Gipgujetkaluru 5
5
Kiruka payokgipre gipre kgimaxikolero gishyatikaluro
1Ga wa tuplapije tuplatachri potuklemyo netyalo kirukpoyi, gitoko yonatikaluro ga wa totji yonatikaluro. Ga wa payokgipre gipre kgimaxikolero gishyatkaluro. 2Ga wa netlu Goyakalutowreru gichkolu gichkoplaji wane china sapletachri,
“¿Katni wa gimuknu kopralatyaplo kirukpoyi, ga wa kotpuka gipretyaplo?” 3Ga wa gike gimkatlu, gi wa tengogne gajeruko, gi wa chiji gajeruko, gi wa chiji gitokote gajeruko. Gike gimkata kopraaletlo kirukpoyi. Gi koxa rumkata getletlona. 4Ga wa nchiyampotuta, gi rixanu gike gikshiika rumuknu kopralatyaplo kirukpoyi ga wa retyaplo. 5Ga wa satu wa tsru wane chinno, “Gi pchiyagatanu. Petanu. Rakagloklewata tsru mgenoklu Gotaklopishaneru, Tawitski. Wale gakagloklewata kotpukyaplo kiruka ga wa payokgipre tupre kgimaxikoleroymananuko.”
Gowega Wgene gakagloklewatinri
6Ga wa tuplapije ganikajiteswaji, ga wa gepkoxamkoje giwekachine ganikajite ga wa tsrune ganikajite, netyalu gowega Wgenni tunwanatachri giylatkaluru pixka, payokgipregwalutu, ga wa payokgipreygalerutu. Payokgipreygalenwa payokgipre giwekikalurune Goyakalunu psolchijneko yokanatkalune. 7Gowega Wgene wane ya. Wa tuplapije tuplatachri potuklemyo yoptotyalo kirukapoyi. 8Giyagni kiruka yoptotinitka, wa gepkoxamkoje giwekachine, ga wa gepimole gepkoxamkoje tsrune chiji rapokna gowega Wgene getanu. Satkaka waneya gitlotsatkaluro, ga wa koripro katseplu pgamlupagiri. Walenwa kpashirine gagjigognerkaka. 9Ga wa shikaletluna gerotu shikalchi. Wane chinna:
Pumuknuni kiruka pyoptotinri
ga wa pkotpukyaplu tupre kgimaxikolero.
Gi rixanu giylatkaluryi ga wa pugragaya
pupekotanna yine Goyakalu chinanu,
panerumnunanukaya, ga wa
patokanumnunanuka yanumatyachineyegiya,
ga wa payinerumnunanukaya,
ga wa pachijne gajenemnunanukaya.
10Ga wa Goyakalu getanu
pogirchine ga wa sasertotene pixkakna.
Ga wa chiji pogirewatinna.
11Giyagni netatka. Ga wa gixolune Goyakalutowreruneplaji njema, tuplapije sajrukachine, ga wa giwekachine ga wa tsrune. Ga wa wane pejnuna gixolune potu ga wa gixo waragka waragkane, 12gichkoplaji wane chinachine:
Rumuknuni gowega Wgene giylatkaluru
yoptotyaplu giyaklu ga wa ponikowlu,
ga wa gimatkalchi, ga wa muchkonchi,
ga wa kagwakpiiru, ga wa gimalwuru,
ga wa galixkowlu.
13Ga wa pejnuruko giyakotkaluru tengogne gajeru ga wa chiji gajeru, ga wa chiji gitokote gajeru, ga wa tsru wenumta gwachine, ga wa pejnuruko wane gajerkaka, nyijnako wane chinreta:
Pogirchi tuplapijere tuplatachri,
Ga wa gowega Wgene
waneyapa gimalwuru ga wa kagwakpiiru,
ga wa goyaknuchi, ga wa muchkonchi,
rixgognenatanu gike rixiniko mnikawnakatu.
14Ga wa gepkoxamkoje giwekachine wane china, “Wane gixkalurupa.”
Ga wa tsrune chiji rapokna ga wa yoptsojityegitluna.
Currently Selected:
Gipgujetkaluru 5: pib
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
