Éxodo 5

Moiséswan Aarón Faraón kaqman aywayashqan

1Nirkurnami Moiséswan Aarón Faraónman aywaykur niyarqan: <<Israel runakunata kuyaq Tayta Diosmi nin: <Kuyashqä runakunata kachariy sunyaq jirkaman aywaykur noqata adorayämashpan fiestata rurayänanpaq> >>.

2Sayno niyaptinmi Faraón nirqan: <<¿Pitaq say Tayta Diosniki kaykan payta cäsukur Israel runakunata <aywayay ari> ninäpaqqa? Tayta Diosnikita manami reqïsu. Israel runakuna aywakuyänanpaq manami kachapäshaqsu>>.

3Sayno niptinmi Moiséswan Aarón niyarqan: <<Hebreo runakunapa#5.3 Hebreo runakunaqa Israel runakunami karqan. Saymi Moiséspis hebreo runa karqan. Tayta Diosninmi yuripäyämash. Saymi kimsa junaq aywayta sunyaq jirkaman aywayäshaq. Saychömi Tayta Diosnïta adorar sacrificiukunata rupasiyäshaq. Sayno mana rurayaptïqa qeshyawanpis o guërrawanpis ushakäsiyämanqami>>.

4Saymi Egipto nacionpa mandaqnin rey nirqan: <<Moisés y Aarón, ¿imanirtaq runakuna ali arukuykäyaqta tiempunta perdiykäsiyanki? ¡Qamkunapis jukla aruq aywayay! 5Kaysika Israel runakuna anaw arukuykäyaptin ¿imanirtaq shimita qoykäyanki?>>

Israel runakunata mana jamasiypa arusiyashqan

6Sayno nirmi say junaqla capatazninkunata y yanapaqninkunatapis Faraón nirqan: 7<<Israel runakuna tikata#5.7 Wakin runakunaqa adöbita niyan. sutayänanpaq kananpitaqa amana päjata kamaripäyaynasu. Kikinkunana päja ashimuq aywayäsun. 8Nirkur nawpata sutashqan tareapaq ni juk tikalapis mana pishiqta sutayänanpaq obligayanki. Say runakunaqa aruyta qelanäyashpanmi <sunyaq jirkaman aywar Diosnïpaq sacrificiuta rupasiyäshaq> nikäyan. 9Saynöpis kanan junaqpitaqa Israel runakunata mana jamasiypa arusiyanki. Aruywan nitipakash karqa lulapaykäyashqantapis mananami chaskipäyanqanasu>>.

10Saymi capatazkuna y yanapaqninkuna aywar Israel runakunata niyarqan: <<Faraónmi niyämash kananpitaqa päjata manana kamaripäyänäpaq. 11Kananqa kikikikunami maypitapis päjata ashiyämunki tikata sutayänaykipaq. Nirkur nawpata sutayashqaykinöla tikata sutayanki juklaylapis mana pishiqta>>.

12Saymi Israel runakuna intëru Egiptupa mashtakäyarqan päjapa trukan punshata shuntayashpan.

13Capatazkunami niyarqan: <<Päjata kamaripäyäshuptiki tikata sutayashqaykinöla kananpis cumpliyay>>.

14Yanapaqninkuna cumplisiyta mana kamäpakuyaptinmi capatazkuna astayarqan: <<Qanyanpis ni kananpis ¿imanirtaq nawpata sutasiyashqaykino cumplisiyankisu?>> nir.

(Capatazkunapa yanapaqninkunaqa Israel runakunami kayarqan.)

15Saymi capatazkunapa yanapaqninkuna Faraónman quejakuq aywar niyarqan: <<Ashmayniki kaykäyaptïqa ¿imanirtaq fiyupa nakasiyämanki, taytay? 16Capataznikikuna päjatapis mananami kamaripäyämannasu. Sayno mana kamaripaykäyämarpis nawpata rurasiyashqänölami kananpis tareata cumplisiyänäta munaykäyan. Saynöpis maqaykäyämanmi. Päjata mana kamaripäyämashpan capataznikikunami jusayuq kaykäyan tika sutayta mana cumplisiyänäpaq, taytay>>.

17Sayno niptinmi Faraón nirqan: <<¡Qela aywash ushma runakunami kaykäyanki! Saymi <Tayta Diospaq sacrificiuta rupasiq aywayäshaq> nir puriykäyanki. 18Sayno nir puriyänaykipa trukanqa jukla aruq aywayay. Päjata manana kamaripäyäshuptikipis juktapis mana pishiqta tikata sutasiyay>>.

19Imanöpapis tareata cumplitasiyänanpaq niptinmi capatazkunapa yanapaqninkuna fiyupa lakikuyarqan. 20Faraónwan palaciuncho parlayashqanpita yarqamurmi Moiséswan Aarón shuyaykäyaqta capatazkunapa yanapaqninkuna tariyarqan. 21Saychömi niyarqan: <<Qamkunami Faraónta rabyanäsiyashkanki kayjinanpa nakasiyämänanpaq. Wanusiyämänanpaq cuchilluta aptapaq japuymi qamkuna toqipäyashkanki. ¡Sayno rabyanäsiyashqaykipita Tayta Dios castigayäshunki!>>

22Sayno niyaptinmi Tayta Diosta manakur Moisés nirqan: <<Tayta Dios, ¿imanirtaq fiyupa nakaykasinki akrashqayki runakunata? ¿Saypaqku kachamashkanki? 23Faraónwan parlaq aywashqä junaqpita pasami kuyashqayki runakunata maqa maqarkur arusiyashpan fiyupa nakaykäsiyan. Sayno nakaykäsiyaptinpis manami paykunata salvankisu>>.

Currently Selected:

Éxodo 5: qvhB

Highlight

Copy

Compare