SAN JUAN 2
2
Kjuakun xi kitsaꞌen Jesús ngajin jngu kjuabixan
1Nga kuangajngi kisꞌe jngu kjuabixan naxinanda Caná, naxinanda xi tijña ngajinre nangi Galilea, ꞌba kio kiji nare Jesús. 2ꞌBa nde Jesús ko xutare kiji kjuabixon, ngatꞌa kjinikintꞌe ngayeje. 3ꞌBa kionga je je binu, ꞌbatsaꞌen kitsure nare Jesús nga jako:
—Je bi nde tjinnire binu.
4—Na, ¿ánñu an ꞌba teꞌmininaa̱ kibiu? Kje fechujín chubana̱ —kitsu Jesús.
5ꞌBa ꞌbatsaꞌen nare Jesús kitsure nchja xi inyabatesin kio:
—Tikꞌetjusun ngayéje mé= xi kuetsunu —kitsure.
6ꞌBa kio tjindu jon tiji xi ndiojo kuandakoni. Kui xi tsichjen xuta judío kionga tsitsje yojore ngixkun Naꞌenchana, jo tsu kjuachingare. ꞌBa nga jngu jngu tijibiu sꞌenru tsa yachute asa yachute ko kan litro nanda.
7ꞌBa Jesús kitsure nchja xi inyabatesin kio:
—Titsio nanda tijiu.
ꞌBa nchjabiu ꞌñu kitsitse tijiu, 8ꞌba ꞌbatsaꞌen Jesús kitsu:
—Chuba chjubio ꞌba tanginko_ru xuta xi kjinentsjare sꞌiu.
ꞌBa ꞌba kitsaꞌen nchjabiu. 9ꞌBa ꞌbatsaꞌen xuta xi kjinentsjare sꞌiu kiskutꞌa nanda xi je kuán binu, tunga bi be ña jendibanire. Tu kui sani nchja xi inyabatesin kio xi be, ngatꞌa kui= xi tsꞌaxje nando. Kui kjua xuta xi kjinentsjare sꞌiu kinchjanire xi xiꞌiun. 10ꞌBa kitsure:
—Ngatsiꞌi xuta tjun binu xi nda tsja, ꞌba kionga je ꞌñu kaꞌbi xuta, tu kui sani xi bi ꞌñu nda tsja. Tunga ji, tojo tijñatjo=ri kaꞌnda ngandaꞌe ꞌba tebaꞌe=ni binu xi ꞌñu nda.
11Kui kjuakunbiu xi tjun kitsaꞌen Jesús naxinanda Caná, naxinanda xi tijña ngajinre nangi Galilea. ꞌBatsaꞌen yakutsejen kjuajere, ꞌba kuakjainre xutare ngatꞌare kui.
12ꞌBa jaskan nga je kuán kibiu, Jesús kiji naxinanda Capernaum nga tjenko nare ko ntsꞌe ꞌba ko xutare. ꞌBa kio tsekꞌendu jó ján nixtjin.
Jesús ꞌbaxje nchja xi inyabateña tjiuba ningu
Mt. 21:12-13; Mr. 11:15-18; Lc. 19:45-46
13Kionga je timatiña sꞌi pascua xi ꞌbaxje xuta judío, Jesús kiji naxinanda Jerusalén. 14ꞌBa ña ma ndetsinre ningu tsabe nchja xi inyabateña tjiundija ko chutsanga ꞌba ko tjiunise tiba ꞌba ko nchja xi tjindu kionga inyatsikꞌantjaiya ton. 15ꞌBa ꞌbatsaꞌen Jesús kiskjebe naꞌñu ꞌba kitsinda jngu naꞌñuꞌya ꞌba ko kui tsꞌaxje tsiꞌikoni ngaya ningu chutsanga ko tjiundija. ꞌBa nde kiskanitsojo tonre nchja xi kio inyatsikꞌantjaiya ton ꞌba tsoꞌotsakjan yamixare. 16ꞌBa kitsure nchja xi inyabateña tjiunise tiba:
—¡Tjiꞌnaxjio tjiunisenu ngaꞌe! ¡Bi ndetsin ñoꞌon ndaba Naꞌenna̱!
17ꞌBa ꞌbatsaꞌen jaꞌetsjenre xutare nga ꞌbitsaꞌen kuaꞌindutꞌa enre Naꞌenchana: “Tifengi ngaꞌñuna̱ ngatꞌa ꞌñu tsꞌaxtiu tsimijaa̱n niꞌyari.”
18ꞌBa ꞌbatsaꞌen xuta judío tsiningiyare Jesús:
—¿Mé= kjuakun xi tebakutsejennii̱ nga tjinri kjuaꞌñu nga ꞌbi teñeꞌen? —kitsure.
19ꞌBa Jesús kitsingojore:
—Tikjekjuo ningubi, ꞌba an ján nixtjin skjenitjen ngañaa̱.
20ꞌBa xuta judío kitsu ngani:
—Yachan jon nu kuandani ningubi. ¿Jótsaꞌen ján nixtjin xjunitjenni ji?
21Tunga ngatꞌare yojore Jesús= kinchja nga kitsu ningu. 22Kui= kjuañu, kionga je jaꞌaya nganire ngajinre mikꞌen, jaꞌetsjenre xutare mé= xi kitsu ꞌba kuakjainre en xi kuaꞌindutꞌa enre Naꞌenchana ko en xi kitsu Jesús.
23ꞌBa kionga tijña Jesús naxinanda Jerusalén ngajinre sꞌi pascua, ne nkjin xuta kuakjainre ngatꞌare kui kionga tsabe kjuakun xi kitsaꞌen. 24Tunga Jesús, bi kunre ngatꞌare xutabiu, ngatꞌa be= jó kun ngatsiꞌi. 25Bi kuachjenre tsa tjin xi kuetsuyare jó= kun xuta, ngatꞌa be= jó kun ngajin inimare.
Currently Selected:
SAN JUAN 2: vmy
Highlight
Share
Copy
Want to have your highlights saved across all your devices? Sign up or sign in
©2009, Wycliffe Bible Translators, Inc. All rights reserved.