Kybꞌinchbꞌin 28
28
Tej tklet Pabl exsin txqantl tukꞌa toj txꞌotxꞌ Malta
1Noq kloꞌnqotaqla qkyaqilxa, tej qbꞌintiꞌy qa Maltataq tbꞌi chꞌin txꞌotxꞌ, a tkuꞌxtaq toj aꞌ. 2Toj tbꞌanil oke kaꞌyiniꞌy qkyaqilxa kyuꞌn xjal najleqetaq antza, ex tuꞌn tzuntaq nkubꞌ jbꞌal, ex nimku cheꞌw, bꞌeꞌx kubꞌ kykchoꞌn qꞌaqꞌ, exsin o xi txkoꞌntza kykꞌatz. 3Atzin te Pabl otaq bꞌaj tchmoꞌn chꞌin tzqij si; ex tzuntaq okx tqꞌoꞌn toj qꞌaqꞌ, tej tetz lipin jun kan tuꞌn t-xobꞌil te qꞌaqꞌ, ex bꞌeꞌx ok bꞌaltzꞌaj, ex ok ttxꞌaꞌn tqꞌobꞌ Pabl.
4Aye xjal najleqetaq antza, tej kylonte kan bꞌaltzꞌink tibꞌ tiꞌj tqꞌobꞌ Pabl, jaw yolin kyxolx. Chi chiꞌ kyjaluꞌn: Bꞌalaqa bꞌyol xjal te ichin lo. Mapetzin klet toj ttxuyil aꞌ, me a kawil toj kyaꞌj, nlay ttziye tuꞌn tanqꞌintl.
5Me atzin te Pabl, bꞌeꞌx el tchtoꞌn tiꞌj tqꞌobꞌ. Tuꞌn ikyjo, bꞌeꞌx kux tzꞌaq tej kan toj qꞌaqꞌ, ex ntiꞌ te Pabl bꞌajte. 6Kykyaqilx nchi ayontaq jniꞌ or kxel mal Pabl, tuꞌn ttxꞌaꞌbꞌin kan, mo jniꞌ ortaq tuꞌn tkyim. Nimku kubꞌ kyayoꞌn, me atzaj teꞌ tel kynikyꞌ te, qa ntiꞌ otaq bꞌajte, bꞌeꞌxsin ja kymeltzꞌin kynabꞌltz, exsin ok tentz qꞌmalte qa jun diostaq te Pabl.
7Iteꞌtaqtzin txqantl tnej txꞌotxꞌ nqayintaq iteꞌye tkꞌatzjo najbꞌil antza, a etzintaq tuꞌn jun ichin, Publio tbꞌi, nimxixtaq toklin tojjo tkyaqil txꞌotxꞌ te Malta. Toj tbꞌanil iwliꞌy tuꞌn, ex toj tbꞌanil mojin qukꞌiy toj oxe qꞌij.
8Me atziꞌn ttata Publio, yabꞌtaq teꞌ tuꞌn kyaq ex tuꞌn chkꞌoj, ex tkuꞌxtaq toj ttxoꞌw. Bꞌeꞌxsin xiꞌ Pabl qꞌolbꞌilte. Atzin teꞌ tbꞌaj naꞌn Dios tiꞌj, i kubꞌ tqꞌoꞌn tqꞌobꞌ tibꞌaj, ex bꞌeꞌx qꞌanit tuꞌn. 9Tuꞌn ikyjo, bꞌeꞌx i bꞌijte kyuꞌn txqantl yabꞌ, a iteꞌtaq tojjo txꞌotxꞌ antza, ex i tzaj kyej yabꞌ anetziꞌn, ex ikyxjo, bꞌeꞌx i qꞌanit.
10Nimku bꞌant kyuꞌn te kaꞌybꞌil qeꞌy. Atzin teꞌ qokxa jun majla toj juntl bark, nimku tzaj qꞌoꞌn qeꞌy, a ilxix tiꞌj, tuꞌn tokin quꞌn toj bꞌe.
Tej tkanin Pabl toj tnam Rom
11Tbꞌajlinxiꞌ oxe xjaw quꞌn tojjo Malta, o okxa tojjo juntl bark tzajnintaq toj Alejandría, ex antza taꞌyetaq toj Malta, tej tkubꞌ ten jbꞌalil. Atzin bark anetziꞌn, iteꞌktaqjo kabꞌe kywutzbꞌiyil dios tiꞌj, Cástor ex Pólux kybꞌi.
12O xiꞌy toj, ex o kaniꞌn toj tnam Siracusa. Oxe qꞌij o kyija antza. 13Ex antza, o exiꞌy, nqayin toj mlaj, tuꞌn qkaniꞌn tzmax toj tnam Regio. Toj junxil qꞌij, kyjaꞌ tzaje kyqꞌiqꞌ kubꞌl qumila. Tuꞌntziꞌn, toj junxil qꞌij o kaniꞌn tzma Puteoli, 14jaꞌ ele qkꞌulbꞌiꞌn qibꞌa kyukꞌa ilaꞌ nimil, a xi txkoꞌn qeꞌy, tuꞌn qkyija wuq qꞌij kyukꞌa. Ikytziꞌn, o kaninjiꞌy tzmax Rom. 15Otaq kybꞌi kye nimil te Rom tqanil, qa tuꞌntaq qkaniꞌn. Tuꞌnpetziꞌn, i tzaj kꞌlel qeꞌy toj bꞌe tzmax kyojjo kabꞌe tnam, Foro de Apio ex Tres Tabernas kybꞌi. Atzaj teꞌ kyiwle quꞌn, bꞌeꞌx xi tqꞌoꞌn Pabl chjonte te qMan Dios, ex bꞌeꞌx ja tiꞌn tibꞌ.
16Atzaj teꞌ qkaniꞌn tzma Rom, i xi tqꞌoꞌn Julio, a tnejil xoꞌl qꞌaqꞌ, tkyaqil aj tze toj tqꞌobꞌ juntl xoꞌl qꞌaqꞌ. Ante Pabl tzaj qꞌoꞌn ambꞌil teꞌ, tuꞌn tten tjunalx, ex junchꞌin xoꞌl qꞌaqꞌ kyij te kaꞌyilte.
Tej tyolin Pabl kyukꞌa t-xjalil toj Rom
17Otaqxi bꞌaj oxe qꞌij qkanliꞌn, tej t-xi tchqꞌoꞌn Pabl txkol kye kynejil Judiy te Rom. Atzaj teꞌ kychmet, xi tqꞌmaꞌn Pabl kye kyjaluꞌn: Ayiꞌy nxjalil, ntiꞌ weꞌ nbꞌinchbꞌin nya bꞌaꞌn kyiꞌj aj Judiy ex tiꞌjjo tzeꞌn ẍi anqꞌine ojtxe qxjalila. Me ma chinx qꞌoꞌn toj kyqꞌobꞌ xjal te Rom tzma Jerusalén. 18Atzaj teꞌ xbꞌaj qanin weꞌy, mataq chinx tzaqpiꞌn, quꞌn tuꞌn mi xjyet tumil kyuꞌn, tuꞌn nkubꞌ kawiꞌn te kyimin. 19Me mina xkytziye Judiy. Tuꞌnpetziꞌn, xi nqanintza, tuꞌn woka toj paꞌbꞌin twutzjo tnejilxix nmaq kawil tzaluꞌn toj Rom.#Kybꞌi. 25:11. Me ntiꞌ chꞌin weꞌ aku chin ja yolbꞌin, ex ntiꞌ nyola te patil kye xjal te ntanima. 20Tuꞌnpetziꞌn, ma chi tzaj ntxkoꞌn, tuꞌn kyok nkaꞌyiꞌn, ex tuꞌn nyoliꞌn kyukꞌiy, quꞌn awo aj Judiyqo at junqe qqꞌuqbꞌil qkꞌuꞌj tuꞌn tten tkawbꞌil qMan Dios qxol, ex tuꞌn qjaw anqꞌin juntl majl kyxol kyimnin, aj qkyim. Ex noq tuꞌn tpajjo ikyjo, loqiꞌn kꞌloꞌnqin tuꞌn kxbꞌil.
21Tzajtzin kyqꞌmaꞌn kyej Judiy kyjaluꞌn: Ntiꞌ jun qeꞌ uꞌj o tzaj qtzyuꞌn tzajnin toj txꞌotxꞌ te Judey, a tzunt yolin tiꞌja. Ex ntiꞌ jun qxjalil a kyxoljo najleqe antza, a mat tzul tzaluꞌn, a nyat bꞌaꞌn tyol tiꞌja. 22Me qajtzintza tuꞌn qbꞌintiꞌy tzeꞌn te tnaꞌbꞌl, quꞌn bꞌiꞌn qeꞌ quꞌn, qa nyolbꞌajtz toj tkyaqil twutz txꞌotxꞌ tiꞌjjo akꞌaj chꞌuq xjal, aye nimilqe tiꞌj Jesús.
23Tuꞌntziꞌn ikyjo, ok kyjyoꞌn jun qꞌij, jaꞌ i chmete txqan xjal, jaꞌ najletaq Pabl. Tojjo qꞌij anetziꞌn, yolin Pabl tiꞌj Tkawbꞌil qMan Dios. Xi xkye qlixje wen, ex tzmaxi te qqoqix, ok tilil tuꞌn Pabl, tuꞌn tkubꞌ kykꞌuꞌj, qa twutzxixjo Tyol Dios tzꞌibꞌin kyuꞌn yolil Tyol. 24Iteꞌ junjun i xi niminte a ntqꞌmaꞌntaq Pabl, me iteꞌ txqantl mix xi kynimine. 25Tbꞌajlinxiꞌ yolin Pabl, bꞌeꞌx el kypaꞌn kyibꞌ, quꞌn tuꞌn mix jaꞌtaq nchi kyija toj wen kyxolilex. Xitzin tqꞌmaꞌn Pabl kye kyjaluꞌn: Wen teꞌ a bꞌaj tyolin Xewbꞌaj Xjan kyeꞌ ojtxe qxjalil, tej tkyij tzꞌibꞌin tuꞌn Isaías, a yolil Tyol Dios, a chiꞌ kyjaluꞌn: 26Kux txiꞌy, ex qꞌmaꞌnxa teꞌ tnam lo:
Mixla tuꞌn chi bꞌiꞌn tiꞌj, nlayx tzꞌel kynikyꞌ te.
Ex mixla tuꞌn tzꞌok kykaꞌyin, nlayx kylonte.
27Quꞌn ajo tnaꞌbꞌljo tnam lo, ma tzꞌel najx.
Jpunqek kyẍkyin, ex maqsiꞌnqek kywutz,
tuꞌntzin mi kylonte,
ex tuꞌntzin mi kybꞌiye,
ex tuꞌn mina tzꞌel kynikyꞌ,
ex tuꞌn mina chi tzaj meltzꞌaj wukꞌiy.
Tuꞌn ikyjo, nlay chi kubꞌ nqꞌaniꞌn.#Is. 6:9-10.
28Bꞌiꞌnkuxix kyuꞌn, chi Pabl, qa ajo kolbꞌil tuꞌn qMan Dios, qꞌoꞌntz jaꞌlin kye nya Judiy, ex ayepenkye ok chi kꞌwel bꞌiꞌn teꞌ Tbꞌanil Tqanil.
29Tej tbꞌaj tqꞌmaꞌn Pabl ikyjo, bꞌeꞌx i aj kyej Judiy, ex nimxix i chꞌotj kyxolx.#28:29Nya toj tkyaqil Tuꞌjil Tyol qMan jaꞌ taꞌye v. 29.
30Atzin te Pabl, kabꞌe abꞌqꞌe kyij teꞌ tojjo ja, a otaq manit tuꞌn. Antza nchi kanine kykyaqiltaqjo qꞌolbꞌilte. 31Tukꞌa tkyaqil tzaqpibꞌl, nqꞌumlajtaq tiꞌjjo tkawbꞌil qMan Dios, ex nxnaqꞌtzintaq tiꞌjjo qAjaw Jesucrist, ex mix aꞌlxtaq jun nxi miyonte.
Currently Selected:
Kybꞌinchbꞌin 28: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.