Aj Galacia 5
5
Ajo tzaqpibꞌl, a tzajnin tuꞌn Kolil Jesús
1Jaꞌlin, o qo tzaqpaj tjaqꞌ tkawbꞌil ojtxe kawbꞌil tuꞌn Crist. Tuꞌntzintzjo, qo weꞌxix wen toj qchwinqil ex toj tzaqpibꞌl o tzaj tqꞌoꞌn qe, ex nya tuꞌn tokx qqꞌoꞌn juntl majl qibꞌ tjaqꞌjo ojtxe kawbꞌil, jaꞌ ntiꞌye tzaqpibꞌl, ex ntiꞌ kolbꞌil qe.
2Kybꞌiꞌntziꞌn a kxel nqꞌmaꞌn kyeꞌy, a ayiꞌn Pabl: Qa ma txi kytziyiꞌn tuꞌn tok qitit jun kyechila tiꞌj kytzꞌumila, nyakuj tuꞌn kykyija toj wen tukꞌa Dios, ikyxjo tzeꞌnku ntqꞌmaꞌn ojtxe kawbꞌil, ntiꞌxla tajbꞌin Crist kyeꞌy tuꞌn kykleta, quꞌn k-okil qe kykꞌuꞌja tiꞌj kybꞌinchbꞌiꞌn tuꞌn kykleta. 3Kxel nqꞌmaꞌn juntl majla: Ankye taj tuꞌn tkubꞌ tnimin ojtxe kawbꞌil, noq tuꞌn tok techil tiꞌj ttzꞌumil, ilxix tiꞌjtz tuꞌn tjapin bꞌaj tuꞌn tkyaqiljo ntqꞌmaꞌn ojtxe kawbꞌil. 4Ex ayiꞌy, a kyaja tuꞌn kykleta noq tuꞌn tjapin bꞌaj ojtxe kawbꞌil kyuꞌn, ma tzꞌel kypaꞌn kyibꞌa tiꞌj Crist ex tiꞌjjo t-xtalbꞌil qMan Dios. 5Me metzin qeꞌ, noq tuꞌn qnimbꞌila, a tzajnin tiꞌj Xewbꞌaj Xjan, qꞌuqle qkꞌuꞌja tuꞌn qoka tzꞌaqle twutz Dios. 6Ex awo, a o qo klet tuꞌn Crist, a Jesús, ntiꞌxla tajbꞌin qa tok qechil ex qa mina. Qalaꞌ axix te at tajbꞌin, tuꞌn qnimin, ex atzin qnimbꞌil ok qo anqꞌil tuꞌn, tuꞌn qkꞌuꞌjlin te qibꞌ qxolx.
7Ayiꞌy werman, tnejil lajoꞌnxixtaq kyuꞌn wen toj kynimbꞌila, tzeꞌnqeku rinil, tuꞌn kykanbꞌinte jun chojbꞌil. ¿Me aꞌltzila xqꞌmante kyeꞌy, tuꞌn tkyij kytzaqpinjiꞌy Tbꞌanil Tqanil, a twutzxix? 8Nya te qMan Dios at tpaj tiꞌjjo luꞌn, quꞌn apente Dios tzaj txkon kyeꞌy, tuꞌn kyoka te Tkꞌwal noq tuꞌn kynimbꞌila. 9At jun yol nqꞌumle kyjaluꞌn: Tukꞌaxpe chꞌin txꞌam, qa ma txiꞌ toj tqꞌotjil wabꞌj, chebꞌe ktxꞌamixil tkyaqilx.#1Co. 5:6. 10Ikytzin n-ele tumil luꞌn tiꞌjjo jun, a nxnaqꞌtzin juntl xnaqꞌtzbꞌil kyeꞌy, a nya twutzx, quꞌn aku bꞌinchin mibꞌin tiꞌj Ttanim Dios tkyaqil. Me qꞌuqle weꞌ nkꞌuꞌj tiꞌj qMan Dios, qa nlay chex lipey tiꞌjjo t-xnaqꞌtzbꞌil. Ex tzul te Dios tqꞌoj tiꞌjjo xnaqꞌtzil ikyjo, ex aꞌlchaqx kyetz. 11Atpe junjun n-el kyyolin, qa nchin xnaqꞌtziꞌn qa ilxix tiꞌj tuꞌn tel qitit chꞌin qtzꞌumil te qechil tuꞌn qklet, ex tuꞌn tkubꞌ qnimin tkyaqil ojtxe kawbꞌil. Ayiꞌy werman, me noqpetzin iky teꞌ, ¿Tiꞌtzintla nchi xoꞌnitz yol wiꞌja? Quꞌn ikypetzin kyxnaqꞌtzbꞌiltzjo. Noqit iky chin xnaqꞌtzinjiꞌy tzeꞌnku kyaj, wenpetzintlatz te kye ikyjo. Quꞌn noqpetziꞌn iky tetzjo, aku qo klet tuꞌn qbꞌinchbꞌin, a tzeꞌnku kyxnaqꞌtzin xjal lo, ex ntiꞌxitla tajbꞌintz jniꞌ sikyꞌx tuꞌn Kolil Jesús, tej tkyim twutz cruz. 12Me ayetziꞌn xjal nchi qꞌmante, qa ilxix tiꞌj tuꞌn tel qitit chꞌin kytzꞌumil te kyechil, bꞌantla kye tuꞌn tel kyqitin kychibꞌjil te jun majx. Tuꞌnpetziꞌn, ojtzqiꞌn kyuꞌn, tuꞌn mi cheꞌx lipey kyiꞌj.
13Ayiꞌy werman, ma chi txoklajtza tuꞌn qMan Dios, tuꞌn kytzaqpaja tjaqꞌ tkyaqiljo lo. Me nya tuꞌn ma chi tzaqpeta, kꞌwel kybꞌinchinjiꞌy tkyaqiljo ntqanin ojtxe kyteꞌn, a tkyaqil achbꞌil. Qalaꞌ il tiꞌj tuꞌn kyajbꞌiꞌn kyxolilixa, ex tuꞌn tok kykꞌuꞌjlin kyibꞌa. 14Quꞌn atzin ntqꞌmaꞌn Tuꞌjil Tyol Dios kyjaluꞌn: Kꞌuꞌjlinqek tukꞌiy tzeꞌnkux ntkꞌuꞌjlin tibꞌa til tibꞌxa.#Lv. 19:18.
15Tuꞌnpetziꞌn, kykaꞌyinktzin kyibꞌa, tuꞌn mi bꞌaj kytxꞌaꞌn kyibꞌa kyxolxa tuꞌn yasbꞌil, ex tuꞌn mi bꞌaj kybꞌinchiꞌn tzeꞌnqeku txuk toj kꞌul noq nkyxbꞌayin kyibꞌ. Quꞌn qa ikyjo, aku chi el xitja kyxolxa te jun majx.
Kabꞌe wiq qchwinqil
16Tuꞌnpetziꞌn, nqꞌmaꞌn tuꞌn kybꞌeta tzeꞌnkuxjo taj Xewbꞌaj Xjan; tuꞌn mi txi kyqꞌoꞌn ambꞌil teꞌ jniꞌ ntqaniꞌn ojtxe kyteꞌn, ex mi ja kynimsin kyibꞌa. 17Quꞌn jniꞌ ntqanin ojtxe kyteꞌn, a nya bꞌaꞌn, tkyꞌeꞌ Xewbꞌaj Xjan tiꞌj; ex a taj Xewbꞌaj Xjan, tkyꞌeꞌ ojtxe kyteꞌn tiꞌj. Tkyꞌeꞌ teꞌ jun tiꞌjjo tajjo juntl, ikyx teꞌ juntl.#Ro. 7:15-23. Me axte Xewbꞌaj Xjan n-onin kyeꞌy tuꞌn tbꞌantjo a taj. 18Quꞌn qa ma chi bꞌeta tzeꞌnku taj Xewbꞌaj Xjan, nya il tiꞌj tuꞌn tjapin bꞌaj ojtxe kawbꞌil kyuꞌn, tuꞌn kykyija toj wen tukꞌa qMan Dios.
19Quꞌn qꞌanchaꞌlqex kyeꞌ xjal nya bꞌaꞌn ntqanin ojtxe kyten tzeꞌnku: Tuꞌn kyjyon juntl kyxuꞌjil tiꞌjbꞌinxi kyxuꞌjilku mo tiꞌjlbꞌinxi kychmilku; ex jniꞌqe kyꞌaꞌjil; ex aye nchi bꞌinchin tkyaqil tzeqbꞌajil, a nya bꞌaꞌn. 20Nchi kꞌulin twutzjo twutzbꞌiyil jun tiꞌ; nchi tyuẍin; nchi yasin kyxolx; nchi ikyꞌin; nchi xkyꞌaqlin kyiꞌj kyukꞌa; jun paqx ntzaj kyqꞌoj kyiꞌj kyukꞌa, noqx nchi ximin kyiꞌjx, expe n-el kypaꞌn kyibꞌ; ex jun paqx nchex lipe tiꞌj jun xnaqꞌtzbꞌil nya bꞌaꞌn. 21Ex noq nloꞌchj kykꞌuꞌj; bꞌyol xjalqe; twiꞌ txꞌujtilqe; ma txi kytolinx kyibꞌ toj tkyaqil achbꞌil; ex nchi bꞌinchin tkyaqil wiq il. Kxel nqꞌmaꞌn kyeꞌy tzeꞌnkuxjo xi nqꞌmaꞌn kyeꞌy ojtxe: Kykyaqiljo iky nbꞌantjo kyuꞌn, ntiꞌx kyoklin tiꞌj Tbꞌanil Tkawbꞌil qMan Dios.
22Me atzin teꞌ ntqꞌoꞌn Xewbꞌaj Xjan kyjaluꞌn: A qkꞌuꞌjbꞌil qibꞌ qxolx, tzaljbꞌil, qmujbꞌil qibꞌ, tqꞌuqbꞌil qkꞌuꞌj tiꞌj Dios, ex qwenil, tkyaqil bꞌaꞌn, tzꞌaqleqoxix tuꞌn tjapin bꞌaj qyol, 23ex tuꞌn qmutxsin qibꞌ, exsin tuꞌn tbꞌant qtzyunte qibꞌ. Mixla aꞌl aku tzaj kawinqe tiꞌjjo ikyjo, quꞌn ntiꞌ jun kawbꞌil tiꞌjxi lo.
24Ayetzin o chi nimin tiꞌj Crist o jaw kyqꞌoꞌn twutz cruz a nbꞌanttaq kyuꞌn ojtxe, tzeꞌnku tkyaqil achbꞌil ex jniꞌ tzeqbꞌajil nya bꞌaꞌn.#Ro. 6:3-14; Gal. 2:20; Col. 2:14. 25Quꞌn qa o tzaj tqꞌoꞌn akꞌaj qchwinqil tuꞌn Xewbꞌaj Xjan, il tiꞌj tuꞌn qbꞌet toj tkyaqil, tzeꞌnkuxjo taj Xewbꞌaj Xjan.
26Tuꞌn ikyjo, mi jaw qnimsin qibꞌ, tuꞌn mi tzaje nya bꞌaꞌn qxol, ex mi loꞌchj qkꞌuꞌj tiꞌj juntl.
Currently Selected:
Aj Galacia 5: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.