1 Juan 5
5
Pa'ire Paji Cuasayepi Iye Yeja Ayere Ñese Quëcoye.
1Si'aohua'i Jesure, Cristore papi asacohua'i cato, Maija'quë mamajëre pa'ë. Ja̱je pa'ina, pëca ja'quëre oicohua'ipi mamaquëreje̱ oiyë. 2Ja̱je pa'ina, Maija'quëre oijë, i̱ cua̱ñese'ere de'oye sehuocaijë pa'ito, asayë, Maija'quë mamajëreje̱ cui'ne oicohua'i a'ë cajë. 3Maija'quëre oiye cato i̱ cua̱ñese'ere sehuocaiye a'ë, i̱ cua̱ñeñere sehuocaiye cato ai yo'o ma'ñe a'ë. 4Maija'quë mamaquëpi pa'ito iye yeja aye ñese quëcoye pa'iji. Ja̱je pa'ina, Maija'quë pa'ire paji cuasayepi si'aye iye yeja aye ñese quëcoye necaji. 5Ja̱je pa'ina, Jesu api, Maija'quë mamaquë asaquë pa'iquëpi iye yeja aye ñese quëcoquë pa'iji.
Maija'quë Mamaquë Ayere Quëaye
6Iquë Jesús cato i̱ do cua̱ñose'epi, cui'ne i̱ ju̱'i tsie nejose'epi i̱ñoñe paji'i. Cristo api, maire huasoquë. Coa oco doyese'e pa'iye pa̱pi, oco dose'e cui'ne i̱ tsie co̱ni paji'i. Maija'quë joyo cato si'aye iyere ñani quëapi, cui'ne nuñerepa ca joyo api. 7Ja̱je pa'ina, ma'tëmore toaso̱cohua'i, iye yo'ose'ere ñasicohua'i pa'iyë, Maija'quë, Cocarepa, cui'ne Maija'quë joyo. Iye toaso̱cohua'i cato te'ipi pa'iyë. 8Maija'quë joyopi Jesucristore Maija'quë mamaquë api quëapi, maire. Cui'ne asayë, oco dose'e cui'ne i̱ tsie nejose'ere. Ja̱re cuasajë̱'ë, toaso̱ñe iye yejana iye te'e cuasaye pa'iji, Jesucristo Maija'quë mamaquërepa pa'iye. 9Pa̱ipi quëaquëna, care paji cuasajë asacaicohua'i a'ë, asacaicohua'i sëte. Maija'quë quëaye jerepa do'i quë'ye sëte asacaiye pa'iji, Maija'quë i̱ mamaquë ayere quëaye. 10Ja̱je pa'ina, Maija'quë mamaquëre i̱re papi caquë asaquë cato i̱ mamaquë ayere, Maija'quë joyo quëayere i̱ joyore paji. Ja̱je pa'iquëta'are Maija'quë case'ere i̱re papi cuasama'quë cato Maija'quëni cosoure neji, i̱ mamaquë ayere asacaima' do'ire. 11Maire quëase'e cato iye a'ë: Maija'quë maire ti pa'iyere i̱sipi. Ja̱je pa'ina, i̱ mamaquëni iye ti pa'iye pa'iji. 12Ja̱je pa'ina, i̱ mamaquëre paquëpi ti pa'iye paji. Ja̱je pa'iquëta'are Maija'quë mamaquëre peoquë cato ti pa'iye peoquë api.
Yëhuo Tëjiquë Caye
13Maija'quë mamaquëre i̱re papi cajë asani sehuosicohua'ina toyayë, iye, mësarupi ti pa'iyere payë cajë asaja̱jë caquë.
14Maipi Maija'quë yëyeje̱ pa'ye se̱to i̱pi asacaiji asayë, mai. Ja̱je pa'ina, co'a ju̱'iñe pa̱ñë Maija'quëpi necaija̱'quë api cuasajë. 15Ja̱je pa'ina, Maija'quëpi mai se̱ñe asacaiji. Asaye sëte mai i̱te se̱se'e tsoe ti̱'ani payë asajë pa'iyë.
16Pa'iji, tayo yo'ose'epi ju̱ni huesëyena sayeje̱, cui'ne tayo yo'ose'epi ju̱'iñena sa ma'ñeje pa'iji. Ja̱je pa'ina, yequëpi, ju̱ni huesëye ne ma'ñere Maija'quë do'iquëpi tayo yo'oquëna, ñani Maija'quëre se̱cacaiye pa'iji. Se̱cacaito Maija'quëpi tayosiquëre pa'iyere i̱sija̱'quë api. Cama'ë pa'iyë, ju̱ni huesëye neñere tayo yo'ouna, se̱cacaijë̱'ë caquë. 17Si'aye tayo yo'oye co'ayese'e pa'iji. Ja̱je pa'iquëta'are yeque cato tayose'epi ju̱'iñena sa ma'ñe a'ë.
18Diusuni pëca ja'quëre pacohua'ipi tayo yo'oma'pë pa'iyë, Maija'quë mamaquëpi ñacaina, huatije̱ pu̱'pema'ëna.
19Ja̱je pa'ina, maipi asayë, iye yeja pa̱i cato i̱ohua'i ëjaë huatipi cua̱ñequëna pa'iye. Ja̱je pa'iquëta'are mai cato Maija'quë tse̱cohua'i a'ë asayë.
20Asayë, cui'ne Maija'quë mamaquëpi dani maire ta̱'ñe asaye i̱sise'e, nuñerepa Maija'quë pa'iyere asa ti̱'ajajë caquë. Ja̱je pa'ina, asayë, mai nuñere pare pa'iye, i̱ mamaquë Jesucristoni. Ja̱ë api, nuñerepa Diusu ti pani huesëyere paquë. 21Tsi̱ dohuë, de'hua ñajë pa'ijë̱'ë, coso diusuohua'ire, yo'ojë sehuoye.
Currently Selected:
1 Juan 5: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.