Hechos 1
1
Maija'quë I̱ Joyore I̱sisi'i Ca Nëose'e
1Yë'ë cajei Teofilo, yë'ë du'ru macarepa toya pëpëna si'aye Jesuja̱'a macarepa yo'o huëoquë yo'ose'e cui'ne i̱ ye'yase'e, cui'ne i̱ ma'tëmona sai macaja̱'a yo'ose'e si'aye toyahuë. 2Ja̱ yë'ta'a ma'tëmo saima'në i̱ jëjo saocohua'ire jo'ya sahuani de'o joyo co̱caiyepi i̱ohua'i yo'o ja̱'ñe quëaëña. 3Cui'ne ju̱'isiquëpi huajëquërepa pa'iji cajë ñajajë caquë ja̱'në pa'ise'eje̱ pa'irepa pani i̱ñoquë cuarenta mu'seña ñaiquë Diusu cua̱ñe te̱'tere quëaëña, ja̱ohua'ire.
4Ja̱ yë'ta'a Jesús i̱ jëjo saocohua'i ja̱'re pa'i caëña:
“Jerusalénpi saima'pë utejë̱'ë, ja'quë mësarute i̱sisi'i ca nëose'ere yë'ë quëase'ere. 5Juan cato ocopi dopi. Ja̱je pa'iquëta'are a'ri maña se ñata sao mu'seña mësaru cato de'o joyore pani do cua̱ñoja'cohua'i pa'ija̱'cohua'i a'ë, oco doyeje̱ pa'ye.”
6Jesús quë'rona tsi'sija̱ni Jesure se̱i'ë ñeje:
“Ëjaë, ¿më'ë yurepi Israel pa̱i ëjaëre necaija̱'quë a'ë, yëquëre de'oye cua̱ñeja'quëre?”
Cajëna, Jesupi sehuoëña:
7“Ja̱ cato pa̱i asaye peoye a'ë. Coa ja'quëse'e neñe pa'iji. Ja̱je pa'ina, mësaru i̱ti neja'a mu'se cui'ne ti̱ yo'oja̱'a tëcahuëje̱ asaye peoji. 8Ja̱je pa'iquëta'are de'o joyopi mësaruna dani pa'i maca tutu i̱si cua̱ñoni Jerusalén, Judea yeja, Samaria yeja, coa si'a yeja pa'icohua'ire quëacaija̱'cohua'i a'ë, yë'ë yo'ose'e ayere.”
9Ja̱ se ca tëjini ñajë nëcajëna, Jesús ma'tëmona sa cua̱ñoëña. Sa cua̱ñoquëna, siriopi i̱te peo hue̱'ñarepa tsio dani hueso. 10Ja̱ yë'ta'a Jesús ma'tëmona mëiñere ñajë nëcajëna, peo hue̱'ña pa'isicohua'ipi caya ë̱mëohua'i poja'i ju'i ca̱ña ju'icohua'ipi ñaini caëña, i̱ohua'ire:
11“Galilea pa̱i ¿me yo'ojë ma'tëmore ñajë nëcaye'ni? Iquë Jesús mësaru ja̱'re pa'isiquëpi yure ma'tëmo sa cua̱ñosiquë cui'naëpi co'ija̱'quë api, mësaru ñajëna, saise'eje̱ pa'ye.”
Judas Pa'isi Sa'rona Matiaspi Tsioja̱ise'e
12Ja̱ maca Jesús jëjo saocohua'i Olivos ai cu̱tihuëpi te'e kilómetro sani Jerusalénna co'ireña, ja̱ohua'i cato saë'ë, huajë mu'se ja̱ ja'ye cu'iye pa'iji, cua̱ñese'e ja'ye. 13Ja̱ maca pa̱i daripëna ti̱'ani i̱ohua'i huero pëani pa'i huë'e ë̱mëje'e tu'rihuëna mëni pëareña. I̱ti pëasicohua'i cato pa'iyë: Pedro, Juan, Jacobo, Andrés, Felipe, Tomás, Bartolomé, Mateo, Alfeo mamaquë Jacobo, Simón yequë mami hue'yosiquë Zelote, cui'ne Jacobo mamaquë Judas. 14Si'aohua'i ja̱ohua'i Jesús yo'je tsi̱ ja̱'re, cui'ne Jesús pëca ja'co María ja̱'re co̱ni, cui'ne yequë nomiohua'i ja̱'re co̱ni te'e cuasayepi si'anë Maija'quëre se̱ñu'u cajë tsi'sijë paë'ë.
15Ciento veinte sehuosicohua'i pa'icohua'ipi ja̱ mu'seña te'e macana tsi'sirena, Pedropi jopore pana huëni nëcani caëña, ñeje:
16“Maija'quë do'ijë, Jesure tse̱acohua'ire sai saquë Judas yo'o ja̱'ñere Maija'quë joyopi Davidre du'ru quëaëña. Quëaquëna, toyapi. Ja̱ toyase'e, Maija'quë joyo case'e ti̱'añe paji'i. 17Judas cato mai aquë paji'i. Cui'ne mai neñe ayere co̱ nequë paji'i. 18Ja̱je pa'iquëta'a, co'aye yo'o do'ire sa̱isi curiquëpi yejare huerohuë. Ja̱je pa'iquëta'are Judas cato si̱opëja̱'a meñe to̱meni ë̱tatu'u joquëna, si'aye ë̱ta mea etaëna, ju̱quëña. 19Ja̱ yo'ose'ere Jerusalén pa'icohua'ipi asani i̱ti tsiore hue'yohuë, tsie tsio. I̱ohua'i cocarepa cato Acéldama hue'yoreña. 20Ja̱je pa'ina, Salmos toya pëpë caji:
I̱ pa'isi huë'e je̱ocosi huë'e pa'ija̱'coa,
Pëa co̱ma'a huë'e.
Cui'ne caji, yequeje̱:
I̱ yo'ora'ase'ere yequëpi yo'oye pa'iji.
21De'oji. Maipi iye macare payë, Jesús mai ja̱'re pa'i macapi, mai ja̱'re si'anë pa'icohua'ire Jesure Juan oco do macapi cui'ne i̱ ma'tëmo mëi macana mai ja̱'re pa'icohua'ire. 22Ja̱je pa'ina, de'oji, ja̱ohua'i aquëni te'ire maire tsioja̱'quëre neñe. Nerena, ja̱ëpi mai ja̱'re co̱ni te'e Jesús ju̱'isiquëpi huëji'i, quëaja̱'quëre.”
23Casi maca co'ejë cayaohua'ire ti̱'areña, José Barsabás cui'ne Matias. Josépi yequë mami Justo hue'equë paji'i. 24-25Ti̱'ani Maija'quëre ñeje se̱i'ë:
“Ja'quë, më'ëpi pa̱i cuasaye ta̱'ñe asaquë a'ë. Yëquëre i̱ñojë'ë, ¿jequë a'ni, më'ë jo'ya nesiquërepa më'ë jëjo saoquërepa Judas co'aye yo'oquë ne huesësiquë nera'ase'e neja'quë?”
26Se̱ni tëjini neñañu'u cajë yo'ojëna, Matiasna Jesús jëjo saoquë pa'iye to̱mepi. To̱meina, ja̱re i̱ti macapi, Jesús once jëjo saocohua'i ja̱'re co̱ni pa'iquë po̱nëpi.
Currently Selected:
Hechos 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.