Abdías 1
1
Edom oñembokarape
1Marandu Ñandejára ohenduka vaekue Abdíaspe.
Rohendu Ñandejára oñe'ẽ ramo.
Ñe'ẽ rerahaha oñemondo tetã nguéra rupi ha he'i:
“Néike jaháke ñañorãirõ Edom ndive.”#Is 34.5-17; 63.1-6; Jer 49.7-22; Ez 25.12-14; 35.1-15; Am 1.11-12; Mal 1.2-5.
Tupã Ñandejára he'i Edómpe:
2“Romomichĩta tetã nguéra apytépe,
ha reñemotĩ etereíta.
3Rejejapo itereígui rejavy.
Reiko ita kuápe yvate
ha upévare reimo'ã
ndaipóri mo'ãiha ne mongúiva.
4Jepe taguatóicha yvate rejupi ramo
ha rejaitypo mbyja apytépe,
upégui che roitýta.”
Ñandejára he'i:
5“Mondaha ou ramo ndéve pyhare,
ndogueraha mo'ãi opa mba'e.
Ou ramo ndéve parral po'oha,
parral mbovymi ohejáta ndéve.
Nde rehe ija'e'ỹva katu
ou ne rundiete voi.
6Mba'eichaite peve piko
reñemonda Esaú!
Reñemoperõ mbaite!
7Ne ndive oĩva ne mbotavy,
ne mosẽ nde yvy teégui.
Umi ne ndive okarúva jepe
oñemoĩ nde rehe,
ha umi rejeroviaha ne moñuhã.
Itavy eterei pe Edom!”
8Ñandejára he'i:
“Ainupã ramo Edómpe,
ahundíta opa iñarandúva,
ha umi oikóva Esaú yvyty rupi
ndoikuaa mo'ãi mba'eve.
9ñorãirõhára Temangua
oryrýi osusũmbáta,
ha Esaú yvyty rupi
avave oikovéva ndopyta mo'ãi.
Edom rembiapo vaikue
10Reñemotĩ ha reñehundietéta voi,
reinupã ha rejuka haguére
nde ryvy Jacóbpe.#Jl 4.19.
11Umi mombyrygua
ojokárõ guare Jerusalén rokẽ
ha omondapa imba'eta,
nde reñemboyke vaekue!
Oñomboja'o imba'eta
ha oguerahapa ramo,
nde vaekue peteĩ ha'e kuérava!
12Nderevy'ái vaerã mo'ã
upe ára ho'a vai haguépe chupe kuéra.
Nderevy'ái vaerã mo'ã
rehechávo Judá oñehundi.
Nereñembohorýi vaerã mo'ã,
ha'e kuéra oñehundi ramo.#Sal 137.7; Lm 4.21.
13Ndereikéi vaerã mo'ã
pe távape ohasa asy aja,
ha neremondái vaerã mo'ã
imba'eta ho'a vai ramo chupe.
14Nderepytái vaerã mo'ã
tape ku'ápe rejuka haguã
umi okañývape,
ha nereme'ẽi vaerã mo'ã
chupe kuéra imuñahárape.
15Rejapo haguéicha nde rapicháre
oñemyengoviáta ndéve!”
Israel oñakã rapu'ãta
“Hi'aguĩma Ñandejára ára
tetã nguérape guarã.
16Pey'u haguéicha iróva
che yvyty marangatúpe,
peichaite iróta hína tetã nguérape
ha hoy'úta hyguãtã meve,
ndopytavéi peve avave.
17Yvyty Sión katu
Tupãme oñemboykéta
ha upépe oĩta
okañýva ha oikovéva.
18Tatáicha hínata
Jacob ñemoñare,
tata'y rendýicha hínata
José ñemoñare.
Esaú ñemoñare katu
kapi'i pirukuéicha
okái ha ikusuguéta opytávo
ha ndopyta mo'ãi avave Esaugua.”
Che, opa mba'e Jára, upéicha ha'e.
19-20Umi Israelgua Néguebpe oikóva oñemomba'éta Esaú Yvyty rehe ha umi ñumegua oñemomba'éta filistéo retãre, avei oikéta Efraín retãme ha imba'éta Galaad. Ha heta Israelgua mombyrýgui ou jeýva, cananéo retãre oñemomba'éta Sarepta peve; ha Jerusalengua oĩva iñapytĩmby Sefarádpe, oñemomba'éta Négueb pegua táva kuérare. 21Sión yvytýpe torypápe ojupíta he'i haguã mba'épa oikóta umi Esaú yvytýpe oikóvagui. Ha Ñandejára oguapýta oisãmbyhy.
Currently Selected:
Abdías 1: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.