1 Timotey 6
6
Jun tumil kye aqꞌnil
1Tkyaqiljo nimil, ayeꞌ ma chi ok te aqꞌnil te jun majx, il tiꞌj tuꞌn tkubꞌ kynimin tajaw aqꞌuntl toj tkyaqil, tuꞌntzintla mi chi yolbꞌinxjal tiꞌj tbꞌi qMan Dios ex tiꞌjjo qxnaqꞌtzbꞌil. 2Ex qa at jun tajaw aqꞌuntl nimil, mi kubꞌ kybꞌisin aqꞌnil qa noq tuꞌn kyerman kyibꞌ mi chi kubꞌ kynimin, qalaꞌ noqpe kyja chi kyniminku wen, ex chi ajbꞌinxix kye, quꞌn nchi ajbꞌin kyex nimil, ayeꞌ kꞌuꞌjlinqexix kyuꞌn. Atzin luꞌn, Timotey, xnaqꞌtzinxa, ex qꞌonxa tumil kye.
A qꞌinimil twutzxix
3Qa at jun xjal nxnaqꞌtzin jun tumil nya twutzx, qa mikyxiꞌ tzeꞌnku tbꞌanil xnaqꞌtzbꞌil tuꞌn qAjaw Jesucrist, ex qa mikyxiꞌ tzeꞌnku ntyekꞌin qnimbꞌil; 4jun xjal ikyjo jun nimil tibꞌ ex ntiꞌx chꞌin n-el tnikyꞌ te. Oꞌkx tajjo tuꞌn tyasin ex tuꞌn tyolbꞌin, ex atziꞌn anetziꞌn ikytzin tzeꞌnku jun yabꞌil, ma tzꞌok lemtzꞌaj tiꞌj. Quꞌn antza ntzaje loꞌchj kꞌuꞌjbꞌaj, jniꞌ jyoj qꞌoj, ex tkyaqil ikyꞌbꞌil ex yasbꞌil, 5ex tkyaqil bꞌujin, a mi nbꞌajx kyxolxjal, ayeꞌ xjal ma tzeꞌl naj kynabꞌl; mi n-el kynikyꞌ te yol twutzx. Toj kywutz a qnimbꞌil n-ajbꞌin noq tuꞌn kyqꞌinimix. 6Twutzx teꞌ qa at jun qꞌinimil tuꞌnjo qnimbꞌil, a tuꞌn qtzalaj tiꞌjjo chꞌin, a at qe. 7Quꞌn ntiꞌx chꞌinqe qꞌiꞌn quꞌn, teꞌ xqo ul itzꞌje twutz txꞌotxꞌ, ex ntiꞌx chꞌin k-ajil qiꞌn, aj qkyim.#Job 1:21; Sal. 49:17; Ec. 5:15. 8Me noq qa at telix qqꞌij, ex qa at qxbꞌalin, qo tzalaj tukꞌa ikyjo. 9Me ayetzin kyeꞌ kyaj tuꞌn kyqꞌinimix tzaluꞌn twutz txꞌotxꞌ. Aj ttzaj jun tiꞌ kyiꞌj, bꞌeꞌx nchi kubꞌ tzꞌaq toj il, ex bꞌeꞌx nkubꞌ kysbꞌuꞌn kyibꞌ tuꞌn kyajbꞌil, a nya tumil, ex ax n-ok meltzꞌajjo qꞌol mibꞌin kyiꞌj, tuꞌn kyxi toljx toj najin te jun majx. 10Quꞌn qa ma tzꞌok qxoꞌn qkꞌuꞌj tiꞌj pwaq, nya bꞌaꞌn, quꞌn antza ntzaj anqꞌin tkyaqiljo wiq nya bꞌaꞌn.#Eb. 13:5. Quꞌn at junjun ma txi lipe kyanmin tiꞌj pwaq, ex noq tuꞌn tpajjo ikyjo, ma chi el txalpaj toj kynimbꞌil, ex ayex ma chi ok qꞌonte kyixkꞌoj kyiꞌjx.
A tbꞌanil aqꞌuntl toj qnimbꞌil
11Me atzin te, ma tzꞌoka jun ichin te Dios. Tuꞌnpetziꞌn, tzaqpinkjiy tkyaqil anetziꞌn, ex weꞌkuxixa jikyin toj tchwinqila, toj tbꞌinchbꞌiꞌn bꞌaꞌn, toj tnimbꞌila, toj tqꞌaqꞌbꞌil tkꞌuꞌja, ex kukx tuꞌn tayoꞌn tajbꞌil qMan toj tkyaqil, ex mutxinku tten. 12Tzꞌok tilil tuꞌn, tuꞌn tjapin bꞌajjo taqꞌin qMan Dios toj tnimbꞌila. Ex kukxit tzaj tnaꞌnjiy tkabꞌ tchwinqila, quꞌn tuꞌnpetziꞌn o txokliꞌy tuꞌn Dios tiꞌj, tej tqꞌmaꞌy, ex tej tkubꞌ tyekꞌin tnimibꞌila kywutz nimku xjal. 13Kxel woqxeninxixa jaꞌlin twutz qMan Dios, a tzaj qꞌol chwinqil te tkyaqil, ex twutz Klolqe Jesucrist, a tqꞌma te jun yekꞌbꞌil twutz Poncio Pilat qa twutzxixjo Tyol:#Jn. 18:37. 14Niminkujiy a nxi nqꞌmaꞌn teꞌy, tuꞌn tkubꞌ tbꞌinchiꞌn, ex mi jaw ttxꞌixpiꞌn, tuꞌntzintla ntiꞌx jun tiꞌ tuꞌn t-xi kawita tiꞌj. Bꞌinchima ikyjo, tzmaxiꞌ ajxi tul juntl majl qAjaw Jesucrist. 15Kjapin bꞌaj tkyaqiljo lo tuꞌn Dios tojxix tqꞌijil, quꞌn oꞌkx te Diosjo junchꞌin at; kyꞌiwlinxix tbꞌi, ex nim toklin te Kawil, quꞌn a Kawil tibꞌaj tkyaqil kawil, ex a tAjaw Tkyaqil tibꞌaj tkyaqil tajaw. 16Quꞌn oꞌkx Diosjo nlay bꞌaj, ex najle toj tkyaqil tqoptzꞌajiyil, a mix aꞌlx aku tzꞌoksin tkꞌatz. Mix aꞌl jun o lonte, ex mix aꞌl jun aku kaꞌyinte. Oꞌkx te Dios at tkyaqil toklin ex jniꞌ tipin jaꞌlin ex te jun majx. Ikyxitjo.
17Ayetziꞌn at kyqꞌinimil twutzjo txꞌotxꞌ tzaluꞌn, qꞌmanxa kye tuꞌn mi ja kynimin kyibꞌ, ex tuꞌn mi tzꞌoke qe kykꞌuꞌj tiꞌjjo kyqꞌinimil, quꞌn nya kukx teꞌ tten. Qalaꞌ oꞌkx tuꞌn tok qe kykꞌuꞌj tiꞌj Dios, a nimxix ntzaj tqꞌoꞌn qe, tuꞌn qtzalaj tiꞌj. 18Ex qꞌmaꞌnxa kye tuꞌn tkubꞌ kybꞌinchiꞌn wen, ex tuꞌn kyok te soꞌj. 19Quꞌn tukꞌaꞌ ikyjo, kxel kyxikybꞌin jun qꞌinimil te jun majx toj kyaꞌj, ex jun chwinqil, a mixla jtojx tuꞌn tbꞌaj.
20Timotey, qꞌonka tililjo a ma kyij oqxenit teꞌy. Ex mi txi tbꞌinjiy kyyolxjal, a ntiꞌ tajbꞌin, exsin jniꞌ nkyqꞌmaꞌnxjal, a nyakuj manyor tumil. 21Quꞌn iteꞌ junjun nchi yolin ikyjo, me ayeꞌ o chi el txalpaj tiꞌj kynimbꞌil.
Noq a Dios tzaj qꞌoꞌnte t-xtalbꞌil tibꞌaja.
Currently Selected:
1 Timotey 6: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.