Efesios 5
5
Maija'quë Mamajë Pa'iye
1Mësaru Diusu oi mamajë sëte i̱je pa'iohua'i pañu'u cajë, yo'ojë̱'ë. 2Cristo maini oi i̱ja'a co'ye Maija'quëna i̱siquë ju̱cacaiji'i. Ja̱ yo'oye cato de'oye ma'ña së̱ñeje pa'ye a'ë, Maija'quëna. Ja̱ yo'oyepi maire i̱ oiyere i̱ñopi. Yureta'a i̱ oiyeje̱ pa'ye yecohua'ire yo'oñu'u. Ja̱re yo'ojë pa'ijë̱'ë.
3Ja̱je pa'ina, yure Maija'quë acohua'i pa'iye sëte nomiohua'i paye coca caye ti cama'pë pa'ijë̱'ë, cui'ne si'a si'si yo'o cocare cui'ne si'aye pa ëaye nëi cocare ti cama'pë pa'ijë̱'ë. 4Cui'ne cama'pë pa'ijë̱'ë, si'si cocare, coa cayere, cui'ne ca̱'a cocata'a si'ayere co'aye yo'oyena cuasa huëoyere cama'pë pa'ijë̱'ë. Coa ai jerepa mësaruse'e, Maija'quëre de'oji cajë pëpaye pa'iji. 5Mësarupi tsoe ta̱'ñe asayë, yequë nomiore panita'a yequë ë̱mëre yo'ocohua'ipi, pa̱nita'a si'sire yo'ocohua'ipi, pa̱nita'a jaiye co'amañare paye yëcohua'ipi Cristo cui'ne Diusu cua̱ñe te̱'te cacaye ti peoyë. Jaiye co'amañare yëcohua'i cato pa̱i de'huasi Diusuni se̱ñeje pa'iohua'i a'ë. 6Iye tayo yo'oyere de'oye a'ë cacohua'ini coso cua̱ñoma'pë pa'ijë̱'ë. Ja̱je yo'ocohua'ire Maija'quëpi pë̱i nejoja'quë api, i̱te sehuocaima'pë yo'ocohua'ire. 7Ja̱je pa'ina, mësaru ja̱ohua'ire tsioma'pë pa'ijë̱'ë.
8Ja̱'rë mësaru nea hue̱'ñare paë'ë. Yure mai Ëjaë ja̱'re tsioni pa'i do'ire mia hue̱'ñare pa'iyë. Ja̱je pa'i sëte mia hue̱'ña pa̱i sëte de'oye pa'iyepi pa'iji. 9Iye miañepi iyere neji: de'oye yo'oyere, nuñerepa cayere cui'ne tayo saima'pë pa'iyere. 10Maija'quë yëye yo'oyere ye'yejë̱'ë. 11Cui'na maca yo'oma'pë pa'ijë̱'ë, co̱cai ma'ñere, nea hue̱'ña acohua'i yo'oyere. Coa ai jerepa co'ayere mia hue̱'ñana eto i̱ñojë'ë. 12Ja̱je pa'ina, sehuoma'cohua'i yahue yo'oyere cayeque huajëya'ji, maire. 13Ja̱je pa'iquëta'are miañepi yahue yo'ose'ena ju'aquëna, si'aye ti̱ñarepa ñañe pa'iji. Ja̱je pa'ina, si'ayere yahue yo'ose'ere co̱ni i̱ñoja'quë api, miañepi. 14Ja̱je pa'ina, case'e pa'iji:
Sëtajë̱'ë, ca̱iquë,
ju̱'isicohua'i jopopi huëijë̱'ë,
Cristopi miacaija̱'quëre.
15Ja̱je pa'iye sëte de'hua mësaru yo'ojë pa'iyere ñajë pa'ijë̱'ë. Huesëohua'ije̱ pa'iohua'i pa'ima'pë, coa ai jerepa ta̱'ñerepa asajë pa'ijë̱'ë. 16De'o co'amañare esa nejë'ë, co'a mu'señare pa'i do'ire. 17Coa huesërepa yo'oma'pë pa'ijë̱'ë, du'ru macarepa jere Ëjaërepa yëquë'ni cuasani, i̱ yëyere yo'ojë̱'ë. 18Co̱no cuepema'pë pa'ijë̱'ë. Ja̱ cato nëajaiñe peoyerepa coa yo'oyena saye a'ë. Ai jerepa Maija'quë joyopi ti̱mësicohua'ipi pa'ijë̱'ë. 19Pa'ijë tsoe jë̱jëñe toyase'epi sehuosicohua'i jë̱jëñepi cui'ne joyo jë̱jëñepi sa̱'ñe cajë pa'ijë̱'ë, cui'ne iye jë̱jëñepi jë̱jëjë si'a joyorepapi sihuajë Maija'quëre de'oquëre pa'ni cajë pa'ijë̱'ë. 20Si'anë Maija'quëre de'oji, cajë pëpajë pa'ijë̱'ë, mai Ëjaë Jesucristo mamipi.
Sehuosicohua'i Huë'e Pa'iye
21Sa̱'ñe de'oye sehuojë pa'ijë̱'ë, Maija'quëre ca'ra do'ipi.
22Nëjohua'i ë̱jëre de'oye sehuocaijë pa'ijë̱'ë, mai Ëjaëre sehuoyeje̱ pa'ye. 23Cristo sehuosicohua'i mëñe si̱opë api, cui'ne pa'ye ë̱jëje nomio mëñe si̱opë api, Cristo sehuosicohua'ire huasoquë api, i̱ ca̱pë acohua'ire. 24Ja̱je pa'ina, Cristore sehuosicohua'i de'oye i̱ cua̱ñeñe sehuojë pa'iyeje̱ pa'ye cui'ne nëjoje ë̱jëre si'aye sehuoco pa'iye pa'iji.
25Ë̲jëpi nëjore oiye pa'iji, Cristo oi i̱ oiyere i̱ñoquë sehuosicohua'ire ju̱cacaise'eje̱ pa'ye. 26Ja̱je pa'ina, i̱ tse̱core pare nëjoje pa'iore pasi'i caquë Maija'quë coca quëa do'ija̱'a Maija'quë joyo ocopi tsoa to̱pi si'a i̱te sehuocohua'ire. 27Ja̱je tsoa to̱pi i̱ ñaquë payere caquë si'si te̱'ñaje, sëje̱, cui'ne yeque co'aye ña cua̱ñoñe peocore pani de'oconi i̱ tse̱core pasi'i caquë. 28Ja̱je pa'ye ë̱jëohua'ipi nëjohua'ire oiye pa'iji, i̱ohua'i ca̱pë̱a oiyeje̱ pa'ye. Nëjore oiquë cato i̱ja'a co'ye oiyeje̱ pa'ye oiji. 29Co'ye i̱ohua'i ca̱përe coecohua'i peoyë, pa̱i. Coa ai jerepa a̱ojë cui'ne ñacaicohua'i a'ë. Ja̱je cui'ne Cristoje̱ i̱te sehuosicohua'ire i̱ ca̱pë acohua'ire ñacaiji. 30Ja̱je pa'ina, mai i̱ ca̱pë cui'ne tara acohua'i a'ë. 31Ja̱je pa'ina, ë̱mëpi huejaquë pëca ja'quëre cui'ne pëca ja'core je̱oñe pa'iji, nëjona tsioyere caquë. Ja̱ maca cayahua'i pa'isicohua'ipi tsioni te'ije̱ pa'iohua'i pa'ija̱'cohua'i a'ë. 32Iye cato yahuese'e a'ë. Ja̱je me asaye'ni pa'iquëta'are yë'ë cato cayë, Cristopi i̱te sehuocohua'i ja̱'re tsioni pa'iye ayere. 33Ja̱je pa'iquëta'are pa̱i ñape ë̱më nëjore oiye pa'iji, i̱ ca̱pë oiyeje̱ pa'ye, cui'ne nomiopi ë̱jëre i̱o ëjaëre pare dahuëre ñaco pa'ija̱co.
Currently Selected:
Efesios 5: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.