Jeremías 1
1
Ñandejára oñe'ẽ Jeremíaspe
1Jeremías, Hilquías ra'y ñe'ẽ ha rembiapokue. Ha'e vaekue pa'i kuéra rehegua oĩva Anatot#1 R 2.26-27. Benjamín guápe. 2Ñandejára oñe'ẽ chupe áño 13hápe oñepyrũ hague oisãmbyhy Judápe Josías#2 R 22.3--23.27; 2 Cr 34.8--35.19. Amón ra'y. 3Oñe'ẽ avei chupe, Joaquim#2 R 23.36--24.7; 2 Cr 36.5-8. Josías ra'y Judá ruvicha guasúrõ guare, Sedequías,#2 R 24.18--25.21; 2 Cr 36.11-21. Josías ra'y avei, omboty peve 11 áño oñepyrũ hague oisãmbyhy Judá ruvicha guasúrõ; he'ise pe áño pegua mes 5ha peve, Jerusalengua ojereraha ramo guare tetã mombyrýpe.
Ñandejára ohenói Jeremíaspe
4Upérõ Ñandejára
oñe'ẽ chéve ha he'i:
5“Rojapo mboyve
nde sy ryépe,
roikuaáma vaekue,
ha resẽ mboyve chugui
roiporavo vaekue che mba'erã.
Romoĩ maranduhára*f** ramo
tetã nguérape guarã.”#Is 49.1; Gl 1.15.
6Che katu ha'e:
“Anína, Tupã che Jára!
Che niko mitã pyahu
ha na ñe'ẽ kuaái.”
7Ha Ñandejára he'i chéve:
Ani ere “chéko mitã pyahu”.
Mamo rojokuaihápe rehóta
ha eréta che ha'éva ndéve.
8Ani rekyhyje avavégui,
che aiméta ne ndive
romo'ã haguã.
Che, opa mba'e Jára,
ame'ẽ che ñe'ẽ.
9Upérõ Ñandejára
oipyso ipo, opoko che jurúre
ha he'i:
10“Amoĩ che ñe'ẽ nde jurúpe,
ha ame'ẽ ndéve che pokatu
nde pu'aka haguã
yvypóra ha tetã nguérare,
rehapo'o
ha reity haguã yvýre,
rehundi ha remyangu'i haguã,
remopu'ã jey
ha reñotỹ haguã.”
11Upérõ Ñandejára
oñe'ẽ chéve ha he'i:
“Jeremías,
mba'épa rehecha?”
Ha'e chupe:
“Ahecha peteĩ yvyra rakã”.
12He'i chéve Ñandejára:
“Rehecha porã.
Upéva hína che.
Ha aha'arõ aína#Is 65.10-11; Ez 12.28.
ojehu haguã upe ha'e vaekue.”
13Ñandejára
oñe'ẽ jey chéve ha oporandu:
“Mba'épa rehecha?”
Ha'e chupe:
“Ahecha japepo opupúva
ha ojehekuavo potáva
yvate guio yvývo gotyo.”
14Ha Ñandejára he'i chéve:
“Yvate guio
oñepyrũta ñehundi guasu
oútava opavave
ko tetãme oikóva ári.
15Che, opa mba'e Jára,
ha'e peẽme
ahenoitaha opa tetã nguéra
yvatevogua.
Oúta imburuvicha guasu kuéra
ha omoĩta iguapyha
Jerusalén rokẽtépe voi,
ikorapy jerére
ha opa táva Judá pegua
renondépe.
16Ambojovakéta chupe kuéra
opa iñañanguére,
che reja haguére,
ohapy insiénso
ha oñesũ haguére
tupã nguéra mombyrygua
ha'e kuéra voi ojapo vaekue
renondépe.
17Nde katu eñembopy'a guasu.
Tereho ha ere chupe kuéra
opa mba'e ha'éva ndéve.
Ani rekyhyje chugui kuéra,
ỹrõ romboryrýita
henondépe kuéra.
18Ko árape che romoĩ
táva mbarete, horkon fiérro
ha korapy yvate ramo,#Jer 15.20.
rembohovái haguã
opa Judá guápe:
mburuvicha guasu,
mburuvicha kuéra,
pa'i kuéra
ha opa tetã guápe.
19Ha'e kuéra opu'ãta
nde rehe ha ndaipu'aka mo'ãi
nde rehe,
che aimétagui ne ndive
romo'ã haguã.
Che, opa mba'e Jára,
ame'ẽ che ñe'ẽ.”
Currently Selected:
Jeremías 1: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.