Aj Éfeso 5
5
Tzeꞌn tuꞌn qnajane, awo tkꞌwal Dios
1Atzin jaꞌlin, tzꞌok tilil kyuꞌn, tuꞌn kyoka tzeꞌnku te Dios, quꞌn ayiꞌy jun tkꞌwal, a kꞌuꞌjlinxix tuꞌn. 2Kukx chi bꞌetjiꞌy toj tqꞌaqꞌbꞌil kykꞌuꞌja kyukꞌa kykyaqil, tzeꞌnku te Crist, nqo ok tkꞌuꞌjlin, ex xi tqꞌoꞌn tibꞌ te jun chojbꞌil qil, ex te jun oyaj tbꞌanilx ele twutz qMan Dios.#Ex. 29:18.
3Ayetzin kye, a te Diosqiꞌy. Tuꞌntziꞌn, mi chi yoliꞌn kukxjo tiꞌjjo kyꞌaꞌjin, ex jniꞌ nya wen, ex tkyaqilxjo npon kykꞌuꞌjxjal tiꞌj. Quꞌn nya wen tuꞌn qyolin tiꞌj qxolx. 4Ex mi chi yoliꞌn tiꞌjjo yol te txꞌixwejil, exqetziꞌn yol, a ntiꞌ kyajbꞌin, ex jniꞌ yaq. Quꞌn tkyaqiljo lo nya wen te qe, qalaꞌ qo yolin tiꞌj aqꞌbꞌil chjonte te Dios. 5Quꞌn bꞌiꞌn kyuꞌn ankye kꞌwel bꞌinchin te kyꞌaꞌjin, mo qa a jniꞌ nya wen, ntiꞌ toklin tiꞌj Tkawbꞌil Crist ex tiꞌjjo te Dios. Ex ikyqexjo aye, a npon kykꞌuꞌj tiꞌj jun tiꞌ, quꞌn ikyx tzꞌelpineꞌ tzeꞌnku tuꞌn kykꞌulin twutz junxil kydios. 6Mi txi kyqꞌoꞌn kyibꞌa tuꞌn kykubꞌ sbꞌuꞌn tuꞌn kyyolxjal, a nkyxnaqꞌtzin qa wen tuꞌn tkubꞌ qbꞌinchin jniꞌ tzeqbꞌil. Me tuꞌnpetzin tpajjo jniꞌ lo, tzuljo kujxix tkawbꞌil Dios kyibꞌajjo a mibꞌin chi nimin. 7Tuꞌnpetziꞌn, mi tzꞌok kymujbꞌin kyibꞌa kyukꞌa.
8Quꞌn atzin ojtxe, nchi bꞌettaqa toj qxopin; me atzin jaꞌlin, noq tuꞌn kymujbꞌil kyibꞌa tukꞌa qAjaw, nchi bꞌeta tqan qꞌijil. Chi bꞌet-xsintza toj kychwinqila, tzeꞌnqeku nchi bꞌet tqan qꞌijil. 9Quꞌn ikytzin k-yekꞌila kychwinqiljiꞌy tbꞌanilx, ex tzꞌaqle, ex twutzxix. 10Ex tzꞌok tilil kyuꞌn, tuꞌn ttzalaj qMan Dios kyiꞌja. 11Mi kubꞌ kybꞌinchinjiꞌy jniꞌ nya wen, a nkubꞌ kybꞌinchin aye iteꞌ toj qxopin, qalaꞌ kyinqemetza tqan qꞌijil, 12quꞌn manyor txꞌixwejilx tuꞌn qyolin tiꞌj a nkubꞌ kybꞌinchin toj ewajil. 13Me qa ma kubꞌ qchikyꞌbꞌin tqan qꞌijil, kyjel qꞌanchaꞌlix jaꞌ ntzaje. 14Quꞌn toj tspikyꞌemil tqan qꞌij, n-ele tnikyꞌtzajil tkyaqil. Tuꞌnpetziꞌn, ntqꞌmaꞌn kyjaluꞌn:
Qꞌimiltzin twatla, a ay nktan. Ex weꞌksa kyxol kyimnin.
Ex ktzajil tqꞌoꞌn Crist spikyꞌin toj tanmiꞌn.
15Tuꞌnpetziꞌn, kykaꞌyinktzin kyibꞌa tzeꞌn tuꞌn kybꞌetiꞌy, nya tzeꞌnku jun ntiꞌ tnabꞌl, qalaꞌ tukꞌa tkyaqil tumil. 16Kyqꞌonka tilil, a atxku ambꞌil, tuꞌn kybꞌinchiꞌn wen,#Col. 4:5. quꞌn aye tqꞌijil jaꞌlin, nya wenqe. 17Tuꞌnpetziꞌn, mi kubꞌ kybꞌinchinjiꞌy a ntiꞌ tajbꞌin. Tzꞌelxit kynikyꞌa tiꞌj alkye tajbꞌil qAjaw. 18Ex mi txi kyqꞌoꞌn kyibꞌa noqx tuꞌn tnoj kykꞌuꞌja tuꞌn qꞌeꞌn, quꞌn nqox tiꞌn te toj jun qchwinqil, a nlay tzyet. Qalaꞌ kyqꞌoꞌnx kyibꞌa tuꞌn tnoj kyanmiꞌn tuꞌn Xewbꞌaj Xjan. 19Ex chi yoliꞌn kyxoliliy tukꞌa Tyol Dios, ex ilaꞌ bꞌitz te qnimbꞌil. Ex chi bꞌitziꞌn, ex chi nimsiꞌn tbꞌi qAjaw tukꞌa tkyaqil kyanmiꞌn. 20Ex kukx, kyqꞌonxjiꞌy chjonte te Dios, a Manbꞌaj, tiꞌj tkyaqil, noq toj tbꞌi qAjaw Jesucrist.#Col. 3:16-17.
A qchwinqil, awo nimil
21Atzin jaꞌlin, kyniminku kyibꞌa kyxolxa, noq te nimsbꞌil tbꞌi Crist.
22Ayetzin xuꞌjlbꞌaj, kyniminqekutzinjiꞌy kychmila, tzeꞌnku te qAjaw.#Col. 3:18; 1Pe. 3:1. 23Quꞌn ate chmilbꞌaj nejinel te t-xuꞌjil, ikyx tzeꞌnku te Crist, a nejinel te Ttanim, a t-xmilil, ex xi tqꞌoꞌn tibꞌ te klolte. 24Quꞌn ikytziꞌn tzeꞌnku te Ttanim Dios nkubꞌ tnimin Crist, ex ikyqetzin kye xuꞌjlbꞌajjo, tuꞌn tkubꞌ kynimin kychmil toj tkyaqil.
25Exsin ikyx kyejiꞌy chmilbꞌaj, kykꞌuꞌjlimqektzinjiꞌy kyxuꞌjila, tzeꞌnku te Crist s-ok tkꞌuꞌjlin Ttanim, ex xi tqꞌoꞌn tchwinqil tuꞌn tpaj.#Col. 3:19; 1Pe. 3:7. 26Ma bꞌantjo ikyjo, tuꞌntzintla kyok xjan, ex tuꞌn kytxjet kyanmin tuꞌn Tyol Dios, ex tuꞌnjo aꞌ te jawsbꞌil aꞌ, 27tuꞌntzintla tkꞌmoꞌnte Ttanim, tzeꞌnku jun t-xuꞌjil tbꞌanilxix wen, a ntiꞌ chꞌin tkyꞌi, ex ntiꞌ chꞌin tzꞌil tiꞌj, qalaꞌ manyor xjanxix ex tzꞌaqlexix.#2Co. 11:2; Tchi. 21:2, 9. 28Ikytzin tzeꞌn te chmilbꞌaj ntkꞌuꞌjlin t-xmilil, ex ikytzin tuꞌn tok tkꞌuꞌjlin t-xuꞌjil. Quꞌn alkye ma tzꞌok tkꞌuꞌjlin t-xuꞌjil, ax n-ok tkꞌuꞌjlin te tibꞌ. 29Quꞌn mix aꞌl jun, aku tzꞌel ikyꞌin te t-xmilil, qalaꞌ n-ok tkꞌaꞌchin, ex n-ok tkaꞌyin, tzeꞌnku te Crist tiꞌj Ttanim, quꞌn atzin t-xmililjo. 30Ex ikyxjo qe, at qoklin tiꞌjjo Ttanim, a t-xmilil, a junchꞌin. 31Quꞌn ikytzin ntqꞌmaꞌn toj Tuꞌjil Tyol Dios:
Tuꞌntzin tpajjo, kyjel ttzaqpiꞌn ichin ttata ex tnana,
tuꞌn tok meje tukꞌa t-xuꞌjil,
ex kabꞌe kchi okil te junchꞌin xmilil.#Gen. 2:24.
32Ojtzqiꞌn wuꞌn, qa nim t-xilinjo lo, ex nlay tzꞌel qnikyꞌ tiꞌj, me mi nchin yoliꞌn noqx tiꞌjjo mejebꞌlin, qalaꞌ tiꞌjjo Crist tukꞌa Ttanim, a t-xmilil. 33Tuꞌnpetziꞌn, kxel nqꞌmaꞌn juntl majl kyeꞌy, ayiꞌy chmilbꞌaj, qa teyile junjun kye tuꞌn tok kykꞌuꞌjliꞌn kyxuꞌjila tzeꞌnkuxjo ayiꞌy, ex ikyx te qya, tuꞌn tkubꞌ kynimin kychmil.
Currently Selected:
Aj Éfeso 5: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.