Aj Ebrey 2
2
Jun xobꞌtzbꞌil tuꞌn mi kyij qiꞌjlin Tbꞌanil Tqanil kolbꞌil
1Tuꞌn tel qnikyꞌ tiꞌj jaꞌlin, qa a Tkꞌwal Dios nimxixtl toklin kywutz angel, il tiꞌj tuꞌn tok tilil quꞌn, tuꞌn tkubꞌ qnimin Tyol, a Tbꞌanil Tqanil, a o qbꞌi, tuꞌn mi qo el txalpaj toj qnimbꞌil. 2Atzin tkawbꞌil Moisés toj Tuꞌjil Tyol Dios, tzaj tqꞌoꞌn Dios kye xjal, noq kyuꞌn angel. Tzaj jun kawbꞌil kuj wen kyibꞌajxjal, qa mataq tzꞌel kyiꞌjliꞌn yol luꞌn. 3Atzin Tyol Tkꞌwal Dios, a Tbꞌanil Tqanil kolbꞌil, nimxixtl toklin tzeꞌnku a tzaj kyqꞌoꞌn angel. Tunpetziꞌn, nlayxla qo klet tjaqꞌ tkawbꞌil Dios kujxix, qa ma tzꞌel qiꞌjlin Tyoljo Tkꞌwal. Quꞌn tuꞌn akuxix te qAjaw qꞌmaꞌn teꞌ kolbꞌil lo, ex ma tzul kanin tqanil qxol kyuꞌn tnejil nimil, ayeꞌ i lonte, ex i yolin tukꞌa. 4Majxte qMan Dios yekꞌinte qa twutzxixjo yol luꞌn, noq tuꞌn nim techil ex nim yekꞌbꞌil tipin, ex tuꞌn tkyaqiljo nbꞌant kyuꞌn nimil, a qꞌoꞌntz tzeꞌnku jun oyaj tuꞌn Xewbꞌaj Xjan, ex tzeꞌnku tajbꞌil tukꞌa junjun.
Ok Jesús te xjal tzeꞌnku qe
5Nqo yolin tiꞌjjo saq tchꞌiysbꞌin Dios, a tzul kanin. ¿Me alkye kkawilte saq tchꞌiysbꞌin anetziꞌn? Nya angel, qalaꞌ ax xjal, 6quꞌn toj Tuꞌjil Tyol Dios ntqꞌmaꞌn:
Noq xjalqoꞌy, ex atzin te Dios nimxix toklin.
¿Tiquꞌntz nqo tzaj tnaꞌn, ex tiquꞌn nbꞌisin qiꞌja?
7-8Tnejil, tzaj tqꞌoꞌn kye xjal jun tqoptzꞌajiyil tipin, ex jun kyoklin tibꞌaj tkyaqil twutz txꞌotxꞌ.
Tkyaqiljo lo tzaj tqꞌoꞌn tuꞌn tkawit kyuꞌn xjal.
Ex ntiꞌtaq jun tiꞌ o kyij naj toj kykawbꞌil.
Me atzin jaꞌlin, noq te kabꞌe qꞌij, o tzaj tqꞌoꞌn kyoklin,
me nyaleꞌ tzeꞌn kye angel, chi Tuꞌjil Tyol Diosjo.#Sal. 8:4-6.
Tuꞌnpetzintzjo, ntiꞌ o qli, tuꞌn tnimitjo luꞌn. 9Me qo ximin tiꞌj Jesús: Kabꞌe qꞌij, ok tqꞌoꞌn Dios toklin nyala tzeꞌn kye angel, qalaꞌ ikyjo tzeꞌnku xjal, quꞌn iltaq tiꞌj tuꞌn tkyim, ex jun angel nlay bꞌant tuꞌn tkyim. Noq tuꞌn tqꞌaqꞌbꞌil tkꞌuꞌj qMan Dios, kyime Tkꞌwal, tuꞌn tpaj tkyaqil xjal. Tuꞌntzin ikyjo, nimxix toklin jaꞌlin, ex nim tqoptzꞌajiyil tipin Dios, noq tuꞌn tkyimlin twutz cruz.
10Taj Dios tuꞌn tkolin kyiꞌj xjal, tuꞌn tok jun kyoklin tzeꞌnku te tnejil, tuꞌn tyekꞌin tqoptzꞌajiyil tipin toj kychwinqil, ex tuꞌn kykawiꞌn juntl majl tibꞌaj tkyaqiljo, a kubꞌ tchꞌiysin Dios. Tuꞌnpetzintzjo, iltaq tiꞌj tuꞌn ttzaj tsmaꞌn qMan Dios Jesús, a Tkꞌwal, tuꞌn tkyim te Kolil kyiꞌjxjal, ex tuꞌn tjapin bꞌaj tkyaqil tajbꞌil qMan, tuꞌn tok tzꞌaqle te jun majx. 11Noq tuꞌn tkyimlin Jesús, a Tkꞌwal Dios, ma qo el tpaꞌn tuꞌn qok saqxix, ex ma qo ok kꞌwalbꞌaj te Dios. Tuꞌntzintzjo jaꞌlin, noq tuꞌn qnimbꞌil tiꞌj, junx qtata tukꞌa Jesús. Ex atziꞌn jaꞌlin, ntiꞌ ntxꞌixwe Jesús tuꞌn tok tqꞌoꞌn qbꞌi te titzꞌin, quꞌn junchꞌin qtata tukꞌa.
12Ex ikyx tqꞌma Tkꞌwal Dios te tMan toj Tuꞌjil Tyol:
Kxel nqꞌmaꞌn weꞌ tbꞌiy kye witzꞌiꞌn, ayeꞌ nimil,
ex kxel nbꞌitziꞌn bꞌitz kyxol toj tjay, ja n-oke kychmoꞌn kyibꞌ.#Sal. 22:22.
13Ex juntl tumil chi Tkꞌwal Diosjo kyjaluꞌn: Kqebꞌil nkꞌuꞌja tiꞌja.#Is. 8:17.
Ex juntl majl tqꞌma: Ex loqiꞌn lo, junx kyukꞌa tkꞌwala, ayeꞌ o chi tzaj tqꞌoꞌn weꞌy.#Is. 8:18.
14Xjalqo junxchꞌin qchibꞌjil ex junchꞌin qchkyꞌel, quꞌn xjalqo qkyaqilx. Ikytzintzjo, iltaq tiꞌj tuꞌn tok Jesús te xjal tzeꞌnku qe tukꞌa tchibꞌjil ex tukꞌa tchkyꞌel, quꞌn noq tuꞌn ikyjo, bꞌantjo tkyimlin te chojbꞌil qil. Ex noq tuꞌn tkyimlin Jesús, ex tej tjaw anqꞌin juntl majl, kubꞌ tiꞌj tajaw kyimin, a axjo tajaw il. 15Noq tuꞌn tkyimlin Jesús, o chi tzaqpaj tkyaqil xjal, ayeꞌ najleqe tzaluꞌn twutz txꞌotxꞌ tukꞌa nim xobꞌajil te kyimin.
16Mi s-ul Jesús tzeꞌnku jun angel tuꞌn kyklet angel, qalaꞌ ma tzul tzeꞌnku jun xjal aj Judiy, a tzajnin tyajil tiꞌj Abraham, tuꞌn kyklet kykyaqil xjal tuꞌn. 17Tuꞌntzin qklet, iltaq tiꞌj tuꞌn tok Jesús tzeꞌnkuxixjo qe, awo xjalqo. Oꞌkx jun tumiljo, tuꞌn tten tqꞌaqꞌbꞌil tkꞌuꞌj qukꞌa, ex tuꞌn tok qꞌoꞌn toklin te tnejilxix pale, tuꞌn tyolin kyiꞌj xjal twutz qMan Dios; ex tuꞌn tchjet qil tuꞌn tchkyꞌel el chitj twutz cruz, noq tuꞌn qklet awo, a o qo nimin tiꞌj. 18Ikyꞌx tkyaqil yajbꞌil ex nimku tiꞌ tuꞌn, tuꞌntaq tkubꞌ tzꞌaq toj il, me mix kubꞌe tiꞌj. Tuꞌntzintzjo, nqꞌaqꞌin tkꞌuꞌj qiꞌj, ex ntzaj tqꞌoꞌn jun oꞌnbꞌil qe, tuꞌn mina qo kubꞌ tzꞌaq toj il.
Currently Selected:
Aj Ebrey 2: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.