Uan 7
7
4. Abi caniacnoshon Esus chieshënaid
(7.1—12.50)
Aton utsibon Esus tantienquio yaid
1Abi tsibanquido dadpenshun nianac nidaid cuëshë Cadidea yacnouidtsëqui iuec Esus capucuennepondash. Nidaid Udea yacnocquid cun matses isadaidbon#7.1 Udiubo nidaid Udea yacnocquid yec isadaidbobidi nepanëdash. chuiquidon ubi cuessunemete bunec, quiash Udea yacno nidenquio icpondash. 2Adnubien cun matses abitedi nidash Edusaden yacnoshon nistebiecquid podo tabadte shubumpi uash 6tedec ushec cuëdënec iccuededte anoentsëqui yampondash.#7.2 Moisesën chiampicpadombuen setan setanquien ambi nitsinaid bedquin ënash: Nuquin Papa bëdambo iquec, quec cuëdëncuededec nidpanëdash. Adecbidi aton tsusedpabo Equipito yacnouësh cuenec nidec tabadtempin tabadcuenniaid tantiaquin tabadtempi uatsash Edusaden yacno tabadpanëdash. Aid tantiate anoentsëqui yansho issun 3aton utsibon: Nidaid cuëshë Udea#7.3 Aid cuëdënte nidaid cuëshë Udea caidën shubu dadpen icquid Edusaden yacno icquid nepanëdash. yacno nidec nid. Mibëd icte bunquido ambo iqueque. Nadatiambocquin nabanquin aido ismec nid. 4Ma matses dadpenshun ubi tantianu, ¿queshunda ismenquio icquin matses daëdpactsëc yacnoshonuidtsëqui napec? Matses dadpen yacno nidshun aido ismequin nadatiambocquin nabanquin ismec nid, capondash aton utsibon Esus chuiquin. 5Nuquin Papan Chomiaidquio nec, quequin tantienquio icquimbi aton utsibon aden chuipondash. 6Adoaquien Esus: Matses dadpenshun isnuc umbi nabante uëshë yanabi icnuc nëbi nidtiapimbo iquebique. Mibitedi nëbi nidac bëdambo ictsiashe. Nidtan. 7Mibitedi ubi tantiesabon chieshëntiapimbo iquec. Ubien chieshënondash. Nuquin Papan Chiaid niac niacquin mimbi icsambuen naic, umbi cac chieshënondashi. 8Cuessunnenushe, quiash nëbi nidtiapimbo iquebique. Mibitedi nidtan. Nuquin Papan tantiacpadënquio nidendabi, 9quiash nidenquio yec nidaid Cadidea yacnobi Esus tabadpondash.
Esustsen Edusaden yacnouësh cuëdënnuec nidaid
10Adec aton utsibo nidannebon iuec iuecpactsëc ictanec abitsen Edusaden yacno abitedi ismenquio yec tsiuec Esus nidpondash. 11Adnubien cun matses cuëdëncuededacnoshon cun matsesën chuiquido isadaidbon Esus nibëmbennec: ¿Mitsimbo icpec? ¿Ada nëmbo chopash? quequin nibëmbennepanëdash. 12-13Aden cun matses isadaidbon chuiquidon nibënsho isash dacuëdec cun matses shoshoshquetsëcquiec nadec onquecuededpanëdash: Esus bëdamboshëcquid nec, quenubi utsi utsiec: Ma icsambo icquid neyoc. Nuquin Papan Chomiaid nebi, quequin cun matses muaquin chuiquid nec, quecuededpanëdash.
14Adnubien cun matsesën cuëdëncuededquin bedambon 3tedec ushash Esus chopondash. Adash Nuquin Papa tabadte shubu dapa daquënë uaidën puduedshun Nuquin Papan Chiaid chuibampondash. 15Aden chuibansho tantiashien tantiadempambo yec tabadec cun matses isadaidbo: ¿Mitsipadombuen tantiabenshun chuiquin naic? Ma nuquibëtan Nuquin Papan Chiaid isbanambo aidën icpayoc, quepondash cun matsesën chuiquido. 16Adsho tantiash Esus: Ambembi tantiaquin chienquio icquin ubi Chomiondaidën Chiaidquio chiec nebi. 17Nuquin Papan chiacpadombuen nate bunquidën bëdambuen tantiatsiash. Umbi Nuquin Papan Chiaid chuisho tantiash: Nuquin Papan Chiaidquio chiec nec, quequin tantiatsiash. Umbi ambembi chuisho tantiash: Nuquin Papan Chiaidpenquio chiec nec, quequin abimbo tantiatsiash. 18Ambembi chuiquidën: Mabi matsesën: Bëdambo mibi iquec, canu, quequinuidtsëqui tantiaquin chuibanendac. Umbien: Ubi chomiondaidquio ma matsesën tantianu, quequin aidën chiaidquio abimbo chiec nendac. 19Mimbien adoenquio iquec. Mimbi tantiaid nuquin tsusedpa Moisesën: Cuessunnenda, quequin Nuquin Papan Chiaidquio dada uapampic. Adquid icnubi ¿atotsi quiash ubi cuessunnete bumpe? quepondash Esus.
20Adsho tantiashumbien ambo tabadquidon: Mayan Icsa Satanasën iua podobitsi icsa dapuduedashien mibi adec onquec nec. ¿Tsutsi mibi cuessunnete bumpec? capondash. 21Adoaquien Esusën: Nëidën ubi cuessunnetsiash, quequin chienquio yec: Chonoadtemaid uëshën nadatiambocquin nabanquin umbi dada bëdanmiacsho isash tantiadempambo yec mibitedi tabadoc. 22¿Umbentsëquidambi chonoadtemaid uëshën nadi? Ma nuquin matsesën adembidi Moisesën chiampid tantiaquin dada bacuë tishacsho 6tedec ushshun shui dëbid dëtemebampaboc. Moisesën aden tauambo icpampic. Moises tishabi icnubien Nuquin Papan chiacpadombuen Abadauanën aden shui dëbid dëtemequin tauapampic.#7.22 Abadauanën nampid istiadquio icquin Ene. 17.10-14 isbanta. 23Aden Moisesën chiampid niaquenquio icquin shui dëbid dëtemequin mibitedishun bëdambuen naic. Chonoadtemaid uëshëmbi mimbi natsiac. Umbitsen dada shëquëcadenquiocquid bëdanmequin mambi bëdambuen napaboc. ¿Atotsi quequin ubi nëishënquin nai? 24Chonoadtemaid uëshën dada bëdanmequid icsho: Icsambo mibi iquec, mimbi ubi capec. Aden bëdambuen tantienquio icquin mimbi icsambuen chiec. Bëdambuen tantiashun bëdambuen chuita, quepondash Esus.
¿Nuquin Papan Chomiaid Quidistubida nepec? quiaid
25Adec Esus: Chonoadtemaid uëshën naondambi, quesho tantiashien Edusaden yacnocquido nadec onquecuededpanëdash: Nuquin chuiquidon cuessunnenuen nibëmbuedien nëid nechitec. 26Abi chieshënquidobëdi tabadquin chieque. Is. Chuisho ma nuquin chuiquidon chushcainquio icpayoc. Nuquin Papan Chomiaid Quidistu caid Esus nec, quequin tantiaquimbien nachitec, quetanequien: 27Nuquin Papan Chomiaid aid ictiapimbuen iquec, quequin abi caniacno nuquitedi tantiec. Padnuen Nuquin Papan Chomiaid iquec abi caniacno tantiadenquio ictsiash, quepondash ambo tabadquido.
28Adsho tantiashun Esusën Nuquin Papa tabadte shubu dapa daquënë uacnoshon chuibanquin abitedi tantiamenuen cumapenec cuëdquin naden chuipondash: Umbi isondaid nec. Aidi nidaid Cadidea caid yacnouësh caniquid nec ¿quequinda mimbi ubi bëdambuen tantiapadi? Padenquio. Ubembi chondaidpenquio nebi. Ubi chomiondaid abi iquec. Abimbo chuiquid nec. Adquid icshobi ma mibitedishun aidquio tantienquio yoc. 29Umbien aidquio tantiec. Abëd tabadquidquio icsho aidën chomiondaidquio nebi, quepondash. 30Adsho tantiashun: Nuquin Papa caic Cun Pa nec, quechitequien nec, queshun abi chieshënquidon: Uënës uamenuembien bedtiad, queshumbi abi uënës uamete uëshë yanabi icnuc Esus bedenquio icpondash. 31Adec Esus cuessunnemete bunnubi utsibo dadpenshun Esus tantiabempondash. Nëid padquid utsi nibëdec. Nadatiambocquin nabanquin matses bëdanmequid yec Nuquin Papan Chomiaid Quidistu caid nec, queshun Esus tantiabempondash.
Padiseyobo: Esus bedmenu, queuidaid
32Aden Esusën naid chiec shoshoshquetsëcquiec onquesho tantiashumbien padiseobon Nuquin Papa ismequin nëish iua cuessunneshun pichicaquidon chuiquidobëtan naden chuipanëdash: Esusien bedmetiad. Icsambuec onquioshe, cac: Ai, adembien ictiad, queshun aidon Nuquin Papa tabadte shubu dapa isquido sondado chuiquin: Baded bedtan, quequin nidmepanëdash. 33Adoac chochoquimbi nadec Esus onquesho tantiatuidpondash: Iuec iuecpactsëc mibitedibëd tabadashic ubi chomiondaidbëdtsen tabaduaic nidendabi. 34Ubi nibënquin istuidenquio mimbi iquendac. Ubi nidacno mibitedi nidtiapimbo iquendac, quepondash Esus.
35Adsho tantiash ambo tabadquido cun matses isadaidbon chuiquido: Nuqui istuidmenquio icnuec ¿mitsimbo nidpanuec nec? Matses utsi yacno tabadnuec nuquin matses nidanniondacno nidshun ¿Nuquin Papa tantiesabo quidieco caido chuibannuecta nepec? 36Tantiadenquien onquepec. ¿Atotsi chiec? Ubi nibënquin istuidenquio mimbi iquendac. Ubi nidacno mibitedi nidtiapimbo iquec, quequin ¿atotsi chiec nepec? quepanëdash cun matsesën chuiquido.
Aton Mayan abi tantiaquidbëd tabadmete chiaid
37Adnubien cuëdënec ënëdte uëshënquiobi cun matses abitedimbo cuëdënnuec chochopondash. Chochoash tabadbudnubien nidtoash cumapenec cuëdquin Esusën naden chuibampondash: Acte bunquiacbimbuen Nuquin Papa tantiate bunquin ubi bëdambuen tantiata. 38Adsho Nuquin Papan chuiquin dada uamiampicpadombuen#7.38 Isa. 55.1 chiacbimbuen Esusën chuipanëdash. naindambi. Ubi tantiaquido icsho acte acmiac cuishonquiacbimbuecnuc bëdambo icmendambi, quepondash Esus. 39Nuquin Papabëta ubi tantiamequidquio Nuquin Papan Mayan nec, quequin tantiec adpondash. Adquid abi tantiaquidobëd tabadmete chiec uënësash uincuenanec Nuquin Papa yacno nidambo icquimbi aden Esusën chuipondash.
¿Nuquin Papan Chomiaidta Esus nepec? quequin chiaid
40Aden Esusën chuisho tantiash: Ambi oncamiaid bëdamboshëcquid chomendac, quequin chiampidien nechitec, quenubien 41utsi utsiec: Nuquin Papan Chomiaid Mesias Quidistu caidien Esus nechitec, quenubien utsi utsiec: Nidaid cuëshë Cadidea yacnouësh Nuquin Papan Chomiaid Mesias Quidistu caid chotiapimbo iquec. 42Nuquin Papan chuiquin dada uamiampid nad iquec: Nuquin Papan Chomiaid Mesias Quidistu caid nuquin tsusedpa Dabidën tsiuecquid nendac. Dabid tishampid shubu daëdpactsëcquid Beden caid yacnoshon aidi tishendac, quequin chuipampic. Aden chiampid icnuc Esus Quidistu ictiapimbo iquec, quepanëdash.#7.42 Miqueas 5.2 tantiaquin aid matsesën Beden capanëdash. 43Aden tantiec dadpen: Bëdambocquid nec, quenubi aidtedbidi: Icsambo icquid nec, quec cuëshëdpondash. 44Adnubien: Icsambocquid neque. Quënën tsadunnumbien bedtiad, queshumbi Esus bedenquio icpondash.
Isadaidbon chuiquid tapabon Esus tantienquio yaid
45Adnubien abi: Bedtan, cabuedo yacno Esus bedambobi sondado chochouapanëdash. Adec chochosho issun Nuquin Papa ismequin nëish iua cuessunneshun pichicaquidon chuiquidobëtan padiseobon: ¿Atotsi quiash bedambobi cho? caquien 46sondadon: Ma bëdambuen chuibampaboc. Adombuen chuibanquid utsi nibëdec, queshun bedenquio iccombi, quesho 47tantiashien padiseobo: Aidën muaquin chuisho tantiashun ¿mimbitsenda: Abimbo caic, cao? 48¿Adambi muaquin chuisho nuquin chuiquidobëtan padiseobon Esus tantiashundio? Padenquio iccombi. 49Utsibombien tantiashunash: Adquidon umbi bëdambuen tantiacpadombuen Nuquin Papan: Naden nata, quequin Moises chiampid tantienquio iquec. Aido icsambo iquec. Adquid icsho Nuquin Papan cuidtequido nendac, quepanëdash padiseobo.
50Adnubien inchëshën puduedash Esusbëd onquiondaid Nicodemo padiseobobidi yec nadpanëdash: 51¿Ambi naid chuisho tantiambobida cuidpec? Nuquin Papan Chiampid nad iquec: Icsambo iquec, caid ambi naid chuimequin: ¿Atotsi nao? cac chuisho tantiashun cuidquid yendac, quepampic. Adquid icnuc chuimiabi cuidac icsambo ictsiash, quepanëdash Nicodemo abipadquid chuiquid utsibo chiec. 52Adoaquien chuiquidon: Esus yacpadec nidaid Cadidea yacnouësh caniquidien mibi nechitec. Aid tantiaquidien mibi nec. Nuquin Papan Chiampid isbanta. Aid isbanshun: Nidaid Cadidea yacnouësh Nuquin Papan oncamiaidquio choenquio ictsiash, quequin mimbi tantiatsiac, quepanëdash chuiquido Nicodemo chushcaic. 53Aden chushcatanec abitedi aton shubuno nidannepanëdash.
Currently Selected:
Uan 7: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.