Éxodo 13

Qechpa kaqkuna Tayta Diospaq kayashqan

1Saypitanami Moisésta Tayta Dios nirqan: 2<<Israel runakunapa qechpa kaq olqu surinkunatawan uywakunapa punta yuriq orqu wawankunatapis noqapaq apayämunki. Saykunaqa noqapami kaykäyan>>.#Éxo. 13.11-16; Núm. 3.13; Luc. 2.23.

3Saymi lapan runakunata Moisés nirqan: <<Tayta Dios munayninwan Egiptupita kanan junaq jorqamashqansita ama qonqäyankisu. Kanan junaqmi ashmay kashqansipita jorqaykämansi. Cada watapis kay junaqta yarpar levadürayuq tantata ama mikuyankisu. 4Abib killachömi yarquykansi. 5Saymi unay ayllunsikunata Tayta Dios promitishqan nacionman chaykur Abib killacho cada wata fiestata rurayanki. Saycho lichipis abëjapa mishkinpis yakunöraqmi aska kaykan. Saycho taykäyan cananeo runakuna, heteo runakuna, amorreo runakuna, heveo runakuna y jebuseo runakunami. Paykuna taykäyashqan naciontami Tayta Dios qoyäshunki.

6<<Say fiestata rurayashpayki qanchis junaqyaq levadüraynaq tantalata mikuyanki. Qanchis kaq junaqchöqa tutapita tardiyaq Tayta Diosta adorayanki. 7Qanchis junaqnintin fiestata rurayashpayki levadüraynaq tantata mikuyanki. Qamkuna täyashqaykichöqa say junaqkuna levadürapis ni levadürayuq tantapis ama kanqasu.

8<<Say junaqmi surikikunata wilapäyanki: <Kay fiestata ruraykansi Egiptupita Tayta Dios jorqamashqansita yarpashpansimi. 9Runakunapa rikrancho o urkuncho señal kashqannömi say fiestapis señal kanqa Tayta Dios qomashqansi leykunata imaypis mana qonqaypa parlanansipaq. Sayno kanqa Egiptupita munayninwan Tayta Dios jorqamashqansipitami. 10Sayno kaptinmi wata wata Tayta Dios nimashqansi junaqcho say fiestata mana qonqaypa ruransi>.

11<<Cananeo runakuna täyashqan nacionta qoyäshunaykipaqmi unay ayllunsikunatapis qamkunatapis Tayta Dios promitiyäshushkanki. Sayman Tayta Dios chaykasir entregayäshuptiki 12qechpa olqu surikikuna Tayta Diospaqmi kanqa. Saynölami uywaykikunapa punta yuriq orqu wawankunapis Tayta Diospaq kanqa.#Luc. 2.23. 13Ashnupa punta kaq orqu wawanpa trukan carnishta karpis o chïvuta karpis sacrificiupaq apayanki. Trukanta mana aparqa ashnu malwapa kunkanta pakiriyanki. Qechpa surikikunapa trukantapis Tayta Dios nishqannöla qellayta#Núm. 18.15-16. apayanki.

14<<Waray warantin surikikuna <¿imanirtaq kay fiestata ruransi?> nir tapuyäshuptiki niyanki: <Egiptucho ashmay kayashqäpitami munayninwan Tayta Dios jorqayämarqan. 15Faraónpa shonqun chukru kaptinmi yarqayämunäta kachapäyämarqansu. Saymi Tayta Dios wanusirqan lapan Egipto runakunapa qechpa olqu surinkunata. Saynölami wanusirqan lapan malta uywankunapa punta yuriq orqu wawankunatapis. Saymi uywapa punta wawan orqu yuriptinqa sacrificiupaq rupasinsi. Qechpa surinsi olqu yuriptinqa Tayta Dios nishqannölami qellayta apansi. 16Egiptupita Tayta Dios munayninwan jorqamashqansita imaypis yarparänansipaqmi runakunapa rikrancho o urkuncho señal kashqanno kay fiestapis señal kaykan> >>.

Ninawan pukutay kashqan

17Tayta Dios musyarqanmi filisteo runakuna atacayaptin Israel runakuna mansarir Egiptuman kutikuyänanpaq kashqanta. Saymi Israel runakunata Egiptupita Faraón kachariptin filisteo runakunapa nacionninman aywaq nänipa, cerca kaykaptinpis, Tayta Dios pusharqansu. 18Saypa trukanqa sunyaq jirkapami tumasirqan Puka Lamarman aywaq nänipa. Egiptupita yarqamur Israel runakuna tröpa tröpa soldädukunanöraqmi aywayämurqan.

19Egiptupita Israel runakunawan yarqamurmi Josépa tulunkunata Moisés apamurqan. Manaraq wanurmi Israel runakunata José ruwakur nirqan: <<Canaánman kutiyänaykipaq Tayta Dios rasunpaypami shamur yanapäyäshunki. Sayno yanapäyäshuptiki kaypita aywakur tulükunatapis apakurkuyälanki#Gén. 50.25; Jos. 24.32.>>.

Sayno nirmi Tayta Diospa jutincho jurasirqan.

20Sucotpita aywakurmi Israel runakuna Etamman chäyarqan. Saypitaqa sunyaq jirkanami qalaykun. 21Israel runakunata pushashpanmi junaqpa ichiraykaq pukutaycho Tayta Dios aywarqan. Sakaypanami asikyapänanpaq ichiraykaq ninacho aywarqan. Saynöpami sakaypapis junaqpapis Israel runakuna aywayarqan. 22Junaqpaqa ichiraykaq pukutaymi paykunapa puntanta imaypis aywaq. Sakaypanami ichiraykaq ninana mana upiypa asikyapaq.#Éxo. 40.34-38; Núm. 9.15-23.

Currently Selected:

Éxodo 13: qvhB

Highlight

Copy

Compare