Aj Éfeso 2
2
At kolbꞌilqe tuꞌn t-xtalbꞌil qMan Dios
1Quꞌn ojtxe kyimnintaq otoꞌye twutz Dios, noq tuꞌn tpajjo tkyaqil qil ex jniꞌ qachbꞌil, 2a lipcheqoxtaq tiꞌj tzeꞌnkuxjo kyexjal tzaluꞌn twutz txꞌotxꞌ, a nkubꞌ kybꞌinchin tzeꞌnku tajbꞌil tajaw il, a kawil tibꞌaj tkyaqil taqꞌnil tzaluꞌn twutz txꞌotxꞌ. Ex ayetziꞌn taqꞌnil lo nchi aqꞌnin toj kyanminxjal, a mi nkubꞌ kybꞌinchin tajbꞌil qMan Dios. 3Ikytaqtzin tumiljo nqo bꞌettaq qkyaqilx ojtxe, lipcheqoxtaq tzeꞌnkuxtaq tajjo qtzeq, ex njapintaqjo qxim, a nya wen, a tzeꞌnkuxjo ntqanintaq tachbꞌil qxmilil. Tuꞌntzin tpajjo jniꞌ luꞌn, toj qilxtaqqe, tuꞌn qkyij tjaqꞌ kujxix tkawbꞌil Dios te jun majx, tzeꞌnqeku txqantl.
4Me ante Dios, noq tuꞌn nimxix tqꞌaqꞌbꞌil tkꞌuꞌj qiꞌj, ma qo tkꞌuꞌjle nimxix, 5ex ma tzaj tqꞌoꞌn qchwinqil junx tukꞌa Crist, exla qa kyimninqotaq twutz Dios tuꞌn tpaj qil. Me noq tuꞌn t-xtalbꞌil Dios, ma qo klete.#Col. 2:13. 6Ex ma qo jaw anqꞌin tuꞌn, junx tukꞌa Crist, a Jesús, ex ma qo kubꞌ tqꞌuqbꞌin junx tukꞌa toj tanmin kyaꞌj. 7Kubꞌ tbꞌinchin ikyjo, noq tuꞌn ttzaj tyekꞌin kyexjal kyojjo tqꞌijil tzul, at nimxix t-xtalbꞌil qiꞌj, a nyekꞌin tuꞌn twenil qukꞌa, noq tuꞌn Crist, a Jesús. 8Quꞌn noq tuꞌn t-xtalbꞌil Dios, ma qo klete, tuꞌn qnimbꞌil tiꞌj, ex nya tuꞌn qbꞌinchbꞌin. Quꞌn nya awox xqo jyonte, qalaꞌ a Dios saj qꞌonte qe. 9Ntiꞌ tumil tuꞌn tjaw qnimsin qibꞌ, quꞌn nya kyuꞌnjo qbꞌinchbꞌin xknete kolbꞌilqe. 10Qalaꞌ ate Dios saj qꞌonte akꞌaj qchwinqil. Ex ma qo anqꞌin tuꞌn Crist, a Jesús, tuꞌn tkubꞌ qbꞌinchin bꞌaꞌn, a tzeꞌnkuxjo xkubꞌ t-ximin Dios te tnejil.
At qmujbꞌil qibꞌ noq tuꞌn Crist
11Ex mi tzꞌel naj toj kykꞌuꞌja, a ojtxe, toj kywutz aj Judiy, ntiꞌtaq kyajbꞌiꞌn, quꞌn nyataq tok kyechila tzeꞌnku kye. Me te weꞌy, ajo kyechil noq jun tiꞌ tiꞌj tchibꞌjil kyxmilil, bꞌinchin kyuꞌnxjal, ex ntiꞌ tajbꞌin twutz qMan. 12Quꞌn kyojjo qꞌij ojtxe, ntiꞌtaq Crist bꞌiꞌn kyuꞌn, ex nimxtaq nchi qꞌojiꞌn kyukꞌa aj Judiy, a skꞌoꞌnqe tuꞌn Dios, ex ntiꞌtaq tumil tuꞌn kykyija toj wen tukꞌa Dios. Ntiꞌtaq Dios toj kyanmiꞌn tuꞌn nya nimilqetaqa, ex ntiꞌtaq jun qꞌuqbꞌil kykꞌuꞌja tiꞌj jun akꞌaj kychwinqila, aj kykyima. 13Me atzin jaꞌlin, noq tuꞌn kymujbꞌil kyibꞌa tukꞌa Crist, a Jesús, a ayiꞌy, a najchaq iteꞌtaqa tukꞌa Dios ojtxe, ma chi oka jaꞌlin te Ttanim, noq tuꞌn tchkyꞌel Crist. 14Quꞌn ate Crist ma tzꞌok te qmujbꞌil qibꞌ,#Jn. 14:27. quꞌn ma qo ok tmujbꞌin te junchꞌin Ttanim, exla qa Judiy, tzeꞌnku weꞌ, exla qa nya Judiy, tzeꞌnku kyeꞌ. Quꞌn ma kubꞌ tyuchꞌin qꞌoj, a attaq tzeꞌnku jun nim maqbꞌil qxol. 15Ex noq tuꞌnjo tkyimlin Crist, ma tzꞌel tipin kawbꞌil tukꞌa tkyaqil nukꞌbꞌil ex jniꞌ jikysbꞌil qchwinqil, a noq tuꞌn kykyijxjal toj wen tukꞌa Dios. Ex atzin jaꞌlin, ma chi ok tmujbꞌin kabꞌe tnam, ayeꞌ aj Judiy junx kyukꞌa nya Judiy, tuꞌn kyok akꞌaj junx tukꞌa, tuꞌntzin at qmujbꞌil qibꞌ qkyaqilx.#Col. 2:14. 16Ikytzin tumiljo, noq tuꞌn tkyimlin Crist twutz cruz, ma kubꞌe tiꞌjjo qꞌoj, a attaq kyxoljo kabꞌe tnam, ex ma chi kyij toj wen tukꞌa Dios, ex ma chi ok qꞌoꞌn te junchꞌin Ttanim.#Col. 1:20. 17Quꞌn ma tzul Crist qꞌmalte tqaniljo Tbꞌanil Tqanil kolbꞌil te kykyaqilxjal, exla qa ayiꞌy, a najchaqtaq iteꞌy tkꞌatz Dios, exla qa aye Judiy, aye nqayintaq iteꞌ.#Is. 57:19. 18Ex noq tuꞌn Crist, ma jqet jun akꞌaj tumil, tuꞌn qkyij qkyaqilx toj wen tukꞌa Manbꞌaj, noq tuꞌn Xewbꞌaj Xjan.
19Tuꞌnpetziꞌn, ma chi oka te Ttanim Dios, ex nya bꞌetin xjalqiꞌy jaꞌlin, toj jun tnam, a nya kyeꞌy. Qalaꞌ at kyokliꞌn tzeꞌnqeku txqantl, a aye etzinqe tuꞌn Dios, ex ma chi oka tajlal Ttanim. 20Quꞌn ma qo ok qkyaqilx nimil te jun ma tij ja, ex ma qo kubꞌ qꞌuqbꞌin tibꞌajjo tqꞌuqil, a kyxnaqꞌtzbꞌil tsanjil Jesús, exqetziꞌn jniꞌ yolil Tyol Dios, aye i kꞌmonte Tyol ojtxe. Ex aku Jesucristjo, tnejil abꞌj te tqꞌuqil, a nimxix toklin.#Is. 28:16; Mt. 21:42. 21Noq tuꞌn Crist, ajo ma tij ja kyja tjaw chꞌiy toj ttxolil, tuꞌn tok te jun ja te naꞌbꞌl Dios, a xjanxix tiꞌj qAjaw. 22Ex ikyqex kyejiꞌy, ayiꞌy nimil toj tnam Éfeso, junx ma chi jawe chꞌiya, tuꞌn kyoka te jun ja, jaꞌ najle Dios tuꞌn Xewbꞌaj Xjan.#1Co. 3:16-17.
Currently Selected:
Aj Éfeso 2: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.