Romanone 15
15
Gichkolune ga wa gigrokachine
1Giyagni gichkolunwu wumkata gipxakletna rugrokinriyna wa mumkatkane. Gi wumkata gimutletnawa. 2Satkakwu wixa gimutanru wumwastsitanru kigleruya tseruwakanshinikanutkalurupa. 3Gi rixanu Kristo gi wa rumutnawa. Seyni wane china yongatyawaka:
“Yangalna tokanu pyangajene gapyegitno.”
4Gi rixanu wixa chinanu yonatkaluru muchikawa yonatkalurpirankaka wyimakikolupa kashnantakgogneruya, giykolewluya yonchi giyakatyachri waneywu wixinripa wkagwaklepa.
5Ga wa Goyakalu kashnantakgogneru, ruykolewle waneyalutu, genekangi panshinikanurungi gixinripa Kristo Gesoya. 6Panshinikanurungi patokanurunepgi gimalwutyaplu Goyakalu Ruru Wutsrukate wixanu Geso Kristo.
Wale chinanupa waneyapna kagwaklewlena payineko
7Giyagni Kristo yoptotingi pixkapotuko, gixa yoptokakletanu, rumalwutikolupa Goyakalu. 8Gi rixanu wane nchina, kamrurewakleru rixka Kristo Geso sajruka gistaklewluya, tokanchi galikakpotunanu Goyakalupirana chinanu, poyegityaplu gitsrukaachinni gipiratikaluru. 9Payineko gimalwutyaplu Goyakalu retwamonrewle chinanu. Chinyongatyawaka:
Giyagni nupgujtatanyi
payinyegiyako.
Nshikaletgiwakatanyi.
10Wane chinatnaka:
Gimuwatanu, payinekgi, gineruneyma.
11Rumepetatnaka:
Gimalwutanru Gitsrukaachi
pejnuruneko payinekgi.
Galixkotanru, payinemnunanuka.
12Gisayiya gimepetatnaka:
Waneplu Gesetski, payine Gitsrukate
yotunomtachripa.
Wale chinanupa waneyapna kagwaklewlena payineko.
13Wa kagwaklewlu Goyakalute genekpotutangi pejnuruko gimuwlu giglenshinikanrewlu galixinri. Tsru potu kagwaklewlu waneyapgi Giwekikaluru Kpashiri giyaklewleya.
Pawlo Goyakalu kamrurewyegitachri payine chinanu
14Naponshinikanyegitgi, nomolene gitanune, wa gixa koxa kshinikanurunpotgi, psolpotukopirana gimatachinepgi, gimkata giykokakletinripa gixkakluko. 15Psoji mkagwakpiratkatno nyonyegitgi, nomolene, wane nixa gishinkapkakletgi, gimutlewlu chinanu nenekikolu Goyakaluya. 16Kristo Geso kamrurewyegitachripno payineyegiyako chinanu, Kiglerpotunanu Tokanchi Goyakalunu nkamruretinri. Payineko genekashatikolu gigleretkaluru rixinripa, kpashiri rixkaklewatinripa Giwekikaluru Kpashiriya.
17Giyagni waneyno nalixkotpiranatyalu Kristo Gesoya Goyakalupirana. 18Gi rixanu nkagwakpiratmaka yanumsayegletlu pagixanu pirana wa Kristo gi kamruta gitaya yijnakotinripna payineko tokanuyna, kamrureyna, ruyaklewleyma giglajrukakaya, getkalurkakaya, ruyaklewle Giwekikaluru Goyakalunu. 19Wane rixa wa Gerosale ga wa psolsajrukleko Giririkpotunanuko nunkakletananumtlu psolchijneko Kiglerpotunanu Tokanchi Kristopirana. 20Wane nixa muchkotletnawa nunkakletyaplu Kiglerpotunanu Tokanchi, ma koschekgiwakatikowakaya Kristo, gi wa satuna galpokotyawaka nkamrupjitinripa. 21Seyni chinyongatyawaka:
Munkaklewyegitkonewa retanna.
Mjemkanewa rumata jemanruna.
Pawlo ginkakletlu wa Roma rushinikinri
22Giyagni gixo kata numaletka gixa yegi nyinripa.
23Ga wa xani gike nixatka tyesretkaka. Gixo walapu nalukpotutmaklu nyayegityagi. 24Giyagni Gispanya nyinpatka, nyayegitangi. Gi rixanu nkagwaka getlemtgi nuknogamtinipa, ganikyapno waneya, nali getlemtinpatkagi. 25Ga wa xani Gerosale nyanutka nupxakyapna kpashirine. 26Gi rixanu Masetonya gajene, Gakayi gajene kigle getle rixluna genekashlu gitaklu kwamonurune kpashirine chinanu wa Gerosale gwachine. 27Gi rixanu kigle getle rixluna nyi payineko. Ga wa galikaka rumkata gipekooyegletna Gerosale gajene, rapikonna chinanu kiglerkaka wannanu Giwekikaluruya. Payineko gimkata gipxaklekoxna gimaneyna. 28Giyagni nnikatinpatkalu wa tye ga wa npoyegitinpatkalu tye kamrurchi, Gispanya nyinpatka, netamtangi xako. 29Numatlu wa napyegitinipgi, Kristo giglenshinikanyegle potu numapokanu.
Pawlo gagjitna Roma gajene Kristonune ragjigognetinripna
30Nkegemgayegitgi, nomolene, Wutsrukate Geso Kristoya, ga wa galuklewlu Giwekikaluruya, gipxakanno. Goyakalu gagjiyegitanno, 31nushpakinripa malixkane Goteya gwachinyegiya; wa genekashlu kpashirine chinanu Gerosale gwachine, walenwa nkamruyegitanru, yoptotikolupa. 32Gimuwatachripno napokyegitinipgi wa Goyakalu galukyawaka, gixaymananuko napnanutinripa. 33Pejnurunekgi gixaymaplu giglenshinikanrewlu Goyakalute. Wane gixkalurupa.
Currently Selected:
Romanone 15: pib
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.