1 Tesalonikane 5
5
Gitsrukaachigognepa
1Seyni, nomolene, gi gmagatya wa nyonyegityagi gigognepirana ga wa gipapkopirana. 2Gi rixanu gixako gimatpotutlu wa Gitsrukaachigognepa kachowguru goyechno gapokachri pixka rixa ginretanu. 3Wane chinachinepni, “Kigle gwashlutkani ga wa kiglepokolutkani,” waneklu mkagwaakotu nikawakchi gapyegitanna, wa kamshirochinowle pixka. Ma mayixawninitipna.
4Seyni gixa, nomolene, mapshagawaka mwakanetkagi, wa walegognepatka ma kashichyanupgi kachowguru pixkalutu. 5Gi rixanu pejnurunekgi gixa pokamlalu gwachinetkagi ga wa gogi gwachinetkagi. Gi wa goyechno gajenetkagi. Gi wa mapshagawakako gajenetkagi. 6Giyagni wa xani gi wumkanu pimrine pixka, seyni wuyokanu gonuka. Kanshinikanurunepwu. 7Gi rixanu wa gimkachine goyechno rumkanatna. Ga wa gimetachine goyechno rumetna. 8Ga wa wixa gogi gajenwu wixinri, kanshinikanurunepwu. Wustatletanru galixlewlu ga wa gishiniklewlu. Ga wa yowumatpu wutakinwa. Walenwa gognewatikaluru kagwakikolu. 9Gi rixanu Goyakalu gi gitakwu wa jgekanchi chinanu, seyni wumretikolupa gognewatikaluruya Wutsrukate Geso Kristo chinanu. 10Wale gipnana wixa chinanu, waka wuyokinipa waka wapnanutinipa, Waleyma wuwekinripa. 11Giyagni giykokakanu ga wa ntseruwakanshinikankakanu wa gixanatyawaka.
Pawlo giykotna moletkakachine
12Wagjitgi, wumolene, gimatyapna gixa yegi yaprewatyachine Gitsrukachiya, wa ggirukotjene Gitsrukaachiya, ga wa giykotjene. 13Gkagwakpirpotutanna gishiniklewleyma kamrurna chinanu. Kigle gimwashkaklepgi. 14Wagjitgi, wumolene, giykotanna mmerene. Gimnanukanna mmuchkotanshinikanutkane. Gipxakanna gigrokachine. Ma pognanunepgi pejnuruneko yegi. 15Getinwa gi satuna gipekotinri gektutu wa gektutuya, seyni psolgogneko kigleru gomkagi kamruregogneyegkakanu, ga wa pejnuruneko yegi.
16Psolgogneko gimuwgognenatanu. 17Gi gituka gagjigognergognenatanu. 18Pejnurkakako mpoyagnutanu. Gi rixanu tyenwa Goyakalu gimushinikyagi Kristo Gesoya.
19Gi wa giwakanru Giwekikaluru. 20Gi wa geyikanru tokanchi genekikolu. 21Getjetanru pejnuruko. Kigleru gimretanu. 22Gitspalatinri pejnuruko mugletpoga.
Giglewanshinikanrewlu Goyakalute psolpotuyako kpashirine gixkakangi
23Waleko giglewanshinikanrewlu Goyakalute psolpotuyako kpashirine gixkakangi. Mmagatikanepgi ga wa muklukanuwnakanepgi gimretkalunepgi giwekikaluru gixanuya, ga wa ginshinikanuya, ga wa gimaneya, Wutsrukate Geso Kristo gininpotunanuko. 24Poyagkakachrinwa ntomgajeru, ga wa Wale kamrutanru.
Ralipre galuklewleta ga wa ruglenshinikanyegitna
25Wumolene, gagjigogneyegitanwu. 26Galukanna pejnuruneko moletkakachine kpashiri gamluruya. 27Nagjipotutgi Gitsrukaachiya twu kiruka getyongatanu pejnuruneko moletkakachine yegi.
28Gimutkalunepgi Wutsrukate Geso Kristo gimutlewleya.
Currently Selected:
1 Tesalonikane 5: pib
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.