1 Juan 2
2
1Kuyay wamräkuna, kay cartata cartakaykämü mana jusalikuyänaykipaqmi.#Rom. 6.11-14. Jusalikush imashqaqa Tayta Diospa nawpancho favorninsi sharkunanpaq abogädunsi kaykanmi. Say abogädunsiqa alilata ruraq Jesucristumi. 2Paymi sacrificiu kash jusansikunata Tayta Dios perdonamänansipaq.#1Juan 4.10. Manami noqalansi perdonash kanansipaqsu wanurqan, sinöqa maysaychöpis runakuna perdonash kayänanpaqmi.
3Tayta Diosta reqishqansita musyansi mandamientunkunata cumplirmi.#Juan 14.15, 21, 23. 4Mayqansipis Tayta Diosta reqishqansita nikarpis mandamientunkunata mana cäsukurqa manami rasun kaqtasu parlansi, sinöqa lulakuykansimi. 5Mandamientunkunata cumplirmi isanqa Tayta Diosta rasunpaypa kuyansi. Saynöpami musyansi Tayta Diospa makincho kashqansita. 6Pipis Tayta Diospa makincho kaykashqanta nirqa Jesucristo kawashqanno kawasun.
Mushuq mandamientu
7Kuyay wamräkuna, jukniki juknikipis kuyanakuyanki. Kay mandamientu manami mushuq mandamientusu kaykan, saypa trukanqa unaypita pasa musyashqansi mandamientumi. Say mandamientuta maynami musyayanki. 8Mushuq mana kaptinpis kananqa musyayanki Jesucristo kuyamashqansino kuyanakuyänaykipaq kashqantami. Saymi say mandamientu mushuq kaykan. Jesucristo kuyakuq kashqannömi qamkunapis kuyanakuykäyanki. Sayno kuyanakurmi sakaypita aksiman yarquq japuy kaykäyanki.
9Pï runapis <<aksichömi kaykä>> nikar runa mayinta chikirqa sakäpakushlaraqmi kaykan. 10Runa mayinta kuyarmi isanqa aksicho kaykaqno kaykan.#Rom. 13.12-13. Sayno kawaptinqa pïmaypis payta rikakur alimi kawayanqa. 11Runa mayinta chikiq kaqqa sakäpakushnömi kaykan. Qapra runa maypa aywashqantapis mana tantiyashqannömi Tayta Dios munashqanno kawananpaqpis tantiyansu.
Imanir Juan cartakushqan
12Kuyay wamrakuna, qamkunapaq cartakaykämü Jesucristo noqansi rayku wanushqanpita perdonash kayaptikimi.
13Taytakuna, qamkunapaq cartakaykämü qalaykunanpita pasa kawaq Jesucristuta reqish kayaptikimi.
Maqtakuna y jipashkuna, qamkunapaq cartakaykämü Satanásta vincish kayaptikimi.
14Kuyay wamrakuna, qamkunapaq cartakaykämü Tayta Diosta reqish kayaptikimi.
Taytakuna, qamkunapaq cartakaykämü qalaykunanpita pasa kawaq Jesucristuta reqish kayaptikimi.
Maqtakuna jipashkuna, qamkunapaq cartakaykämü kalpayuq kayashqaykipitami y Diospa wilakuyninta cäsukuyashpayki Satanásta vincish kayaptikimi.
Diosta mana cäsukuq runakuna kawayashqanno mana kawanansipaq nishqan
15Diosta mana cäsukuq runakunanöqa ama kawayaysu. Paykunano kawarqa Tayta Diosta manami kuyaykäyankisu. 16Diosta mana cäsukuq runakunaqa shonqunkuna munashqanno lutantami ruraykäyan, imatapis rikashqantami munapaykäyan y lapanpitapis mas ali rikash kaytami munaykäyan. Paykunano kawarqa manami Tayta Dios munashqannösu kawaykäyanki, sinöqa jusasapa runakunanömi. 17Kay pasapis y runakuna munapäyashqanpis ushakanqami. Tayta Dios munashqanno kawaq runakunami isanqa mana ushakaq kawayta tariyanqa.
Anticristukuna yuriyämunanpaq nishqan
18Kuyay wamräkuna, ultimu tiempuchönami kaykansi. Anticristo shamunanpaq kashqanta musyayashqaykinöpis kananqa aska anticristukunami yuriyämush. Saynöpami musyansi ultimu tiempuchöna kaykashqansita. 19Say runakunaqa nawpata noqansiwan shuntakäyash karpis kananqa manami shuntakäyämunnasu. Paykuna manami Jesucristuta rasunpaypasu chaskikuyash. Jesucristuta rasunpaypa chaskikush karqa noqansiwanmi shuntaraykäyanman karqan. Noqansipita yarqush kaptinmi musyansi Jesucristuta mana chaskikuyashqanta.
20Qamkunamanqa Jesucristumi Espíritu Santuta kachamush. Saymi tantiyayanki mayqan yachasikuykuna ali kashqanta y mayqan mana ali kashqantapis.#1Cor. 2.10-16. 21Saynöpis tantiyayanki lulakuqkuna Tayta Diospa wilakuyninta wilakuyänanpa trukanqa lutanta yachaykäsiyashqanta. Rasun kaq yachasikuyta tantiyayashqaykita musyarmi cartakaykämü.
22Say lulakuqkunaqa yachaykäsiyan <<Jesúsqa manami Tayta Dios kachamushqan Cristusu>> nirmi. Sayno yachasiqkunaqa anticristumi kaykäyan. Paykunaqa Tayta Diostapis Jesucristutapis ñëgayanmi. 23Jesucristo Tayta Diospa Surin kashqanta pipis ñëgarqa Tayta Diostapis ñëganmi. <<Jesucristuqa Diospa Surinmi kaykan>> nirqa Tayta Diostapis chaskikunmi.
24Sayno kaykaptinqa Jesucristupa wilakuyninta yachakuyashqaykita ama qonqäyaysu. Mana qonqarqa Tayta Diospa y Surin Jesucristupa makinchömi kawaykäyanki. 25Paymi promitimashkansi gloriacho imayyaqpis kawanansipaq.
26Kay cartata cartakaykämü lutan yachasikuqkunata mana chaskipäyänaykipaqmi. 27Jesucristupita chaskiyashqayki Espíritu Santu qamkunawanmi kaykan. Paymi rasun kaqlata lapantapis tantiyaykäsiyäshunki. Manami imaypis lulapäyäshunkisu. Sayno kaykaptinqa lutan yachasikuykunata ama chaskiyaysu. Espíritu Santu tantiyasiyäshushqaykinöla Jesucristuman yärakur imaypis kawayay.
28Kuyay wamräkuna, Jesucristupa makincho imaypis kawayay. Sayno kawarmi Jesucristo kutimuptin mana mansariypa y mana penqakuypa nawpancho kayankipaq.
29Musyansimi Jesucristo imaypis alilata ruraq kashqanta. Saymi pipis alilata rurarqa Tayta Diospa wamran kaykan.
Currently Selected:
1 Juan 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.