Uan 13
13
II. ESUS UËNËSUAC UINCUENASH ATON PAPA YACNO NIDUAID
(13.1—21.25)
1. Abëd icquidobëtan ënquimbi piaid
(13.1—17.26)
Esusën abëd icquido tapanaid
1Adashic cun tsusedpabon: Ma cun mado uënësmenquio icnu, queshun obeca caniactsëc cuessunniampid inchësh tantiate nëbi yannuc inchëshën Esusbëd pec tabadpondabi. Adec tabadequi Esus ambibi tantiec: Nëbi matses nianec Cun Pa yacno aidbëd tabadec niduaindabi. Ubi tantiaquido ënenquio icquin tantiembi, quepondash. 2Adnubien Simon Iscadioten mado Udas Mayan Icsan Satanasën tantiamiacpadombuen ambi Esus bedmete tantiec tsadpanëdash. 3Cun Pan chomiondaid icquin aidën tantiacpadec abëdi abitedishun Icbombo iccondaidi nëbi ambobidi niduash adquidbidi icuaindabi, quequin tantiaquin Esusën nadopondash. 4Abëd icquidobëtan#13.4 Cuëshnudash uequin isadaidbon pequid nepanëdash. pebededacnouëshi nidtotanquin dashcute bëntsecquid dachiquidtanec daucudte tsibidiquepondash. 5Tsibidiquetanquin padapadaid tapan acte cushtotanquin abëd icquido tapambanquimbi daucudten taucbampondash.
6Aden tapambanquimbi: Mibitsen tapannu, Simon Petedo, cac: Padi, Icbo. ¿Icbonda iua tapampaid? Ubi tapanenda, capondash. 7Adoaquien Esusën: Umbi nëbi nasho mimbi tantienquio iquec. Iuecshun mimbi tantiendac, caquien 8Petedon: Padi. Iua namiacbimbuen mibi tapanmetiapimbo iquebi, cauapondash. Adoaquien Esusën: Umbi tapanabi yac cun iuambo mibi ictiapimbo ictsiac, capondash. 9Adsho tantiashumbien Simon Petedon: En na, Icbo. Tapanquinuidtsëqui nainquiocquin ubi mëpantanquin mapinotsen nata, caquien 10Esusën: Padi. Nesaid mibi nec. Taënouidtsëqui bëchishacsho tapanembi. Umbi bëchish ucac mibitedi bëdambo iquec. Adquid icnubi abentsëc icsambocquid iquec, quepondash Esus. 11Abentsëcshun ubi cuessunnemenuen bedmendac, quequin tantiec: Abentsëc icsambocquid iquec, quepondash Esus.
12Aden tapambanash padpidec dashcute bëntsecquid dasiuiduash pec tabadquin abëd icquido naden Esusën chuipondash: ¿Ada umbi nabambued mibitedishun tantie? 13Cun chuiquidquio nec, mimbi ubi capec. Adembidi: Cun Icbo mibi nec, mibitedishun ubi capec. Bëdambuen mimbi chiec. Adquid nebique. 14Umbi nabocpadombuembidi mibitedishun nata. Ubëd icquid tantiaquioquin tapanquin nashunnu, queshun naombique. Adombuembidi naic utsibobëd tapannanta. 15Umbi nabocpadombuen: Ma nanu, queshun mibitedi ismiombique. Mimbitsen nata. 16Tantia. Abimbo chuinu. Iuan aton icbo dëniactiapimbo iquec. Nidmiaidën abi nidmequid dëniactiapimbo iquec. 17Umbi aden chuibued tantiaquin nabansho Nuquin Papan mibi bëdambo icmendac, quepondash Esus.
18Adashic padpidec: Mibitedi caic: Abitedimbo bëdambo iquec, quetiapimbo iquebi. Tauambuen: Nuquibi icnu. Cho, umbi caondaido cun iuabotedi tantiembi. Adquid icnubi abentsëc icsambo iquec. Aid chuiquin Nuquin Papan tantiamiac nuquin tsusedpan naden chuiquin dada uapampic:
Ubëtan pequidën
ubi chieshënquido ubi bedmendac,
quequin chuipampic.#13.18 Chotaquën onqueten Cuëd. 41.9 isbanta. 19Aden ubi bedmesho issun: Nuquin Papan Chomiaid icquin abi bedmete chiecshenda neposh, quequin ma tantianu, queshun mibitedi chiec nebi. 20Tantia. Mibitedi abimbo chuinu. Mibi padquid umbi nidmiaidën umbi naid chuibansho tantiash: Ai, abimbo caic, queshun ubi tantiabenquimbi ubi chomequidtsen tantiabenendac, quepondash Esus.
Udasën abi bedmete Esusën chiaid
(Mat. 26.20-25; Madc. 14.17-21; Duc. 22.21-23)
21Aden chuishumbic Esusën uënësquioshë yanquin naden chuipondash: Abimbo chiembique. Tantia. Mibitedi ubëd icquido icnuc abentsëcshun ubi chieshënquido ubi bedmendac, 22quesho tantiash abëd icquidobëd bëisnanec: ¿Tsutsien capec? quecuededpondabi otacquio tantiec.
23Adnubien abëd icquid abentsëc ambi tantiaidquio iquec Esusën dayuntsëqui uepondac. 24Adec Esusën dayuntsëqui ueshobini Simon Petedon onquenquio icquin mëdquin: ¿Tsutsi cai? ca, capondashi. 25Adoaquimbi Esusën dayuntsëc icquin: ¿Tsutsi cai, Icbo? capondac. 26Adoaquien Esus: Umbi pan cuëshë ënë puntanquin meniac bedquid aidi nendac, quetanquin pan cuëshë ënë puntanquin Simon Iscadioten mado Udas menepondash. 27Aden meniac bednubi ambi tantiaidquio namenuec Mayan Icsa Satanas Udas dapuduedquiopanëdash. Adshobien Esusën: Mimbi tantiacpadombuen badedquio nëbimbobi naic nid, Udas, capondash.
28Adsho tantiash ubitedishun tantienquio yec: ¿Atotsi quiash: Baded naic nid, quepec Esus? quecuededpondac. 29Adsho tantiash: Udas nuqui piucquid dayun uashunquid nec, quequin tantiec utsi utsiec: Piucquid buanshun nuqui nëbi petequid bedtan, caquimbien nachitec, quenubi utsi utsiec: Piucquid nibëdquido piucquid menetan, caquimbien nachitec, quepondabi. 30Aden meniac pan cuëshë bedanec Udas badedquio inchëshëmbi nidpondash.
Tantiananquiota, quequin Esusën chiaid
31Udas nidbombien Esus: Matsesën Tishaid icquimbi Nuquin Papan Chiaidtedi nëbimbobimbi nainendac. Umbi nainsho issun: Abitedishun Icbo icquin Nuquin Papan namiac ambi tantiaidtedi nainosh, caindac matsesën. Adembidi ubi cain: Abëd abitedishun Icbo icsho Nuquin Papan namiac nainosh, caindac. 32Aden umbi Matsesën Tishaid icquin: Abitedishun Icbombo nec, camiacpadombuembidi Cun Pantsen: Abitedishun Icbombo nec, ubi camendac. Nëbimbobi naindac, quepondash Esus.#13.32 Abi uënës uatebëta abi uënësash uincuenash Nuquin Papa yacno nidte Esusën aden chuipanëdash. 33Tantia. Umbi tantiaido yec cun mado caido icsho mibitedi chuinu. Mibëd iuec tabadenquio iquendabi. Umbi isadaidbon chuiquid tapabo chuibocpadombuembidi mibitsen chuiuanu. Ubi nidacsho nibënquin mibitedishun ubi istuidenquio iquendac. Ubi nidacno mibi nidtiapimbo iquendac. 34Aden tantiaquin Nuquin Papan Chiaid chuca utsi mibi chuinu. Ubi nidan umbi chiacpadombuen nata. Umbi mibitedi tantiaquiacpadquiecbidi mibitedi tantiananquiota. 35Ubi tantiaquido yec mibitedi tantianansho issun: Adec tantiananquidombo Esusbëd icquido nec, quequin utsibon tantiatsiash, quepondash Esus.
Umbi isacmaid Esus nec, Petedo quete chiaid
(Mat. 26.31-35; Madc. 14.27-31; Duc. 22.31-34)
36Adec: Nidebi, quesho tantiashun Simon Petedon: ¿Mitsimbo nide, Icbo? capondash. Adoaquien Esusën: Nëbi mibi nidtiapimbo yacno nidebi. Iuecash ambo mibitsen nidendac, capondash. 37Adsho tantiash Petedo: Icbo ¿atotsi quiashibi nëbi mibëd nidtiapimbo icpe? capondash. Mibëd nidec dacuëdenquio ictsiabi. Mibi chieshënquidon: Cuessunnenu, mibi casho tantiash: Ubien natiad iquec, quetsiandabi, capondash Petedon.
38Adsho tantiashien Esus: Ubien natiad iquec ¿quecta ictsia? Tantia. Mibi chuinu. Cachina cuëdanabi icnuc: Umbi isacmaid nec, quequin mimbi 3teden chiendac, quepondash Esus.
Currently Selected:
Uan 13: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.