1 Timoteo 2
2
Tayta Diosta manakunansipaq yäsishqan
1Timoteo, wawqi panikunata shakyäsiy Tayta Diosta agradëcikur lapan runakunapaq imaypis manakuyänanpaq. 2Saynöpis Tayta Diosta manakuyäsun reykunapaq y wakin autoridäkunapaqpis. Ali mandayänanpaq Tayta Dios yanapaptinmi noqansipis jawkala Tayta Dios munashqanno kawashun. 3Lapan runakunapaq manakurqa salvamaqninsi Tayta Dios munashqannömi manakuykansi. 4Pay munan lapan runakuna ali wilakuyninta chaskikur salvash kayänantami.
5Juklaylami Tayta Diosqa.
Tayta Dioswan ali kawanansipaq juk runalami amistasimansi.
Say runaqa Jesucristumi.
6Paymi wanush lapan runakunata salvananpaq.
Sayno salvakuq kashqantaqa tiempun chämuptinmi Tayta Dios musyasimashkansi.#Mat. 20.28; Mar. 10.45; Gál. 1.4; Tito 2.14.
7Say ali wilakuyta mana Israel runakunata wilapar apostolnin kanäpaqmi Tayta Dios churamash. Saymi yachaykäsï Diospa ali wilakuyninta chaskikur Jesucristuman yärakuyänanpaq.#2Tim. 1.11. Mana lulakuypami [Jesucristupa jutincho] rasun kaqta nï.
8Noqa munä maycho shuntakarpis mana rimanakuypa ni pitapis mana nanaparaypa wawqikuna makinkunata joqarkur Tayta Diosta manakuyänantami.
Warmikunapaq nishqan
9Warmikunapis kamaraqlata jatikuyäsun. Jamurpaypaq mödanakunata ama jatikuyäsunsu. Saynöpis ama yarpachakuyäsunsu aqsanta aläpa alsakuyänalanpaq ni qoriwanpis ni perlaswanpis adornakuyänalanpaqqa. Aläpa chanin mödanakunatapis ama jatikuyäsunsu.#1Ped. 3.3. 10Saypa trukanqa Tayta Dios munashqanno kawaq warmikunano alikunata rurar kawayäsun.
11Shuntakäyashqaykicho yachasiyashqanta warmikuna upälala yachakuyäsun. 12Noqa manami munäsu warmikuna olqukunata yachasiyänanta ni mandayänanta. Saypa trukanqa upälakuyäsun. 13Sayno nï Adánta kamarkurraq#Gén. 2.7. Evata kamash kaptinmi.#Gén. 2.21-22. 14Saynöpis manami Adántasu Satanás engañarqan, sinöqa Evatami.#Gén. 3.1-6. Engañaptinmi jusalikuyman ishkirqan.
15Sayno kaptinpis warmikuna salvakuyanqa wawankunata shumaq ashmar, Tayta Diosman yärakur, pïmaytapis kuyar, shumaq tantiyakur y Tayta Dios munashqanno kawarmi.#Fil. 2.12.
Currently Selected:
1 Timoteo 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.