Juan 7
7
Wawqinkunapis Jesúsman mana criyiyashqan
1Saypitanami Galileacho kaykaq markakunapa Jesús purirqan. Judea provinciapami isanqa aywayta munarqansu Israel autoridäkuna wanusiyta munayaptin.
2Israel runakunapa Ramäda fiestanpaq#Lev. 23.34; Deut. 16.13. walka junaqlana pishiykaptinmi 3wawqinkuna Jesústa niyarqan: <<Milagru rurashqaykita discïpuluykikuna rikayänanpaq Judeaman ayway. 4Reqish kayta munarqa manami kaylachösu milagruta rurankiman, sinöqa lapan runakuna rikayänanpaq ruray>>.
5Jesúspa wawqinkuna payman mana criyiyashpanmi sayno niyarqan.
6Saymi wawqinkunata Jesús nirqan: <<Noqa aywanäpaq manami hörä chämunraqsu. Qamkunami isanqa imay hörapis aywayankiman. 7Qamkunataqa runakuna manami chikiyäshunkisu. Noqatami isanqa jusayuq kayashqanta niptï chikiyäman. 8Say fiestamanqa qamkunala aywayay. Noqa aywanäpaq manami hörä chämunraqsu>>.
9Sayno nirmi Galileacho Jesús quëdakurqan.
Ramäda fiestaman Jesús aywashqan
10Wawqinkuna aywaskiyaptinnami Jesúspis pakaylapa Ramäda fiestaman aywarqan. 11Fiestacho Jesústa ashirpis mana tarirmi Israel autoridäkuna niyarqan: <<¿Maychöraq say runa kaykan?>>
12Jerusaléncho shuntakaykaq wakin runakunaqa Jesús ali runa kashqantami niyarqan. Wakinnami niyarqan lutanta yachaykäsishqanta. 13Isanqa Israel autoridäkunata mansakuyashpanmi kikinpura pakaylapa parlayarqan.
14Fiesta pulancho kaykaptinnami templu patiuman yaykur Jesús yachasiyta qalaykurqan. 15Yachasishqanta wiyaykurmi Israel runakuna admirakuyashpan niyarqan: <<Ley yachasiqkunawanpis mana puriykarqa ¿imanöpataq kay runa sayläya yachaykun?>>
16Sayno niyaptinmi Jesús nirqan: <<Noqa yachasishqä manami yarpayläpitasu kaykan, saypa trukanqa kachamaqnï Tayta Diospitami. 17Pipis Tayta Dios munashqanta rurayta munarqa yachasishqäkuna Diospita kashqanta o yarpayläpita kashqantapis tantiyakunqami.
18<<Kikinpa yarpaylanpita yachasiqkunaqa alabash kayta munalarmi yachasiyan. Noqami isanqa kachamaqnï Tayta Dios alabash kananpaq rasun kaqlata parlaykä. 19Qamkunaqa Moisés qelqashqan leykunata chaskikurpis manami mayqaykipis cumpliyankisu. ¿Imanirtaq wanusimayta munaykäyanki?>>
20Niptinmi runakuna niyarqan: <<¿Pitaq qamta wanusiyta munaykäshunki? ¡Supay imachir qamta löcutaykäsishunki!>>
21Saymi Jesús nirqan: <<Jamay junaqcho milagruta rurashqäpitami#Juan 5.1-9. qamkuna rabyanäyanki. 22Tantiyakuyay. Olqu wamrata señalanansipaqmi Moisés yachasirqan.#Lev. 12.3. (Moisés yachasiptinpis say costumbri karqan Abrahampita pasami.)#Gén. 17.10. Moisés qelqashqankunata cumplir ¿manaku jamay junaq kaptinpis olqu wamrata señalayanki? 23Olqu wamraykikunata jamay junaqchöpis señalaykarqa ¿imanirtaq rabyapaykäyämanki jamay junaqcho qeshyaq runata aliyäsishqäpita?#Juan 5.9-10, 16. 24Shumaq mana tantiyarqa lutanta ama parlayaysu. Shumaq tantiyakuykur parlayay>>.
Maypita kashqantapis Jesús wilakushqan
25Saymi Jerusaléncho taq wakin runakuna niyarqan: <<¿Manaku kay runataqa wanusiyänanpaq ashiykäyan? 26Lapanpa nawpancho yachasiptinpis ¿imanirtaq pipis rimapansu? ¿Tayta Dios kachamushqan Cristo kashqantasuraq autoridäkunapis yarpaykäyan? 27Sayno kaptinpis musyansimi may markapita kashqantapis. Tayta Dios kachamushqan Cristo shamuptinqa maypita kashqantapis manami pipis musyanqasu>>.
28Sayno parlaykäyashqanta musyarmi templu patiucho yachaykäsishqancho Jesús sinchipa nirqan: <<Pï kashqäta reqiyämaptikipis y maypita shamushqäta musyayaptikipis manami kikïpa munayläpitasu shamushkä, sinöqa Tayta Dios kachamaptinmi shamushkä. Payta manami reqiyankisu. 29Pay kachamash kaptinmi noqa reqï>>.
30Sayno niptinmi autoridäkuna Jesústa prësu sarisiyta munayarqan. Isanqa höran manaraq kaptinmi sariyarqansu. 31Aska runakunami payman criyir niyarqan: <<Tayta Dios kachamushqan Cristo shamur kay runa milagruta rurashqanpita ¿mastasuraq ruranqa?>>
Fariseukuna Jesústa prësu sariyämunanpaq kachayashqan
32Jesúspaq parlaykäyashqanta wiyaykurmi mandaq cürakunawan fariseukuna Jesústa prësu sariyämunanpaq templu täpaq wardiakunata kachayarqan. 33Prësu sariqkuna chäyänanpaqmi Jesús nikarqan: <<Walka tiempulanami qamkunawan kaykäshaq. Kachamaqnï kaqmannami aywakushaq. 34Noqa aywashqä kaqmanqa manami aywayta kamäpakuyankisu. Ashiyämashpaykipis manami tariyämankisu>>.
35Jesús sayno niptinmi Israel autoridäkuna kikinpura parlar niyarqan: <<Mana tarinansipaqqa ¿mayparaq aywakunqa? ¿Juklä nacioncho taq marka mayinsikunamansuraq yachasiq aywanqa? Saychöqa capazchir griego runakunatapis yachasinqa. 36¿Imanirtaq <ashirpis manami tariyämankisu> nikämansi? ¿Imanirtaq <aywashqäman manami chayta kamäpakunkisu> nikämansi?>>
Kawasikuq yakupaq nishqan
37 Ramäda fiestacho diya junaqmi#Lev. 23.36; Núm. 29.35. lapan runakuna wiyayänanpaq Jesús sinchipa nirqan: <<Pipis yakunaykaq kaqqa noqaman shamur upusun.#Juan 4.13-14. 38Tayta Diospa palabran nishqannömi yärakamaqkunapa shonqunpita kawasikuq yaku mayunöraq pashtamunqa>>.
39Sayno nishpanmi Jesús tantiyasirqan payman yärakuq runakuna Espíritu Santuta chaskiyänanpaq kashqanta. Say wisanqa Espíritu Santu manaraqmi shamurqanraqsu. Gloriaman Jesús kutikuptinraqmi shamurqan.
Runakuna apänakuyashqan
40Jesús sayno nishqanta wiyaykurmi wakin runakuna niyarqan: <<Moisés nishqanno shamunanpaq kaq profëtami payqa kaykan>>.#Deut. 18.15, 18.
41Wakin runakuna niyarqan: <<Payqa Tayta Dios kachamushqan Cristumi>>.
Wakin runakunanami niyarqan: <<¿Imanöpataq Galileapitaqa Cristo shamunman? 42Tayta Diospa palabranmi nikan rey Davidpa ayllunpita Cristo kananpaq kashqantami.#2Sam. 7.12-13; Sal. 89.3-4; 132.11-12. Saynöpis nikan David tashqan Belénchöraq yurinanpaq kashqantami>>.#Miq. 5.2.
43Sayno nirmi Jesúspaq apänakuyarqan. 44Wakinkuna prësu sariyta munarpis manami mayqanpis sariyarqansu.
Israel autoridäkuna mana criyiyashqan
45Saypitanami mandaq cürakuna y fariseukuna kaykäyashqan kaqman templu täpaq wardiakuna kutikuyarqan. Chäyaptinmi tapuyarqan: <<¿Imanirtaq Jesústa prësu apayämushkankisu?>> nir.
46Saymi wardiakuna niyarqan: <<¡Pay parlashqannöqa manami pipis parlansu!>>
47Sayno niyaptinmi fariseukuna niyarqan: <<¿Qamkunatapis criyisiyäshushkankiku? 48Say runataqa manami mayqan autoridäkunapis ni fariseo mayïkunapis criyiyansu. 49Moisés qelqashqan leykunata mana yachaq runakunalami paytaqa criyiyan. ¡Say runakunaqa maldicionädumi kaykäyan!>>
50Sayno niyaptinmi Jesúsman aywaq fariseo runa Nicodemo#Juan 3.1-2. nirqan: 51<<Leyninsikuna nishqannöpis pitapis acusanansipaqqa kikin parlashqantaraq puntata wiyashun y rurashqankunataraq shumaq musyashun>>.
52Saymi fariseukuna niyarqan: <<¿Qampis favornin sharkunaykipaq paypa marka mayinku kaykanki? Mä Tayta Diospa palabranta shumaq liyiy. ¡Manami imaypis nimansisu Galileapita profëta yurimunanpaq kashqanta!>>
53[Saypitanami wayinkunapana lapan kutikuyarqan.
Currently Selected:
Juan 7: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.