaqpis kanqa>>.
16Saypitanami Aarónta Moisés tapurqan: <<Purificasina sacrificiupaq apamushqan chïvupa pusuq kaq aysanqa ¿mayta?>> nir.
Chïvupa aysanta mikuyänanpa trukan rupasiyashqanta musyaykurmi Aarónpa surinkuna Eleazarta y Itamarta Moisés olqutupar nirqan: 17<<¿Imanirtaq purificasina sacrificiupaq apayämushqan uywapa aysanta sagrädu lugarcho mikuyashkankisu? Say aysaqa sagrädumi. Saytaqa qamkunatami Tayta Dios qoyäshushkanki Israel runakunapa jusanpita altarcho rupasiptiki perdonash kayänanpaq.#Lev. 6.24-26. 18Say uywapa yawarninta Tinkuna Toldu rurinman mana apaykarqa wilashqänöla sagrädu lugarcho aysanta mikuyankiman karqan>>.
19Sayno niptinmi Aarón nirqan: <<Kanan junaqmi purificasina sacrificiuta y rupasina sacrificiuta Tayta Diospa nawpancho rupaykäsiyashqancho surïkuna wanuyash. Sayno wanupakush karmi purificasina sacrificiupaq apamushqan uywapa aysanta mikushkäsu. Mikuptïqa ¿Tayta Dios munashqannösuraq kanman karqan?>>
20Sayno niptin Moisés manami imatapis parlakurqannasu.
Currently Selected:
Levítico 10: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
