San Juan 2
QUHNT
2
Caná llajtapi casamiento
1Quinsa caj p'unchaypi Galilea jallp'a Canapi uj casamiento carka. Chaypitaj Jesuspa maman casharka. 2Jesuspis yachacojcunanwan chay casamientoman wajyariskas carkancu. 3Vino tucucapojtintaj maman Jesusta nin:
—Manaña vinoncu canñachu, —nispa.
4Jesustaj nin:
—Mamáy, chayka nokallamanta. Horayka manaraj chayamunchu, —nispa.
5Mamanri yanapajcunaman nin:
—Imatachus nisonkachej chayta ruwaychej, —nispa.
6Chaypitaj carka rumimanta sojta yacu p'uñus israelcuna llimphuchacunancupaj churaska. Chay p'uñusmanka sapa ujman pachaj botellajina yaycoj. 7Jesustaj paycunata nin:
—Chay p'uñusman yacuta junt'achiychej, —nispa.
Wasarishajta junt'acherkancu. 8Jesustaj paycunata nin:
—Cunan wiserkospa apaychej dispenseroman, —nispa.
Paycunataj aparkancu. 9Dispenseroka yacumanta ruwaska vinota mallerka. Payri mana yacharkachu maymantachus caskanta. Yacu wisej yanapajcunalla yacharkancu. Chaymanta dispenseroka casaracojta wajyaspa nin:
10—Tucuy runamin ñaupajta sumaj caj vinota runasman jaywan. Runas sajsajtincutaj khepata lak'allataña jaywan. Kanrí cay sumaj vinota cunancama wakaychaskanqui, —nispa.
11Cay ricuchinaspa kallariyninta Jesús ruwarka Galileapi caj Caná llajtapi. Chayta ruwaspa atiyninta runasman ricucherka. Yachacojcunantaj paypi jap'icorkancu.
12Chaymanta Jesús Capernaum llajtaman riporka. Pay, maman, waukesnin, yachacojcunan rerkancu. Chaypi pisi p'unchaycunallatawanña cacorkancu.
Yupaychana-waseka Dios Tatanpata
13Israelcunaj pascua p'unchaycunancu kayllamusharkaña. Jesustaj Jerusalén llajtaman rerka. 14Chayaspataj yupaychana-wasej pationpi tariparka chay vendej runasta. Paycuna vendej cancu Diosman jaywanaspaj bueycunata, ovejacunata, palomacunata. Taripallarkataj kolke cambiajcunata tiyaskasta. 15Chaypi caj phalasmanta sek'onata ruwaspa Jesús yupaychana-wasimanta tucuy paycunata kharkomorka ovejasnincutawan bueyesnincutawanpis. Cambiajcunaj kolkesnincuta jich'arka mesasnincutapis tijrarka. 16Palomata vendejcunaman nerkataj:
—Caycunata jawaman apaychej. Amañataj Tataypa wasinta khatu wasiman tucuchiychejchu, —nispa.
17Yachacojcunanri Diospa palabranpi cay niskanta yuyaricorkancu: “Yupaychana-wasiyquita tucuy sonkoywan munacuskayraycu wakaychanaypaj causayniyta kosaj”.
18Israel curajcuna chay ruwaskanmanta Jesusta nerkancu:
—Nokaycuman ricuchiwaycu ima atiywanchus chayta ruwaskayquita, —nispa.
19Jesustaj paycunaman cuticherka:
—Ruwaskayquichejwan tucuchillaychej cay yupaychana-wasita. Nokataj quinsa p'unchaypi cayta jatarichisaj, —nispa.
20Chay curajcunataj nerkancu:
—Tawa chunca sojtayoj wataspi wasichacushan cay yupaychana-waseka. Kanrí ¿quinsa p'unchaypichu cay yupaychana-wasita jatarichiwaj? —nispa.
21Caytarí mana chay yupaychana-wasimantachu Jesús nerka. Manachayrí quiquin cuerponmanta parlasharka. 22Jesús wañuymanta causarimojtin yachacojcunan yuyaricorkancu chayta niskanta. Diospa palabrantataj creerkancu, Jesuspa niskantapis.
Jesuska runaj yuyayninta yachan
23Pascua p'unchaycunapi Jerusalenpi Jesús cashajtin ashqhas paypi jap'icorkancu ricuchinasta ruwaskanta khawaspa. 24Jesusrí tucuy runaj yuyayninta yachaskanraycu paycunaman mana confiacorkachu. 25Runaj sonkonta pay quiquin rejsiskanraycutaj runamantaka mana willanatachu suyanan caj.

© 2011, Wycliffe Bible Translators, Inc. All rights reserved.

Learn More About Dios Parlapawanchej