Génesis 39

Joséwan Potifarpa warmin kakuyta munashqan

1Ismaelita negociantikuna Egiptuman Joséta chäsiyaptinnami Potifar rantirqan. Potifar karqan Faraónpa wardiankunapa capitanninmi.

2 Tayta Dios paywan kaptinmi#Hech. 7.9. José rurashqanqa lapanpis ali karqan. Saynöpis patronninpa wayinchömi tarqan. 3Tayta Dios yanapaykashqanta tantiyarmi 4patronnin seqaypa kuyar Joséta churarqan wayincho capataz kananpaq y lapan imaykankunatapis rikananpaq. 5Saypita pasami Potifarta Tayta Dios yanaparqan. Saymi imaykankunapis askayäyarqan y mikuyninpis shumaq wayurqan. 6Lapan imaykantapis Josépa makinman churaykur Potifar manami yarpachakurqannasu wayincho kaq aruyninkunapaq.

Joséqa kuyaylapaq maqtami karqan. 7Saymi Potifarpa warmin kuyakurkushpan Joséta nirqan: <<¡Noqawan kakushun!>>

8Sayno niptinmi José nirqan: <<Saytaqa manami ruraykümansu, mamïta. Patronnï yärakamashpanmi lapanta rikanäpaq makïman churamush. Saymi lapantapis shumaq rikaptï tranquïlu purikun. 9Patronnï manami noqata yärakamashqannöqa pitapis yärakunsu. Qamtami isanqa warmin kaptiki makïman churamushushkankisu. Sayno yärakaykämaptinqa ¿imanöparaq Tayta Diosta rabyanäsir jusaliküman?>>

10José sayno niptinpis say warmiqa waran waranmi qatiraq. Sayno qatiraptinpis Joséqa manami paywan punuyta ni cäsupaytapis munarqansu. 11Saymi juk kuticho rurayninkunata rurananpaq wayiman José yaykurqan. Say höra manami pipis wayicho karqansu. 12Saymi Joséta mödananpita aptakurkur Potifarpa warmin nirqan: <<¡Kanan jukla punushun!>>

Sayno nir aptakurkuptinmi mödananta loqtiriykur qeshpir aywakurqan.

13Mödananta loqtiriykur qeshpiskiptinmi 14Potifarpa warmin ashmayninkunata qayaykur nirqan: <<¡Runä apamushqan maqta manami respitamansisu! Kaykashqäman yaykaykamur fuerzamayta munaptinmi fiyupa qaparashkä. 15Saymi mödananta kachariykur qeshpir aywakush>>.

16Sayno wilaparkurmi Josépa mödananta runan kutimushqanyaq churarqan. 17Chaykuptinnami ashmayninkunata wilashqannöla runantapis wilapar nirqan: <<Say rantimushqayki hebreo maqta punukunäman yaykaykamurmi fuerzamayta munash. 18Qaparaptïmi mödananta kachariykur qeshpir aywakush. 19Saynömi imaykaykitapis rikananpaq churashqayki ali ashmayniki portakush>>.

Warmin sayno wilaptinmi Potifar fiyupa rabyarqan. 20Saymi Faraónpa ashmayninkuna wichqaräyashqan carcilman Joséta wichqasirqan.

21Joséta Tayta Dios yanapaptinmi#Hech. 7.9. cárcel cuidaq runapis paywan yachanänakuyarqan. 22Saymi lapan prësukunata Josépa makinman carcilcho mandaq churarqan. Joséraqmi prësukuna imata rurayänanpaqpis mandaq. 23Tayta Dios yanapaptinmi imapis José rurashqan ali karqan. Saymi cárcel cuidaq runaqa Josépa munaynincho kaqkunapaq yarpachakuqnasu.

Currently Selected:

Génesis 39: qvhB

Highlight

Copy

Compare