Lucas 1
1
Jun tyol Lucas tuꞌn t-xi xkye uꞌj lo
1Ma kubꞌ ntzꞌibꞌinjiꞌy luꞌn ay Tyople, kꞌuꞌjlinxix wuꞌn: Ilaꞌ o bꞌaj tzꞌibꞌinte tkyaqiljo jniꞌ o bꞌaj qxol, 2ex tzeꞌnkuxjo o bꞌaj yekꞌin qe kyuꞌn i lontexix, ex kyij oqxeninxix kye, tuꞌn kyxiꞌ qꞌmalte tzeꞌnxix toke. 3Ex ikyxjo weꞌ, chebꞌexix o bꞌaj nqaniꞌn tzeꞌnxix tzaje xkyeye, tuꞌntziꞌn kyjel ntzꞌibꞌiꞌn ex kyjel nikꞌuꞌnxixa tey, 4tuꞌntzin telxix tnikyꞌa te o bꞌaj xnaqꞌtzin tey.
5Teꞌ attaq Herodes kawil toj Judey, attaq jun chꞌuq pale tzajnin tiꞌj tyajiljo jun qtzan pale Abías,#1Cr. 24:10. ex tojjo chꞌuq anetziꞌn tokxtaq jun pale, Zakariy tbꞌi. Ataqtzin t-xuꞌjil Zakariy, Lisabet tbꞌi, tzajnin tiꞌj tyajiljo qtzan tnejil pale Aarón. 6Kykabꞌilx tbꞌanil xjalqe; ntiꞌxtaq chꞌin bꞌaꞌn tok qꞌmet kyiꞌj qa nya wenqe, quꞌn noqx niminkutaqjo tkawbꞌil Dios kyuꞌn. 7Noq tij xjalqel, ntiꞌx jun kyal otaq tzul, quꞌn mitaq n-alinxjo t-xuꞌjil.
Jun tqanil tiꞌj titzꞌjlin Juan, a Jawsil Aꞌ
8Pon jun qꞌij kye chꞌuq pale a tzajninqe tiꞌjjo qtzan Abías tuꞌn kyokx naꞌl Dios, ex patil pon tojjo nim ja te naꞌbꞌl Dios. 9Me ataqtziꞌn ntene kyuꞌn nej nbꞌaj kyjyoꞌn kyxolx, alkye jun tuꞌn tokx tojjo tnejil ja te nabꞌl Dios, a jaꞌ nkubꞌe patittaq pon; me a Zakariy tzyet tuꞌn tokx. 10Teꞌ tokx Zakariy naꞌl Dios ex patil pon, kykyaqiljo jniꞌ xjal i bꞌaj kyij naꞌl Dios peꞌn. 11Nnaꞌntaq Dios, ex npatintaq pon, ntiꞌxtaq toj tnabꞌl, me atzaj tok tkaꞌyin noq waꞌl jun t-angel Dios ttxlajjo meẍ, jaꞌ nbꞌaj kubꞌ patittaqjo jniꞌ pon. 12Teꞌ tlonte Zakariy angel, noq jaw kaꞌylaj, ex bꞌeꞌx tzaj xobꞌ.
13Me bꞌeꞌx xi tqꞌmaꞌn angel te: ¡Zakariy! Mina tzaj xobꞌa, quꞌn atziꞌn tnaꞌj Diosa, ma tzaj ttzaqꞌwin Dios. Atzin t-xuꞌjila tzul jun tal, ex atzin tbꞌi k-okil tqꞌoꞌn, Juan. 14Okx ktzalajilxa tiꞌj, ex nya oꞌkxa; quꞌn nimx txqantl ktzalajil tiꞌj, aj tul itzꞌje. 15Quꞌn nimx k-ajbꞌila tkꞌwala te Dios. Nya txꞌujtinel,#Num. 6:3. ex naꞌmxtaq tul itzꞌje, noq nojninl tanmin tuꞌn Xewbꞌaj Xjan. 16Nimx aj Judiy kꞌwel kybꞌinchin kyten twutz Dios tuꞌn. 17A kꞌwel nej twutzjo Kolil tukꞌa nim tipin ex tukꞌa Xewbꞌaj Xjan, tzeꞌnkuj Elías, a yolil Tyol Dios ojtxe, tuꞌn tkubꞌ kyxmoxin manbꞌaj kyibꞌ kyukꞌa kꞌwalbꞌaj, ex ikyqex kꞌwalbꞌaj kyukꞌa manbꞌaj;#Mal. 4:5-6. ex aye xjal, a mina nkubꞌ kybꞌinchin a taj Dios, tuꞌn tel kynikyꞌ tiꞌj, ikyxjo tzeꞌnqeku a nkubꞌ kybꞌinchin wen, tuꞌntzintla noq bꞌantnintl kyten aj tul Kolil.
18Xi tqꞌmaꞌn Zakariy te angel: ¿Tiꞌn ktzajil tqꞌoꞌn weꞌy tuꞌn t-xi niminjiꞌy tyola? Quꞌn noq taꞌẍqinla ex ikyx nxuꞌjiljiꞌy, ¿Exsin tuꞌn tul jun nkꞌwala jaꞌlin?
19Xi ttzaqꞌwin angel te: ¡Ayiꞌn Gabriel! Nchin ajbꞌiꞌn te Dios.#Dan. 8:16; 9:21. Ma chin tzaj tchqꞌoꞌn yolil tukꞌiy, ex qꞌmalte tqaniljo luꞌn tey. 20Me tuꞌn mina xi tniminjiy a xi nqꞌmaꞌn tey, mina bꞌantl tyoliꞌn jaꞌlin, tzmaxi ajxi tjapin tqꞌijjo, a ma txi nqꞌmaꞌn tey.
21Me ayetziꞌn jniꞌ xjal nchi bꞌaj naꞌntaq Dios peꞌn otaq chi bꞌaj jaw qanlaj kyxolile, quꞌn tuꞌn nqꞌaltex n-etztaq Zakariy toj ja te naꞌbꞌl Dios. 22Atzaj teꞌ tetz, mix bꞌantil tyolin kyukꞌa jniꞌ xjal, noq tqꞌobꞌqe i xi tyekin, tuꞌn tyekꞌinte jun tiꞌ. Tuꞌntziꞌn ikyjo, bꞌeꞌx el kynikyꞌjo jniꞌ xjal te, qa attaq jun otaq tli, quꞌn kukx xaꞌye mix bꞌantil tyolin.
23Teꞌ kyjapin bꞌajjo qꞌij tuꞌn taqꞌnin tojjo nim ja te naꞌbꞌl Dios, bꞌeꞌx aj tja.
24Tbꞌajlinxiꞌ ikyjo, n-okku tzꞌaq taljo t-xuꞌjil. Teꞌ tok tzꞌaq tal, ex jweꞌ xjaw mix etz bꞌete toj tja, ex tqꞌma: 25Ma qꞌaqꞌin tkꞌuꞌj Dios wiꞌja jaꞌlin, tuꞌn mina chi yolbꞌine xjal wiꞌja, tuꞌn ntiꞌx jun wala otaq tzul, chi Lisabetjo.
Jun tqanil tiꞌj titzꞌjlin Jesús
26Tbꞌajlinxiꞌ qaq xjaw toklin tzꞌaq tal Lisabet, teꞌ t-xi tchqꞌoꞌn Dios angel Gabriel tzma Nazaret, jun tnam toj txꞌotxꞌ te Galiley, 27tuꞌn t-xiꞌ yolil tukꞌa jun txin, a naꞌmtaq tlonte jun ichin. Atzin txin, Mariy tbꞌi.#Mt. 1:18. Otaq ja yolin tuꞌn tja meje tukꞌa jun ichin, Jse tbꞌi, tzajnin tiꞌj tyajil qtzan nmaq kawil David.
28Teꞌ tkanin Gabriel, xi tqꞌmaꞌn teꞌ txin: Ma chin tzaja qꞌolbꞌil tey, Mariy. Ax Dios tukꞌiy ex kyꞌiwlinxixa tuꞌn.
29Teꞌ tbꞌinte tyol angel ikyjo, noq el kyim tuꞌn, exsin kubꞌ tbꞌisin tiquꞌnil xi tqꞌmaꞌn angeljo te ikyjo.
30Xi tqꞌmaꞌn angel te: Mina ja xobꞌa Mariy. Ntzalaj Dios tiꞌja, 31ex k-okil tzꞌaq jun tala jaꞌlin. Ex ajtzin tul itzꞌje, k-okil tqꞌoꞌn tbꞌi Jesús.#Mt. 1:21. 32Tbꞌanil ichinx ex k-okil qꞌoꞌn tbꞌi te Tkꞌwaljo Dios nimx toklin. Ex ax Dios k-okil qꞌonte te kawil, tzeꞌnku qtzan t-xeꞌchil, a David, 33tuꞌn tkawin kyibꞌaj aj Judiy te jun majx, quꞌn a tkawbꞌil nlay bꞌajx.#Is. 9:7.
34Xi ttzaqꞌwin Mariy te angel: ¿Tzeꞌn tten tuꞌn tok tzꞌaq wala, ex bꞌajxi chin kubꞌ kẍeyiy tukꞌa jun ichin? chiꞌ.
35Xi tqꞌmaꞌn angel te: A t-xlekemil Xewbꞌaj Xjan kꞌwel tibꞌaja tzeꞌn t-xlekemil muj, ex noq tuꞌn tipin Dios, a nimxix toklin, k-okil tzꞌaq tala. Tuꞌntziꞌn ikyjo, a tala tzul itzꞌje xjanxix ex k-okil tbꞌi te Tkꞌwal Dios. 36Ex ikyxjo t-xjalila Lisabet, ntiꞌtaql bꞌisin tuꞌn, tuꞌn tul jun tal, quꞌn noq tijl. Me atzin jaꞌlin, tzul itzꞌje jun tal, quꞌn o bꞌant qaq xjaw toklin tzꞌaq, 37quꞌn ntiꞌx te Dios nlayit bꞌant tuꞌn.#Gen. 18:14.
38Xi tqꞌmaꞌn Mariy: Noq bꞌiꞌnku we wuꞌn tzeꞌn taj Dios wukꞌiy. Qa ikyjo tzeꞌn ma tqꞌmay, bꞌaꞌnla.
Ex bꞌeꞌx xiꞌ angel.
Tej t-xtaꞌj Mariy qꞌolbꞌilte Lisabet
39Tbꞌajlinxiꞌ ikyjo, xi tajqelin Mariy tibꞌ, tuꞌn t-xiꞌ toj jun tnam attaq txol wutz te Judey. 40Teꞌ tkanin, okx toj tja Zakariy, ex qꞌolbꞌin te Lisabet. 41-42Teꞌ tbꞌiꞌnte Lisabet teꞌ tqꞌolbꞌin Mariy te, atziꞌn tal bꞌeꞌx jaw yekj toj tkꞌuꞌj. Ex nojnin tanmin Lisabet tuꞌn Xewbꞌaj Xjan, ex xi tqꞌmaꞌn kuj wen te Mariy: A te kyꞌiwlinxix kyxol jniꞌ qya twutz txꞌotxꞌ, ex ikyxjo tala tzul itzꞌje. 43Ex atzin we noq jun tal qyaqinxiꞌy, ¿Exsin tuꞌn wul qꞌolbꞌaja tuꞌn tnana Klol weꞌy? 44Quꞌn noqx teꞌ xqꞌolbꞌin weꞌy, bꞌeꞌx xjaw yekjo wala tuꞌn tzaljbꞌil toj nkꞌuꞌja. 45Kyꞌiwlinxix te, tuꞌn xi tnimiꞌn qa tuꞌn tbꞌajjo jniꞌ saj tqꞌmaꞌn Dios, a tAjaw Tkyaqil, tey.
46Tqꞌma Mariy:
Kjawil nnimsiꞌn tukꞌa tkyaqil wanmiꞌn tbꞌi wAjawa.#1Sa. 2:1-10.
47Ex tzunx ntzalajx wanmiꞌn tiꞌj Dios, a Klol weꞌy.
48Ntiꞌxtaq wokliꞌn, me atziꞌn jaꞌlin, ma chin tzaj tkaꞌyiꞌn Dios.
Oꞌkqinxa nimxix wokliꞌn kyxoljo jniꞌ xjal jaꞌlin.
49Quꞌn a Dios nimxix toklin, tbꞌanilx ma tzaj tqꞌoꞌn weꞌy. Xjanxixjo tbꞌi.
50Atx te Dios tqꞌaqꞌbꞌil tkꞌuꞌj kyiꞌjjo nchi kubꞌ niminte.
51Tukꞌa tkyaqil tipin, nchi el tiꞌn nimsil kyibꞌ toj kytxꞌixew, ex n-ok tyupiꞌn kybꞌis.
52N-el tiꞌn kyoklin nmaq kawil,
ex nxi tqꞌoꞌn kye a ntiꞌ kyoklin.
53Ayetziꞌn at waꞌyaj kyiꞌj, nxi tqꞌoꞌn kywa.
Ex n-el tiꞌn kyeꞌ a noqx nbꞌaj kyyajin.
54Mi ẍi el najjo aj Judiy toj tkꞌuꞌj.
Ma chi tzaj tmojin tukꞌa tqꞌaqꞌbꞌil tkꞌuꞌj.
55Ikytzin tqꞌma ojtxe kye qtzan qyajil Abraham ex kye txqantl kchi ul itzꞌje.#Gen. 17:7.
56Kyij Mariy oxe xjaw tja Lisabet. Teꞌ kybꞌajjo oxe xjaw, bꞌeꞌx aj tja.
Tej titzꞌje Juan, a Jawsil Aꞌ
57Teꞌ tjapin qꞌij tuꞌn tkubꞌ tzꞌaq Lisabet, ul jun kyal qꞌa. 58Teꞌ tok kybꞌiꞌn jniꞌ t-xjalil, ex jniꞌ xjal, a at iteꞌke te, i xtaꞌj qꞌolbꞌilte, quꞌn otaq qꞌaqꞌin tkꞌuꞌj Dios tiꞌj.
59Teꞌ tbꞌaj wajxaq qꞌij tulin itzꞌje, ul aqꞌbꞌaj techiljo qꞌa,#1:59Ajo aqꞌbꞌaj techil, circuncisión tbꞌi toj kastiy. tzeꞌn nchi tenetaqjo jniꞌ kykꞌwal aj Judiy, a qꞌaqetaq.#Lv. 12:3. Atziꞌn teꞌ tuꞌntaq tok tbꞌi, Zakariytaq tbꞌi tuꞌntaq tok qꞌoꞌn, tzeꞌnkuxjo tbꞌi ttata. 60Me mix ttziye tnana, quꞌn Juan tbꞌi k-okilch.
61Xi kyqꞌmaꞌn xjal te: ¿Tiquꞌn ikyjo? ¿Ma attzin jun kyeꞌ iky tbꞌi? chi chiꞌ.
62Xi kyqanin noq tukꞌa techil te ttata tiꞌtaq tbꞌi tuꞌn tok. 63Xi tqanin ttata jun tzꞌlan, jaꞌ tuꞌn tkubꞌ tzꞌibꞌite tbꞌi. Atzaj teꞌ tzaj ttzyuꞌn, kubꞌ ttzꞌibꞌin, Juan tbꞌi. Teꞌ tok kybꞌiꞌn jniꞌ xjal ikyjo, jotx bꞌeꞌx i bꞌaj jaw kaꞌylaj.
64Ex tbꞌajlinxiꞌ ikyjo, bꞌeꞌx bꞌantl tyolin Zakariy, exsin ok ten nimsil tbꞌi Dios.
65Jotxjo jniꞌ xjal antza, junx kyukꞌa tkyaqiljo najleqe tojjo jniꞌ najbꞌil kyxol wutz te Judey, i bꞌaj jaw kaꞌylaj tiꞌjjo jniꞌ otaq bꞌaj. 66Tkyaqilxjo jniꞌ otaq bꞌaj bꞌinte ikyjo, bꞌaj jaw yolin toj kyanmin ex kyqꞌma: ¿Titzila kbꞌantil tuꞌn kꞌwal? Quꞌn nimx toklin ma tzaj tqꞌoꞌn Dios, a tAjaw Tkyaqil.
Ajo tyol Zakariy tiꞌj tkꞌwal
67Zakariy, a ttata neꞌẍ, noj tanmin tuꞌn Xewbꞌaj Xjan, ex ok ten yolil tuꞌn, ex chiꞌ kyjaluꞌn:
68Kyꞌiwlinxixjo tbꞌi Dios te Israel, a tAjaw Tkyaqil,
quꞌn ma tzul klol teꞌ Ttanim.
69Ma tzaj tqꞌoꞌn jun Klolqe, a nimx toklin,
tzajnin tiꞌj tyajiljo qtzan nmaq kawil David, a kubꞌ niminte.
70Atziꞌn luꞌn a qꞌumj ojtxe kyuꞌn xjan yolil Tyol Dios, tej kyqꞌma:
71A tuꞌn tel klonqe kye qajqꞌoj ex kye aye kykyꞌeꞌx qiꞌj;
72tuꞌn ttzaj qꞌaqꞌin tkꞌuꞌj kyiꞌjjo qyajil,
ex tuꞌn mina tzꞌel naje toj tkꞌuꞌj, a tumil xjanxix bꞌant tiꞌj tuꞌn;
tuꞌn kykyij Ttanim toj wen tukꞌa.
73Ex atziꞌn bꞌant tiꞌj tuꞌn, ex tqꞌma te Abraham, a qxeꞌchil kyjaluꞌn,
74tuꞌn qel tkloꞌn kye qajqꞌoj,
ex tuꞌn qajbꞌin te tukꞌa tkyaqil qanmin;
75tuꞌn tkubꞌ qbꞌinchin qten jikyinxix toj tkyaqil qchwinqil twutz.
76Atziꞌn te, mil: Yolil Tyol Dios teꞌ tbꞌi k-okil,
a Dios nimxix toklin.
Quꞌn ay kꞌwel nej twutzjo Kolil qꞌmalte tuꞌn tkubꞌ kybꞌinchinxjal kyibꞌ twutz.#Mal. 3:1.
77Kꞌwel tnajsin Dios kyila,
ex kchi kletila tuꞌn, chkujiy kye.
78Quꞌn a Dios tukꞌa tqꞌaqꞌbꞌil tkꞌuꞌj qiꞌj, ktzajil tqꞌoꞌn jun tzaj toj kyaꞌj tzeꞌnku tqan qꞌij,
79tuꞌn tkꞌant toj kychwinqiljo
ayeꞌ nchi bꞌet toj najin,
ex tuꞌn tkubꞌ nej qwutz toj tbꞌeyil bꞌaꞌn.#Is. 9:2.
80Atziꞌn kꞌwal nchꞌiyxixtaq tweꞌ ex tnabꞌl, exsin najan tojjo najbꞌil, jaꞌ mixtaq aꞌl najle toj, tzmaxi tpon qꞌij, jaꞌ tuꞌn tkubꞌ tyekꞌine tibꞌ kyxol aj Judiy.
Currently Selected:
Lucas 1: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.