Juan 15
15
Il tiꞌj tuꞌn qmujbꞌin te qibꞌ tukꞌa qMan
1Tbꞌajlinxiꞌ ikyjo, tzaj tqꞌmaꞌn Jesús qeꞌy, a awoꞌy t-xnaqꞌtzbꞌin: Ayin weꞌ tzeꞌnku jun tqan uv twutzxix, ex atzin nMaꞌn tzeꞌnku jun aqꞌnil tiꞌj. 2N-el ttxꞌemin tkyaqiljo tqꞌobꞌ, a ntiꞌ twutz n-el. Ex tkyaqiljo tqꞌobꞌ, a at twutz n-el, k-elitz ttxꞌemin jniꞌ ttzqijlin kyxolile, tuꞌntzin twutzin nimxix. 3Me atzin kye ma chi saqixa tuꞌn nxnaqꞌtzbꞌila ẍi ex nqꞌoꞌn, ikyxjo tzeꞌnku jun tqꞌobꞌ lobꞌj ma tzꞌel bꞌaj tzqijlin. 4Ikytzin kyejiꞌy, kukx kymujbꞌin kyibꞌjiꞌy wukꞌiy tzeꞌnku weꞌ kukx nmujbꞌin wibꞌjiꞌy kyukꞌiy. Quꞌn jun tqꞌobꞌ tze, nlay tzꞌel twutz tuꞌnx tibꞌx, a qa nya mujlek tiꞌjjo tqan. Ikytzin kyejiꞌy, nlayx tzꞌelx kye kywutz toj kychwinqila, qa nya mujleqeka wukꞌiy.
5Ayin weꞌ tqan uv; ayetzin kye tqꞌobꞌ. Ankye te mujlek wiꞌja, ex mujleqinka tukꞌa, nimxpen teꞌ twutz n-el. Quꞌn ntiꞌx kye aku bꞌant kyuꞌn kyjunalxa. 6Ankye te tkyꞌeꞌ tuꞌn tok tmujbꞌin tibꞌ wukꞌiy, okpin k-elix xoyit teꞌ, tuꞌn ttzqij kyukꞌa txqantl tqꞌobꞌ tze, a tzqij tuꞌn kyxi chmet, ex tuꞌn kytzꞌeꞌy tuꞌn qꞌaqꞌ te jun majx. 7Qa kukx kymujbꞌin kyibꞌjiꞌy wukꞌiy, ex qa mi s-el najjo nxnaqꞌtzbꞌiꞌn toj kykꞌuꞌja, kyqanintza noq alkye kyaja, ex ok ktzajil qꞌoꞌn. 8Qa nimxix kywutza s-el te nimsbꞌil tbꞌi nMaꞌn, antza k-elile tnikyꞌtzajil qa twutzxix nxnaqꞌtzbꞌinqiꞌy.
9Tzun nchi ok nkꞌuꞌjlin kyeꞌ, ikytziꞌn tzeꞌnku te nMaꞌn nchin ok tkꞌuꞌjliꞌn. Kukx chi lipekjiꞌy tiꞌjjo tqꞌaqꞌbꞌil nkꞌuꞌja, a at kyiꞌja. 10Qa ma kubꞌ kyniminjiꞌy jniꞌ nnukꞌbꞌila, okpin kchi okil lipetza tiꞌjjo tqꞌaqꞌbꞌil nkꞌuꞌja, a at kyiꞌja, ikytziꞌn tzeꞌnku weꞌ nkubꞌ nniminjiꞌy tnukꞌbꞌil nMaꞌn, ex loqin lipcheqink tiꞌjjo tqꞌaqꞌbꞌil tkꞌuꞌj, a at wiꞌja. 11Nxi nyoliꞌn ikyjo, tuꞌntzin kyjaw tzalaja wukꞌiy, ex tuꞌntzin kynoja tuꞌn ntzaljbꞌila. 12Atzin nnukꞌbꞌiljiꞌy lo, tuꞌn kykꞌuꞌjlin te kyibꞌa kyxolxa, tzeꞌnku we nchi ok nkꞌuꞌjliꞌn.#Jn. 13:34; 15:17; 1Jn. 3:23; 2Jn. 5. 13Ex ante qkꞌuꞌjbꞌiljo nimxix toklin, tuꞌn t-xi qqꞌoꞌn qchwinqil noq tuꞌn tpaj qukꞌa. 14Me ayetzin kye ma chi oka te wukꞌiy, qa ma kubꞌ kybꞌinchiꞌn tzeꞌnkuxjo ma txi nqꞌmaꞌn. 15Mi chi ok nqꞌoꞌnl kye jaꞌlin te waqꞌnila, quꞌn mi bꞌinte aqꞌnil tuꞌn, tiꞌ kꞌwel tbꞌinchin tajaw aqꞌuntl. Qalaꞌ kchi okil nqꞌolbꞌin kye te wukꞌiy, quꞌn ma txi nyekꞌiꞌn kyeꞌy kykyaqiljo ma tzaj tqꞌmaꞌn nMaꞌn weꞌy. 16Quꞌn nyaqe kyeꞌ ẍi jaw skꞌoꞌn weꞌy; qalaꞌ ayin weꞌ ẍin jaw skꞌoꞌn kyeꞌy. Tuꞌnpetziꞌn, kxel woqxenin kyeꞌy, tuꞌn kyxiꞌy, ex tuꞌn tel kywutza nimxix toj kychwinqila, ex atzin kywutza, tuꞌn tten te jun majx. Ikytziꞌn, ktzajile tqꞌoꞌn nManjiꞌy tkyaqiljo kxel kyqaniꞌn toj tumil nbꞌiꞌy. 17Atzin kxel nqꞌmanjiꞌy juntl majl kyeꞌy, tuꞌn kykꞌuꞌjlin te kyibꞌa kyxolxa.
Tej t-xi tqꞌmaꞌn Jesús qa nimku xjal k-okil lipin kyiꞌj kyukꞌa t-xnaqꞌtzbꞌin
18Ex tzaj tqꞌmaꞌnl Jesús qeꞌy, a awoꞌy t-xnaqꞌtzbꞌin: Qa ma chi el ikyꞌiꞌn kyuꞌnxjal tzaluꞌn twutz txꞌotxꞌ, bꞌiꞌnku kyuꞌn qa ayiꞌn nej ma chin el kyikyꞌin. 19Noqit iteꞌkuxa toj il, matla chi ok kꞌuꞌjliꞌn kyuꞌn txqantl, tzeꞌnkuxjo n-ok kykꞌuꞌjlinxjal kyibꞌ kyxolx. Me noq tuꞌn ayiꞌn ẍin jaw skꞌoꞌn kyeꞌy kyxolxjal tzaluꞌn twutz txꞌotxꞌ. Tuꞌnpetziꞌn, kchi elil ikyꞌin kyuꞌn, quꞌn nyatza iteyiy kyxol. 20Mi tzꞌel najx toj kykꞌuꞌja, a xi nqꞌmaꞌn kyeꞌy: Mix aꞌl jun te aqꞌnil nimx toklin tzeꞌnku te tajaw aqꞌuntl.#Mt. 10:24; Lc. 6:40; Jn. 13:16. Quꞌn qa ma chi ok lipinxjal wiꞌja, ex ikyx kyejiꞌy, kchi okil lipin kyiꞌja. Me qa ma kubꞌ kynimiꞌn nxnaqꞌtzbꞌila, ex ikyxjo kye, ok kꞌwel kybꞌiꞌn kyxnaqꞌtzbꞌila. 21Tkyaqiljo luꞌn k-okil kybꞌinchin kyiꞌja noq tuꞌn npaja, quꞌn mi ojtzqiꞌn a saj chqꞌoꞌn weꞌy kyuꞌn. 22Ntiꞌtla kypajxjal noqit mi ẍin ula qꞌmalte kye qa at kyil. Me tuꞌn ma chin ula qꞌmalte Tbꞌanil Tqanil kye, ntiꞌ kykolbꞌil kyibꞌ tiꞌjjo kyil. 23Ex noq tuꞌn nchin el kyikyꞌiꞌn, nyekꞌin qa n-el kyikyꞌin nMaꞌn. 24Ex ntiꞌxitla kypaj, noqit ntiꞌx jun tiꞌ ma bꞌant wuꞌn kyxol, a mix aꞌl juntl aku bꞌant tuꞌn. Me exla qa ma kyli tkyaqiljo xbꞌant wuꞌn, me n-ok tilil kyuꞌn tuꞌn wel kyikyꞌiꞌn, ex ma tzꞌel kyikyꞌin nMaꞌn. 25Me ma bꞌajjo ikyjo noq tuꞌn tjapiꞌn a yol tzꞌibꞌin tojjo Tuꞌjil Tyol Dios, a bꞌiꞌn kyuꞌn, tej tqꞌma: Kchin elil kyikyꞌin noq kukxjoch.#Sal. 35:19; 69:4.
26Me ajtzin tuljo Xewbꞌaj Xjan, a Onil, ex Qꞌuqbꞌil kykꞌuꞌja, ktzajil tqꞌmaꞌnjo twutzxix wiꞌja, quꞌn tkꞌatz Dios ktzajile. 27Ex ikyx kyejiꞌy, kchi yolil kyeꞌ twutzxix wiꞌja, quꞌn o chi teꞌn wukꞌiy atxix tej saj xkye.
Currently Selected:
Juan 15: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.