Jueces 21
21
Benjamín trïbu runakunata warmin ashipäyashqan
1Mizpacho kaykarmi Tayta Diospa jutincho jurayashpan Israel runakuna wilanakuyarqan Benjamín trïbu runakunawanqa mayqanpis warmi surinkunata mana täsiyänanpaq. 2Saypitanami Bet-elman aywaykur Tayta Diospa nawpancho#21.2 Tayta Diospa nawpancho nirqa Tinkuna Tolducho kaykaq altarpa nawpanchömi nikan. lakikur qoyati waqayashpan niyarqan: 3<<Kaychi kaylaqa Tayta Dios, ¿imataq päsaykayämash? Israel runakunacho juk trïbumi jinanpa kannasu>>.
4Saypita waraynin tutanami altarta ruraykur rupasina sacrificiukunata y jawka kawakuy sacrificiukunata rupasiyarqan. 5Nirkurmi niyarqan: <<Benjamín trïbu runakunawan manaraq pelyar Mizpacho shuntakash ¿mayqan marka runakunataq noqansiwan shuntakäyashsu?>>
(Mizpachömi Israel runakunaqa Tayta Diospa jutincho jurar niyarqan mayqanpis sayman mana shuntakaq runakunata wanusiyänanpaq.)
6Benjamín trïbu runakuna ushakäyashqanpita lakikurmi Israel runakuna niyarqan: <<Kanan junaqmi Israelpita juk trïbu jinanpa ushakash. 7Kawaykar quëdaq Benjamín trïbu runakuna warmiyuq kayänanpaq ¿imatataq rurashun? Noqansiqa Tayta Diospa jutinchömi jurashkansi warmi surinsikunawan paykunata mana täsinansipaq>>.
8Sayno nirkushpanmi niyarqan: <<Mizpacho sesionta rurash ¿mayqan marka runakunataq Tayta Diospa nawpancho noqansiwan shuntakäyashsu?>>
Saymi yarparkuyarqan Jabes-galaadpita ni mayqanpis mana aywashqanta. 9Say sesioncho listata qayayaptinmi Jabes-galaadpita pipis contestarqansu. 10Saymi Israel runakunaqa chunka ishkay waranqa (12,000) alinnin soldädukunata Jabes-galaadman kachar niyarqan: <<Jabes-galaadman aywar saycho kaq runakunata, warmikunata y wamrakunatapis espädawan lapanta wanusiyämuy. 11Doncëlla jipashkunata isanqa ama wanusiyankisu>>.
12Sayno niyaptinmi Jabes-galaadman aywar lapanta wanusir chusku pachak (400) doncëlla jipashkunata tarir Silo markacho kaykaq campamentuman apayarqan. Siluqa Canaánchömi kaykan.
13Nirkurmi Rimón qaqacho kaykaq Benjamín trïbu runakunaman aywaykur Israel runakunaqa ali shimilanpa shakyäsiyarqan markankunaman kutiyänanpaq. 14Saymi markankunaman kutiyaptin Jabes-galaadpita apayashqan jipashkunata warminkunapaq entregayarqan. Saypis manami lapan runakunapaq ayparqansu.
15Benjamín trïbu runakunata wanusiyänanpaq Tayta Dios yanapaptin cäsi lapanta ushakarkasirmi Israel runakuna fiyupa lakikuyarqan. 16Saymi mayor runakuna niyarqan: <<¿Imanöpataq warmita tarishun wakin kaq Benjamín trïbu runakunapaq? Paykuna trïbuqa warmikunapis chipyaqmi ushakäyash. 17Wakin quëdaq Benjamín trïbu runakunapa surinkuna mana kaptinqa Israel runakunapita chipyaqmi elaqanqa. 18Sayno kaptinpis lapansimi Tayta Diospa jutincho jurar wilanakushkansi Benjamín trïbu runakunata warmi surinsiwan täsirqa maldicionash kanansipaq. Saymi warmi surinsikunata entregashwansu paykunapa warminkuna kayänanpaq>>.
19Sayno nikäyashqanchömi yarparkuyarqan Silucho#1Sam. 1.3, 21. Tayta Diosta adorayänanpaq jatun fiesta chaykämushqanta. Siluqa karqan Bet-elpita norti kaqläpa, Lebonapita sur kaqläpa, Bet-elpita Siquemman näni aywaqpa inti jeqamunan kaqläpami. 20Saymi warmiynaq kaq Benjamín trïbu runakunata mayor runakuna niyarqan: <<Siluman aywar üva chakrakunaman pakakuykur 21rikaq rikaqla shuyaräyanki. Silo marka jipashkuna tushuyta qalaykuyaptin cada ünuyki jukta apakurkur aywakuyay chaskiyashqayki posisionnikikunaman. 22Jipashpa maman o taytan o turinkuna noqakunaman quejakamuptinqa kaynömi niyäshaq: <Paykunata perdonaykuyälay ari. Jabes-galaadcho pelyayashpä noqakunaqa warmita manami lapanpaqqa tariyashkäsu. Saynöpis paykunapa warminpaq kikikikuna mana entregaykarqa jurash karpis manami jusayuqsu kayanki> >>.
23Israel mayor runakuna yäsiyashqannölami Benjamín trïbu runakunaqa lapantapis rurayarqan. Saymi tushuykäyashqanman aywar cada ünun juk jipashta suwar warminpaq apakuyarqan. Nirkurnami chakrankunaman kutiyashpan juchusish kaykaq markankunata alsar saychöna täyarqan.
24Saypitaqa Israel runakunapis trïbunkunaman, ayllunkunaman y chakrankunamannami kutikuyarqan.
25Say wisanqa Israel runakunapa mandaqnin rey manaraqmi karqanraqsu. Saymi paykunaqa imatapis yarpäyashqanta rurakuyaq.#Jue. 17.6.
Currently Selected:
Jueces 21: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
