Josué 2

Rikapakayämunanpaq Jericóman Josué kachashqan

1Sitimpita#2.1 Sitimqa Jericó simpan Moab pampachömi karqan. Saychömi Israel runakuna campamentunkunata sharkasiyarqan. Saypita musyanaykipaq liyinki Núm. 33.48-49. ishkay runakunata rikapakamuq Jordán mayu wak simpanman Josué kacharmi nirqan: <<Jericó marka y wakin markakuna imano kashqantapis rikapakuq aywayay>>.

Sayno niptin aywarmi Rahab#Heb. 11.31; Stg. 2.25. warmipa wayinman chaykur saylacho posädakuyarqan. Rahabqa prostitüta warmimi karqan.

2Rikapakuqkuna Rahabpa wayinman chäyashqanta rikaykurmi juk runa Jericó markapa mandaqnin reyta wilar nirqan: <<Imano atacamänansipaqpis rikapakuqmi kanan tardi Israel runakuna chäyämush>>.

3Sayno wilaptinmi Rahabpa wayinman runakunata kacharqan kayno niyänanpaq: <<Wayikiman posädakamuq runakunata qarqamuy. Paykunaqa markansita rikapakuqmi shayämush>>.

4Rey kachashqan runakuna chäyänanpaqqa maynami rikapakuq runakunata Rahab pakaykushna kash. Saymi paykunata nirqan: <<Rasunpaypami runakuna näqa chäyämush. Isanqa maypita kayashqantapis manami musyashkäsu. 5Pasa sakaykaptinna marka yaykuna sawan punkuta wichqananpaqna kaykaptinmi aywakuyash. Manami musyäsu maypa aywakuyashqantapis. Jukla qatiparqa taripaskiyankimi>>.

6Sayno nirpis Rahabqa altusnincho muntunaraykaq lïnu päja rurinchömi say ishkay runakunata pakaraykäsirqan.

7Rahab nishqanta criyirmi rey kachashqan runakunaqa taripayta yarpar Jordán mayu väduyaq aywayarqan. Yarquriyaptilannami Jericó markaman yaykuna sawan punkuta jukla wichqayarqan.

8Saypitanami ishkay rikapakuq runakuna manaraq punukäyaptin pakaraykäyashqanman wisarkur Rahab nirqan: 9<<Shamuykäyashqaykita musyar kaycho taq runakuna pasaypa mansariyaptinmi tulunkunapis suksukyanraq. Saymi tantiyakü kay markata y wakin markakunatapis Tayta Dios qoykuyäshunaykipaq kashqanta. 10Musyayämi Egiptupita yarqayämuptiki Puka Lamarta päsayämunaykipaq Tayta Dios sakisishqanta.#Éxo. 14.21. Saynöpis musyayämi Jordán mayu simpan amorreo runakunapa mandaqnin reykuna Sehónta y Ogta soldädunkunatawan wanusiyashqaykita.#Núm. 21.21-35. 11Tayta Diosninsiqa jana pasachöpis kay pasachöpis lapanpaq munayyuqmi kaykan. Pay yanapäyäshushqaykita musyarmi mansayäshushpayki pipis qamkunawan pelyayta almitinsu.

12<<Saymi ruwakulä: Tayta Diospa jutincho promitiyämay qamkunata ali rikashqänöla lapan ayllükunata ali rikaykayämänaykipaq. Kuyapämänaykipaq kashqanta awnimarqa ima señal-latapis kachapaykayämay. 13Taytäta, mamäta, turïkunata, nanäkunata y paykunawan kaqkunata ama wanuykasiyankisu>>.

14Sayno ruwakuptinmi niyarqan: <<Kay parlashqansita pitapis mana wilapaptikiqa noqakunapis qamkunata sapäyäshaykimi. Tayta Dios kay markakunata makïkunaman churamuptinqa imaypis alimi rikayäshayki>>.

15Sayno wilanakuskirmi Rahabqa ishkay rikapakuq aywaqkunata waskawan warkuypa ventänanpa uräsirqan. Sayno uräsirqan marka murälla janancho wayin kaptinmi. 16Manaraq uräsirmi paykunata nirqan: <<Ashiyäshuqniki runakuna mana tariyäshunaykipaq jalqakunaman aywaykur paykuna kutiyämushqanyaq kimsa junaq pakaräkuyay. Saypita isanqa aywakuyanki>>.

17Sayno niptinmi niyarqan: <<Noqakuna lapan promitiyashqätami cumpliyäshaq. 18Jericó markaman Israel runakuna yaykayämunan junaq kay uräsiyämashqayki ventänaman kay puka watuta watanki. Say junaq wayikiman shuntakäyanki taytaykiwan, mamaykiwan, turikikunawan y lapan castaykikunawanpis. 19Wayikicho kaqkunataqa manami mayqantapis wanusiyanqasu. Wayikipita yarquq kaqmi isanqa kikin jusayuq kanqa wanusiyaptin. Kay wayikicho kaykaqta pitapis wanusiyaptinqa noqakunami jusayuq kayäshaq. 20Kanan parlashqansita pitapis wilapaptikimi isanqa kay promitiyashqäta cumpliyäshaqsu>>.

21Saymi Rahab nirqan: <<Niyashqaykinöchir rurashaq, taytakuna>>.

Sayno wilanakuskirmi paykuna aywakuyarqan. Aywakuyaptinnami say puka watuta ventänaman jukla watarqan.

22Nirkurnami say ishkay rikapakuq aywaqkuna jalqakunaman aywaykur kimsa junaqyaq pakaräyarqan. Pakakuykuyaptinmi ashiq runakuna mayjina ashirpis mana tariyashpan Jericóman kutikuyarqan. 23Saynami ishkan rikapakuq aywaqkuna jalqakunapita urämur Jordán mayuta simpayarqan. Josué kaqman kutiykurnami ima päsashqantapis wilar 24niyarqan: <<Tayta Diosmi say markakunata makinsiman churamush. Yaykunansipaq kaqta musyarmi maysaycho taq runakunapis pasaypa mansariyashpan suksukyaykäyan>>.

Currently Selected:

Josué 2: qvhB

Highlight

Copy

Compare