Génesis 26

Gerar markacho Isaac tashqan

1Say wisan fiyupa muchuymi karqan. Say karqan Abraham kawashqan wisan kashqannömi.#Gén. 12.10. Sayno kaptinmi Gerar markaman Isaac aywakurqan. Gerarchömi filisteo runakunapa mandaqnin rey Abimelec tarqan. 2Saychömi Tayta Dios yuriparkur Isaacta nirqan: <<Egiptuman ama aywaysu. Tänaykipaq nishqä partilachöraq 3jäpa runano täkuykay. Noqa imaypis qamwanmi kaykäshaq.#Gén. 26.24; 28.15; 31.3; 39.2. Saynöpis qamta bendicionnïta qoshpämi qamta y qampita miraqkunata kay intëru jalqakunata y raqrakunata qoykushaq. Saynöpami cumplishaq papäniki Abrahamta promitishqäta. 4Qoyllarkunano yupaytapis mana atipaypaq kayänanpaqmi qampita miraqkunata rikashaq. Kay intëru jalqakunata y raqrakunata paykunatami qoykushaq. Paykuna kayninpami lapan nación runakunapis bendicionnïta chaskiyanqa.#Gén. 12.1-3; 13.14-15; 15.18-21; 22.16-18. 5Sayno kanqa mandamientükunata, leynïkunata y yachasishqäkunatapis Abraham cumplishqanpitami>>.

6Tayta Dios sayno niptinmi Gerarcho Isaac tarqan.

7Saycho taq runakunami Isaacta tapuyarqan Rebeca iman kashqantapis. Rebeca kuyaylapaq kaptinmi Isaac mansarir yarparqan warmin rayku runakuna wanusiyänanpaq kashqanta. Saymi Rebeca warmin kashqanta wilakurqansu. Rasun kaqta ninanpa trukan <<payqa panïmi>> nirqan. 8Saypita watakuna päsarkuptinnami filisteo runakunapa mandaqnin rey Abimelec ventänanpa rikachakuykashqancho Rebecata Isaac kuyar shulwapaykaqta rikarqan. 9Sayno rikaykurmi Isaacta qayaykasir Abimelec nirqan: <<Pay warmikimi ¿aw? Warmiki kaykaptinqa ¿imanirtaq <panïmi> nirqayki?>>

Saymi Isaac nirqan: <<Sayno nishkä warmï rayku wanusiyämänanpaq kashqanta yarparmi, taytay>>.

10Sayno niptinmi Abimelec nirqan: <<¿Imanirtaq sayno lulapämashkanki? Jinachi mayqan runapis warmikiwan pununman karqan. Sayno lulakur jinachi jusalikaykasiyämankimanpis karqan>>.

11Saypitanami lapan runakuna musyayänanpaq Abimelec nirqan: <<Kay runata o warminta pipis wajupaq kaqqa wanusishqami kanqa>>.

12Say wata Isaac saychömi murupakurqan. Tayta Dios bendicionninta churaptinmi shuntaytapis mana atipashqanyaq mikuynin wayuykurqan. 13Saynöpa Isaac seqaypa rïcuyaptinmi imaykanpis aska karqan. 14Uyshankunapis, cabrankunapis, wäkankunapis askamanmi mirayarqan. Chakranta arupäyänanpaq ashmayninkunapis askaqmi kayarqan. Sayno rïcuyaptinmi filisteo runakuna chikiyashpan 15Isaacpa taytan Abraham uchkusishqan yaku pözukunata pampar ushayarqan.

16Saypitanami Isaacta Abimelec nirqan: <<Kaypita aywakuy. Noqakunapita masmi rïcuyashkanki>>.

17Sayno niptin aywakurmi Gerar raqra nawpan pampachöna Isaac tarqan. 18Sayman chaykurmi taytan Abraham uchkusishqan pözukunata Isaac pisasirqan. Say pözukunatami Abraham wanuskiptin filisteo runakuna pampasash kayarqan. Pisarkasirnami jutinta Isaac churaparqan taytan churapashlanta.

19Say pampacho mushuq pözuta oqtiykäyashqanchömi Isaacpa ashmayninkuna chuya yakuta tariyarqan. 20Saymi Gerarcho taq uysha misiqkunawan Isaacpa uysha misiqninkuna yakuta qechunakur pelyayarqan. Saypitami Isaac say pözuta jutisirqan Esek#26.20 Esek ninanqa pelyasikuq ninanmi. nir. 21Saypita Isaacpa ashmayninkuna juk pözutanami uchkuyarqan. Say jananpis yapaymi pelyayarqan. Saymi say pözuta Isaac jutisirqan Sitna#26.21 Sitna ninanqa chikinakuy ninanmi. jutin kananpaq. 22Sayno pelyayaptinmi jukläpana aywakur saychöpis pözuta uchkusirqan. Piwanpis say janan mana pelyarnami jutisirqan Rehobot#26.22 Rehobot ninanqa jawka o tranquïlu ninanmi. jutin kananpaq. Saymi nirqan: <<Kananmi isanqa Tayta Dios yanapaykämansi kaycho jawkana kawanansipaq. Saymi wamransikunapis uywansikunapis askaman mirayanqa>>.

23Saycho taykashqanpitami Beersebaman aywakurqan. 24Sayman chashqan sakaymi Tayta Dios yuriparkur Isaacta nirqan:

<<Noqami kaykä papäniki Abraham yärakushqan Dios.

Qamwan kaykaptïqa ama mansariysu.

Sirvimaqnï Abrahamta promitish karmi bendicionnïta qoshayki.

Saynölami qampita miraqkunatapis askaman mirayänanpaq ali rikashaq>>.

25Saychömi altarta perqarkur Tayta Diosta Isaac adorarqan. Saycho taptinmi ashmayninkuna juk pözuta uchkuyarqan yakuta jipiyänanpaq.

Isaacwan Abimelec promitinakuyashqan

26Juk kutichömi Gerar markapita Abimelec aywarqan Isaacwan parlayänanpaq. Abimelecwanmi#Gén. 21.22. aywarqan yäsiqnin Ahuzat y soldädunkunapa mandaqnin Ficolpis. 27Chaykuyaptinmi Isaac nirqan: <<Ajayämar markaykicho qarqarkamar ¿imaqtaq shayämushkanki?>>

28Sayno niptinmi paykuna niyarqan: <<Noqakuna tantiyakuyashkä qamta imachöpis Tayta Dios yanapaykäshushqaykitami. Saymi pactuta ruranansipaq shayämushkä. 29Kanan promitimay imaypis ali kawanansipaq. Manami qamkunata chikiyashkäsu, saypa trukanqa imaypis alimi kawashkansi. Yarqakamurpis jawkalami shakamushkanki. Qamta Tayta Diosmi imaykachöpis yanapaykäshunki>>.

30Sayno niptinmi ali alita Isaac yanukaskasir paykunawan mikuyarqan y upuyarqan. 31Waraynin tutanami Abimelecwan Isaac juramentuta rurayarqan ali kawayänanpaq. Nirkurnami Isaac kaqpita paykuna kushish kutikuyarqan.

32Say junaqmi Isaacpa ashmayninkuna wilayarqan uchkuykäyashqan pözucho yakuta tariyashqanta. 33Saymi say pözuta Isaac jutisirqan Seba#26.33a Seba ninanqa juramentu ninanmi. jutin kananpaq. Saypitami kananyaqpis say markapa jutin kaykan Beerseba.#26.33b Beerseba ninanqa Juramentu Pözu ninanmi.

Esaúpa warminkuna

34Esaú chusku chunka (40) watayuq kaykarmi Beeripa surin Juditwan tarqan. Beeri heteo runami karqan. Saynöpis Esaú tarqan Elónpa surin Basematwan. Elónpis heteo runami karqan. 35Say warmikunawan taptinmi Isaacwan Rebeca fiyupa rabyanäyarqan.

Currently Selected:

Génesis 26: qvhB

Highlight

Copy

Compare