Éxodo 25

Sagrädu Tolduta rurasinanpaq y ofrendata shuntayänanpaq tantiyasishqan

Éxodo 35.4-9

1Sinaí jirkacho kaykaptinmi Moisésta Tayta Dios nirqan: 2<<Israel runakunata ninki ofrendata noqapaq apayämunanpaq. Ofrendayta munaqkunaqa lapan voluntäninwan apayämunqa 3qorita, qellayta, broncita, 4azul, granäti y puka milwa jïlukunata, llanula puskash lïnu jïluta y cabrapa aqsanpita puskash jïlutapis. 5Saynöpis apayämunqa pukaman tiñish uysha pirqashta, fïnu qarata, acacia qeruta, 6candelabru ratananpaq aceitita, sagrädu aceitimanpis inciensumanpis takusinanpaq mushkuq jachakunata,#Éxo. 30.23-25. 7ónice rumikunata y wakin kuyaylapaq rumikunatapis. Say rumikuna kayanqa mandaq cürapa efodnintawan pectoralninta#Éxo. 28.6-30. adornayänanpaqmi.

8<<Say ofrendata churayämushqanwan Sagrädu Tolduta rurasinki. Saynöpami paykuna täyashqancho imaypis täshaq. 9Say tänäpaq Sagrädu Toldutapis manëjunkunatapis rurasinaykipaqmi rikasishayki. Lapantapis rikashqaykitanöla rurasinki.

Pactu Babulta rurasinanpaq tantiyasishqan

Éxodo 37.1-9

10<<Acacia qerupita juk babulta rurasinki. Say babulpa larguynin kanqa juk metru chunka centïmetru. Anchuyninpis altuyninpis kanqa soqta chunka pisqa (65) centïmetru. 11Jananpa y rurinpa qoriwan enchapasinki. Saynöpis intëru kuchunpa qoripita rebëtita rurarkur tumaypa churasinki. 12Qoripita chusku arguëllakunata rurarkasir churasinki chuskun chakinkunaman, ishkayta babulpa jukaq lädunman y ishkaytana babulpa jukaq lädunman. 13Acacia qerupita ishkay largu qerukunata rurarkasir qoriwan enchapasinki. 14Nirkur say qerukunata arguëlla uchkunpa päsasinki babulta wintuyänanpaq. 15Say qerukunata päsasishqaykiqa jinalanchöna kakunqa. Saypita amana jorqusinkinasu. 16Say babulman churanki pactu rurashqansita cumpliyänaykipaq kaq mandamientukunata.

17<<Babulpa sapananta qori pürulapita rurasinki. Larguynin kanqa juk metru chunka centïmetru. Anchuynin kanqa soqta chunka pisqa (65) centïmetru. 18Saynöpis martilluwan takaylapa ishkay querubinkunata qoripita rurasinki. Nirkur babulpa sapanan ishkan kuchunkunaman churasinki. 19Sapanantawan querubinkunata say piëzalata rurasinki. Jukaq querubín kanqa isuq kaqlänincho y jukaqnami kanqa aluq kaqlänincho. 20Say ishkan querubinkunami riprankuna#25.20 Wakin runakunaqa älankuna niyan. mashtash frenti frenti babulpa sapananta rikaräyanqa. Saynöpami ishkanpa riprankuna sapananta lantupäyanqa. 21Babul rurinman pactu rurashqansi mandamientukunata churaykur sapananwan saparkunki. 22Pactu Babulpa sapanan janancho ishkay querubinkuna chawpinpitami Israel runakunata imata ninaykipaq kaqtapis wilashayki.

Tanta churakuna mësata rurasinanpaq tantiyasishqan

Éxodo 37.10-16

23<<Saynöpis acacia qerupita mësata rurasinki. Say mësapa larguyninmi esqun chunka (90) centïmetru kanqa. Anchuyninnami chusku chunka pisqa (45) centïmetru kanqa. Altuyninnami soqta chunka pisqa (65) centïmetru kanqa. 24Say mësapa jananta, rurinta y chakinkunatapis qoriwan enchapasinki. Kuchunkunapapis qoripita rurash rebëtita tumaypa churasinki. 25Saynöpis qanchis centïmetru anchuta listunta tumaypa churasinki. Say jananmannami qoripita rurash juk rebëtita churasinki. 26Saynöpis chusku arguëllakunata qoripita rurarkasir mësapa chuskun chakinkunaman churasinki. 27Say arguëllakuna churaräyanqa chakinpita rebëtinman tinkuraqcho. Say arguëllakunapa ishkay largu qerunkunami päsaranqa mësata wintuyänanpaq. 28Say mësa wintukuna qerukunatapis acacia qerupita rurarkasir qoriwan enchapasinki.

29<<Say mësapaq qori pürulapita rurasinki plätukunata, wishqakunata, järrakunata y pucillukunata. Say järrakuna y pucillukunaqa vïnuta altarman winapäyänanpaqmi kanqa. 30Nawpächo kananpaq say mësaman tantata imaypis churasinki.#Lev. 24.5-8.

Candelabruta rurasinanpaqpis tantiyasishqan

Éxodo 37.17-24

31<<Saynöpis candelabruta qori pürulapita martilluwan takaylapa rurasinki. Say candelabrupa jamakunan, chakin, cöpankuna y waytankunapis juk piëzala kanqa. 32Say candelabru soqta rikrayuqmi kanqa. Kimsa rikranmi jukaq lädunpa y kimsami jukaq lädunpa kanqa. 33Cada rikrancho kimsa waytakunata rurasinki. Say waytakuna kayanqa almendrupa waytan niraqmi. 34Candelabrupa chakinchöpis chusku waytankuna kanqa. Say waytakunapis almendrupa waytan niraq kayanqa. 35Cada rikran tinkuraqcho kanqa juk wayta. 36Waytankunapis rikrankunapis say piëzala kanqa. Lapanpis qori pürulapita martilluwan takaylapa rurash kanqa.

37<<Candelabrupa qanchis mechërunkunata rurasinki. Say mechërukunata candelabrupa cada puntankunaman jukta churasinki puntanman asikyänanpaq.#25.37 Puntanman asikyarqa qori mësacho kaykaq chunka ishkay tantakunatami asikyaparqan. Sayta musyanaykipaq liyinki Éxo. 40.22, 24. 38Mëchapa liptanta jorqunanpaq taksha alicätikunapis y lipta shuntakunan plätu malwakunapis qori pürulapita kanqa. 39Say candelabruta y lapan manëjunkunata rurasinki kimsa chunka kimsa (33) kïlu qoripita.

40<<Lapanta rurasinki kay jirkacho rikasishqätanöla.#Hech. 7.44; Heb. 8.5.

Currently Selected:

Éxodo 25: qvhB

Highlight

Copy

Compare